Jehová Diosman takisun

“Kawsashanaykamaqa Señor Diosmanmi takisaq.” (SAL. 146:2.)

1. ¿Imanaqtinmi David ruwarqan wakin takikunata?

DAVIDQA p’unchay-p’unchaymi Belén llaqtaq cercallanpi taytanpa ovejankunata michiq. Chaypin payqa “salqa animalkunata, phalaq animalkunata” Jehová Diospa imaymana kamasqankunatawan qhawaspa chaykunapi yuyaymanaq, hinallataq tutapi ch’askakunata qhawaspapas. Diospa kamasqankunaqa sonqonman chayaqmi karqan, chaymi ancha sumaq takikunata ruwarqan imaymana Kamaqta hatunchananpaq.  Chay takikunan tarikun Salmo qelqapi (leey Salmo 8:3, 4, 7-9). *

2. a) ¿Imaynapin yachanchis munay takikuna kusirichiwasqanchisqa? b) Salmo 34:7, 8; Salmo 139:2-8 textokunapi nisqan hina, ¿imaynatan David qhawarirqan Jehová Diosta?

² Davidqa taytanpa ovejankunata michishaspan allin takiyta yachanman karqan. Arpa tocaytapas allintan yacharqan, chaymi rey Saulqa waqyarqan tocapunanpaq (Pro. 22:29). Saulqa Davidpa munayllaña arpa tocasqanwanmi “sonqonta tiyaykachikuq”, kunanpas thakmi sientekunchis munay takita uyarispaqa (1 Sam. 16:23). Davidpa ruwasqan takikunaqa kashanraqmi kunan p’unchaykamapas. Nacesqanmanta 3.000 wataña karqon chaypas, waranqanpi runakunan qelqasqan takikunataqa leenku kusikuyta thak-kayta tarinankupaq (2 Cró. 7:6; leey Salmo 34:7, 8; 139:2-8; Amós 6:5).

Takikunawanmi Jehová Diosta yupaychanchis

3, 4. ¿Imakunatan David ruwarqan Jehová Diosta takikunawan yupaychakunanpaq?

³ Davidqa munay takikuna ruwasqanwanmi Jehová Diosta hatunchaq. Chaymantapas Israelpi kamachishaspaqa Dios yupaychana karpapin churarqan allin takiqkunata. Chaypi llank’aq Leví runakunamantan tawa waranqa akllasqa karqanku “Davidpa qosqan tocanakunawan Señor Diosta yupaychanankupaq”. Paykunamantataq 288 “Señor Dios yupaychay takikunatapas tocaykunatapas yachachisqa karqanku kusatataq atiqkupas” (1 Cró. 23:3, 5; 25:7).

⁴ Levi runakunaq takisqankumantan askha karqan Davidpa qelqasqan takikuna. Chay takikunata uyariq Israel runakunaq sonqonqa llanllariqchá kusikuymanta. Rimanakuy arcata Jerusalenman apamunankupaqmi Leví runakunaq umallinkunata David kamachirqan: “Wawqeykichiskunamanta churaychis takiqkunata kusisqa takinankupaq, churallaychistaq tocaqkunatapas, arpata, tawtinkuta, platillota ima tocanankupaq”, nispa (1 Cró. 15:16).

5, 6. a) ¿Imanaqtinmi David kamachikushaqtin takikunawan Diosta yupaycharqanku? b) ¿Imaynapin yachanchis Israel runakunapaq Diosta takikunawan yupaychay ancha importante kasqanta?

⁵ ¿Imanaqtinmi David kamachikushaqtin takikunawan Diosta yupaycharqanku? ¿David allin takiq kasqanraykuchu? Manan. Qhepaman rey Ezequías, Dios yupaychana wasipi wakmanta llank’achiyta qallarichisqanmantan Biblia nin: “Rey[mi] Señor Dios yupaychana wasiman Leví runakunata churarqan platillokunayoqta, arpakunayoqta rey Davidpa kamachikusqanman hina. Chay ruwaykunatan Señor Diosqa Davidman willachirqan profeta Gadwan profeta Natanwan ima”, nispa (2 Cró 29:25).

⁶ Qhawarisqanchis hina, Jehová Diosmi profetankunawan willachirqan takikunawan yupaychanankupaq.Takinankupaq t’aqasqa Leví runakunaqa manan huk ruwaykunata ruwaqkuchu, chhaynapi takikuna ruwayllamanña qokunankupaq chaykunata ensayanankupaqpas (1 Cró. 9:33).

7, 8. ¿Imatan Jehová Dios aswan allinpaq qhawarin payman takiqtinchis?

⁷ Wakinqa ninkumanpaschá: “Ñoqaqa manan allin takiqchu kani. Dios yupaychana karpapi kusa takiq kanaypaqqa nichá qhawarillawankumanpaschu karqan”, nispa. Leví runakunapas manan llapankuchu allin takiqqa karqanku. Bibliaqa willanmi chayllaraq yachashaqkunamantapas (1 Cró. 25:8). Chaymantapas huk ayllukunapiña karqan allin takiq runakuna chaypas, Jehová Diosqa Leví ayllu runakunallamantan akllarqan chay sumaq llank’aypaqqa. Paykunaqa kusa takiqña otaq chayllaraq yachashaq karqanku chaypas, tukuy sonqochá Jehová Diosmanqa takiqku.

⁸ Davidqa ancha allin takiqmi karqan,  Jehová Diosmi ichaqa mana chaytachu aswan allinpaq qhawarin. Rey David kikinmi nirqan: “Sumaqtapuni t’iphsispa mosoq takita takipuychis, kusikuymanta qapariychis”, nispa (Sal. 33:3). Jehová Diosqa sumaqta takinanchispaq kallpachakusqanchistan aswan allinpaq qhawarin.

Diostaqa hatunchashallarqankun takikunawan

9. ¿Imatan rikusunman uyarisunman karqan yupaychana wasita Salomón inaugurashaqtin?

⁹ Israelpi Salomón kamachishaqtinqa sumaq takikunawanmi Jehová Diosta yupaychaqku. Dios yupaychana wasi inaugurakuqtinmi munayllataña tocarqanku imaymana tocanakunawan, corneta tocaqkunan karqanku 120 sacerdotekuna (leey 2 Crónicas 5:12). Bibliaq willasqan hina, “tocaqkunapas, takiqkunapas huk kunkalla takiykurqanku, Señor Diosta yupaychaspanku, payman graciasta qospanku ima: ¡Señor Diosqa allinmi! ¡Khuyapayakuyninqa wiñaypaqmi!” nispa. Tocayta takiyta tukuqtinkun “Dios yupaychana wasita phuyu hunt’aykurqan”, chaymi rikuchirqan takisqankuqa Jehová Diospa sonqoman chayaq kasqanta. Imaynataraqchá kusikurqanku chaypi kaqkunaqa corneta tocaqkunata takiqkunatapas huk-nisqallata uyarispanku (2 Cró. 5:13).

10, 11. ¿Imaynapin yachanchis ñawpa cristianokuna takikunawan Diosta yupaychasqankuta?

¹⁰ Apostolkunaq tiempopipas cristianokunaqa takikunawanmi Jehová Diosta yupaychaqku. Paykunaqa manan Dios yupaychana karpapichu otaq wasipichu huñunakuqku, aswanpas tiyasqanku wasikunapin. Mayninpiqa manan allin wasikunapichu huñunakuqku qatiykachasqa otaq sasachakuykunapi tarikusqankurayku. Chaywanpas paykunaqa munay takikunawanmi Jehová Diosta hatunchaqku.

¹¹ Apóstol Pablon Colosas cristianokunata nirqan “salmokunata, yupaychana espiritual takikunata” takispanku kallpachanakunankupaq (Col. 3:16). Apóstol Pablotawan Silastawan carcelman wisq’aqtinkuqa unaytan paykunaqa Diosmanta mañakurqanku yupaychana takikunatapas takirqankun manaña takina libronku karqanchu chaypas (Hech. 16:25). Chaymi sapankanchis tapukunanchis: “Carcelman wisq’awankuman chayri, ¿hayk’a takikunatan umallaymanta takiyman?” nispa.

12. ¿Imaynatan rikuchisun Diosta yupaychanapaq takikunata ancha valorasqanchista?

¹² Cheqaq religionpiqa ancha importanten takiwan Diosta yupaychayqa. Chaymi kaykunata tapukunanchis: “¿Ancha allinpaqchu qhawarishani Diosta yupaychananchispaq takikunata? Huñunakuykuna qallariyta iñiqmasiykunawan kuska takinaypaq ¿kallpachakushanichu temprano chayanaypaq? ¿Tukuy sonqochu takishani? ¿Respetowanchu familiay takishan huñunakuypi takikunata? ¿Yachachishanichu wawaykunaman takina horasqa mana samarinapaqchu nitaq puriykachanapaqchu kasqanta?” nispa. Manan hayk’aqpas qonqananchischu takikunawan Jehová Diosta yupaychasqanchistaqa. Kusa takiqña kanchis otaq chayllaraq yachashaq chaypas, llapallanchismi huk kunkalla takispa Jehová Diostaqa hatunchananchis (tupachiy 2 Corintios 8:12).

Tiempoq pasasqanmanqa manan imapas kaqllachu

13, 14. ¿Imanaqtinmi huñunakuykunapi tukuy sonqowan takinanchis?

¹³ Diosman takisqanchis ancha allin kasqanta qhawarichinanpaqmi pachak wata ñawpaqta hina kay revista inglés rimaypi khaynata nirqan: “Diosman takispaqa allintan umanchispi sonqonchispipas Bibliaq yachachikuyninkunata hap’inchis”, nispa. Askha takikunan Bibliamanta horqosqa kashan, chaymi chaykunata yachaqtinchisqa Diospa yachachikuyninkuna allinta sonqonchispi takyanqa. Chayraykun kallpachakunanchis wakillantapas umallanchismanta takinanchispaq.  Wakin iñiq t’aqakunapi iñiqmasinchiskunaq Jehová Diosman tukuy sonqo takisqankuqa chayllaraq huñunakuyman hamushaqkunapaqqa sonqonkuman chayaqmi karqan.

¹⁴ 1869 watapi Charles Russell waynawan ima sucedesqanmanta yachasun. Llank’ananmanta kutipushaspan payqa huk wasipi takishaqkunata uyarirqan. Chay tiempopaqqa sayk’upurqanñan Diosmanta cheqaq yachachikuyta maskhaspa, chaymi negociollanmanña qokapusharqan. Payqa yuyaykusqa: “Manataq runakunaman Diosmanta cheqaqta yachachiyta atisaqchu chayqa, qolqellawanpas ima necesitasqankupi yanapasaq”, nispa. Takikunata uyarisqan wasiman haykuspan rikurqan Diosta yupaychanankupaq huñunasqa runakunata. Chay wasi manaña huñunakunapaq hinachu karqan chaypas, payqa tiyaykuspan uyarisqa yachachisqankuta. Qhepa watakunamanmi chaypi uyarisqanmanta nirqan: “Diospa yanapayninwanmi wakmanta iñirqani Bibliaqa Diospa yuyaychasqan kasqanta”, nispa. Qhawarisqanchis hina, payqa chay huñunakuymanqa haykurqan takikunata uyarisqanraykun.

15. ¿Imanaqtinmi mosoq takina librota ruwakunan karqan?

¹⁵ Biblian nin: “Chaninkunaq puriyninqa pacha illarimuy k’anchay hinan, allinta p’unchayamuqtin aswan-aswanta k’anchariq hinan”, nispa (Pro. 4:18). Chay textopi nisqanman hina, tiempoq pasasqanman hinan aswan allinta Bibliaq yachachikuyninkunata entienderqanchis. Chaymi Diosman takisqanchispas chay yachachikuykunaman hina kanan karqan. Jehová Diospa testigonkunaqa iskay chunka phisqayoq watañan takisharqanchis Alabanzata Jehovapaq takiychis nisqa libronchiswan. * Chay libro lloqsimusqan qhepatan ichaqa Bibliaq wakin yachachikuyninkuna aswanta sut’inchakurqan, chayraykun takina libronchispas chay yachachikuykunaq sut’inchakusqanman hina cambiakunan karqan.

16. Apóstol Pabloq nisqanman hina, ¿ima ruwaytan atisun mosoq takina libronchiswan?

¹⁶ Wakin yachachikuykunaq sut’inchakusqanraykun huk razonkunaraykupiwanmi Umalli T’aqa aprobarqan Jehová Diosman takisun nisqa mosoq takina librota ruwakunanpaq. Chay takina libronchispiqa 135 takikunallan kashan, chaymi mana sasachu kanqa wakin takikunallatapas umallanchismanta takinanchispaq. Chaytaqa ruwananchis apóstol Pabloq yuyaychawasqanchisman hinan (leey Efesios 5:19).

Agradecekuq kasun

17. Manaña allin takiqchu kanchis chaypas, ¿imatan yuyarinanchis?

¹⁷ Huñunakuykunapi takikushaqtinqa ma nan pantayta manchakuspachu upallalla kananchis. Bibliaq nisqan hina, rimaspaqa ‘llapanchismi pantanchis’ (Sant. 3:2).  Ichaqa manan chayraykuchu saqepunchis wasin-wasinta rispa Diosta hatunchaytaqa. Chayrayku manaña allin takiqchu kanchis chaypas, kallpachakunanchismi takispa Jehová Diosta hatunchananchispaq. ‘Runata rimachiq’ Diosninchisqa kusikunmi takispa yupaychaqtinchisqa (Éxo. 4:11).

18. ¿Imaynatan askha iñiqmasinchiskuna yacharqanku mosoq takikunata?

¹⁸ Askha iñiqmasinchiskunan mosoq takina libronchismanta takiyta yacharqanku Jehová Diosman takisun nisqata grabacionpi musicata uyarispanku. Chaykunata uyariyqa ancha sumaqmi. Sichus chay grabacionpa yanapayninwan mosoq takina libroykiwan sapa kutilla takikunata ensayanki chayqa, kusatan huñunakuykunapi takinki.

19. ¿Imakunatan ruwakun orqestawan takikunata preparakunanpaq?

¹⁹ Hatun huñunakuyninchiskunapaqqa sumaq takikunatan grabakun uyarinanchispaq. Mayninpiqa manapaschá tukuy yuyaywanchu chay takikunata uyarinchis, ichaqa anchatan llank’akun chaykunata ruwakunanpaqqa. Ñawpaqtaqa takitan akllakun, chaymantataq chaykunata qelqanku orqestapi tocanankupaq, chaypi tocaqkunaqa llapankun 64 kanku. Imachus paykunaman tupaqtaqa sapankankun unayta ensayanku, chhaynapi chay grabacionkunata allinta ruwakunanpaq, chaykunaqa grabakun Pattersonpin (Nueva York). Chay iñiqmasinchiskunaqa anchatan valoranku hatun huñunakuyninchiskunapaq takikuna ruwamusqankuta, paykunamantan chunka, huk nacionkunamanta Estados Unidosman viajanku. Anchatan chay ruwasqankumantaqa agradecekunchis. ¿Imaynatan hatun huñunakuykunapi chayta rikuchisunman? Manaraq huñunakuy qallarishaqtin tiyananchispi tiyaykunanchispaq nimuwaqtinchisqa usqhayllan kasukunanchis, chhaynapi iñiqmasinchiskunaq munakuywan ruwamusqanku takikunata tukuy yuyaywan uyarinanchispaq.

20. ¿Imata ruwananchispaqmi kallpachakunanchis?

²⁰ Jehová Diosqa ancha allinpaqmi qhawarin payta yupaychananchispaq huñunakuykunapi takisqanchistaqa. Chaymi tukuy sonqomanta takinanchis sonqonta kusichinanchispaq. Allin takiqña kanchis otaq chayllaraq yachashaq chaypas, takisunpuni Jehová Diosmanqa (Sal. 104:33).

[Uranpi willakuykuna]

¿Imaynatan kutichisunman?

• ¿Imaynatan Biblia qhawarichin Diosta yupaychanapaq takikuna ancha importante kasqanta?

• Mateo 22:37 textopi nisqanta kasukuspa, ¿imaynatan Jehová Diosman takisun?

• ¿Imaynatan rikuchisunman Diosman takisqanchista ancha allinpaq qhawarisqanchista?

[Tapuykuna]

[23 paginapi foto]

¿Yachachishankichischu wawaykichista takina horasqa mana puriykachanapaqchu kasqanta?

[24 paginapi foto]

¿Ensayashankichu wasiykipi mosoq takikunata?