Wa Icam I Wuese Yehova!

“Me wa atsam me wuese Aôndo wam, sha ayange a m hire lu her ne.”—PS. 146:2.

1. Lu nyi i mgbegha Davidi u dughun atsam na agen a i nger ken takerada u Upasalmi laa?

 SHIGHE u Davidi lu iyev la, a vihi shighe kpishi u nengen sha ilev mbi ter na ken toho, ikyua a Betelehem. Yange una kuran iyôngo yô, a nenge a ityom i ageegh i Yehova a er yô: a nenge asan a cir sha kwavaôndo kpuluaa man “inyamtoho” kua “inyon i sha aôndo.” Kwagh u nenge a mi la bende a na kpishi, je yô, ishima mgbegha un u dughun atsam a kôron ken ishima tsung, sha u wuese Or u a gbe akaa a kpilighyol shon la. Atsam a Davidi dugh la kpishi nga ken takerada u Upasalmi. *—Ôr Pasalmi 8:3, 4, 7-9.

2. (a) Ityogholov mbia fatyô u benden a or nena? Tese ikyav. (b) Pasalmi 34:7, 8 man Pasalmi 139:2-8 tese se nyi sha kwagh u ikyar i Davidi ya vea Yehova laa?

² A shi nan kpa lu hen shighe la Davidi hingir or u fan atsam a wan man ityogholov mbi kuhwan tsema tsema ye. Yange fa atsam man  ityogholov dedoo, je yô, i yila un ér a za kuhwan molo sha ci u Tor Saulu. (Anz. 22:29) Ityogholov mbi Davidi la yange mbi na i pever tor iyol shighe u jijingi u bo a kenden ken a na yô, er nyian kpa ashighe kpishi ityogholov mbi dedoo ka mbi na i pever ior iyol nahan. Davidi yange una tôô ityogholough nav una gba kuhwan yô, “i yôhôr Saulu iyol, a zua a mmem” kpaa. (1 Sam. 16:23) Atsam a or u cian Aôndo, u fan atsam a wan man ityogholov mbi kuhwan shi dughun atsam la, nga a inja zan zan nyian. Hen ase sha kwagh ne! Shighe u i mar Davidi la anyom kar hegen hemba 3000, je kpa ior umiliôn imôngo mba mbamlu vev ve lu kwaghmôm ga shi ve lu sha ajiir kposo kposo sha tar cii yô, mba ôron upasalmi mba Davidi ayange ayange ér vea zua a ishimasurun man ishimaverenkeghen.—2 Kron. 7:6; Ôr Pasalmi 34:7, 8; 139:2-8; Amo. 6:5.

Ityogholov Mbi Kwagh u Icivirigh ken Mcivir u Mimi

3, 4. Yange i ver mba kuhwan ityogholov ken mcivir u mimi sha shighe u Davidi la nena?

³ Davidi yange lu a iyua i sha marami, shi a yar tom a iyua na shon sha gbenda u hemban doon cii, sha u wuese Yehova. Shighe u Davidi hingir tor u Iserael la, a ver ior sha u ve eren ityom kposo kposo ken tabernakel, man ityom la kua u kuhwan ityogholov mbi dedoo kpaa. Yange i tsua ior 4,000 ken Mbalevi 38,000, mba ve eren tom ken tempel la, ér ve “lu mba wuese,” iorov 288 ken a ve gema lu mba “i tese ve atsam a wan wuese TER,  . . ve fa dedoo” yô.—1 Kron. 23:3, 5; 25:7.

⁴ Atsam kpishi ken atsam a Mbalevi waan shi kuhwan ityogholov sha mi la lu Davidi iyol na dugh a ye. A shi nan kpa, hanma Oriserael u yange nana lu shighe u i lu wan upasalmi mba Davidi di tsô yô, kwagh u nan ongo la a kôr nan ken ishima tsung. Shighe kar yô, zum u i va a areki u ikyuryan ken Yerusalem la, “Davidi kaa mbahemenev mba Mbalevi er, ve̱ ver anmgbianev vev, mbawanatsam mbara, a ityogholov, mbaadiguve man umolo man ukwen, ve̱ kuhwan taver taver, ve̱ kende amo a iember.”—1 Kron. 15:16.

5, 6. (a) Er nan ve yange i ver ishima sha kwagh u ityogholov mbi kuhwan shighe u Davidi tema tor la kpishi yumu? (b) Er nan se fe ser ken tar u Iserael u tsuaa la, ityogholov lu kwagh u hange hange ken mcivir u i civir Aôndo laa?

⁵ Er nan ve yange i ver ishima sha kwagh u ityogholov mbi kuhwan sha shighe u Davidi la kpishi yumu? Lu sha ci u tor lu or u kuhwan ityogholov tseegh tsô shinii? Ei, ityôkyaa igen kpa lu, man i va pase i uderimbaanyomov imôngo ken hemen, shighe u Tor Hesekia hide nder ityom i i eren ken tempel la yô. I nger ken 2 Kroniku 29:25 ér: ‘A [ka Hesekia je la] ver Mbalevi ken iyou i TER a ukwen man mbaadiguve kua umolo sha imo i Davidi man i Gadi ornengenakaa u tor la, man i profeti Natan kpaa; gadia imo la due hen TER je, va hen uprofeti Nav ye.’

⁶ Mimi je, lu Yehova tese mbacivir un, u wuese un sha atsam, sha ikyev i uprofeti nav ye; je yô, mbawanatsam mba ve due ken kwe u upristi la cii lu u vea kera eren ityom i yange gba u Mbalevi mbagenev vea eren la ga, sha er vea zua a shighe kpishi u dughun atsam, shi alaghga je yô, karen iyol kpaa yô.—1 Kron. 9:33.

7, 8. Shighe u i we atsam a Tartor yô, kanyi kwagh ka a gba sha mi i hemba u fan a dedoo laa?

⁷ Alaghga u kaa wer, “Luun er ka sha u fan icam i wan yô, yange ma i wam ken mbawanatsam ken tabernakel mba ve fa dedoo la ga!” Kpa lu Mbalevi mbawan atsam cii yange ve fa a tsembelee ga. I pase ken 1 Kroniku 25:8 ér ‘mbahenen a hen’ kpa lu. Shi doo u se umbur ser alaghga mba kuhwan ityogholov man mbawanatsam, mba ve fa tsembelee yô yange vea lu ken ikwe i Iserael igen la, kpa lu Mbalevi Yehova na ve tom u kuhwan ityogholov ye. Se na jighjigh ser Mbalevi mbajighjigh “mba ve fa dedoo” mbara man ‘mbahenen a hen’ mbara cii, yange vea er tom u i na ve la sha afatyô ve cii.

⁸ Davidi yange soo ityogholov shi fa u kuhwan ityogholov kpaadedoo. Kpa ka iyua i sha  marami la tseegh kwagh a gbe Aôndo sha mi yee? Davidi nger ér: ‘Wa nen Un icam . . . , kuhwa nen dedoo, i̱ kaa kpishi.’ (Ps. 33:3) Kwaghôron la wanger, inja na yô: Ka u wuese Yehova sha afatyô wase cii la kwagh a gbe sha mi ye.

Tom u Ityogholov Shighe u Davidi Kpe Kera La

9. Pase kwagh u yange wea ze mtsegh u tempel shighe u Solomon tema tor la ve, alaghga ma u nenge shi ma u ungwa yô.

⁹ Shighe u Solomon tema tor la, ityogholov lu kwagh u vesen ken mcivir u mimi. Sha iyange i mtsegh u tempel la, mbawan atsam lu a ukwen man mbaadiguve kua umolo, shi mbatôngonikyor iorov 120 lu a ve imôngo. (Ôr 2 Kroniku 5:12.) Bibilo kaa a vese ér “mbatôngonikyor [mba ve cii ve lu upristi la] man mbawanatsam lu imôngo cii, lu wan icam imo i môm, sha u wuese TER sughun Un, . . . Gadia A doo, gadia erdoo Na ngu gbem sha won.” Yange icam la ngi hiin u duen imo sha je maa “iyou iv a ibeenegh,” u tesen je ér Yehova lumun mcivir la. Yange a sagher iyol shi ihindi kpa ia ta iyol u ungwan er ikyor la cica cii lu kaan imo sha ikyenge i môm vea ior udubu udubu mba ve lu wan atsam la kpen kpen!—2 Kron. 5:13.

10, 11. Kanyi i tese ér Mbakristu mba sha derianyom u hiihii la yange ve civir Aôndo a atsam a wana?

¹⁰ Mbakristu mba sha derianyom u hiihii la kpa yange ve civir Aôndo sha atsam a wan. Ka mimi, mbacivir Aôndo mba sha derianyom u hiihii mbara yange ve kohol ken utabernakel shin ken utempel ga, lu ken uya mbaiorov ve kohol ye. Ashighe kpishi ve kohol imôngo ken mkpeyol ga, sha ci u mtev u sha ican kua atôakyaa agen. Nahan cii kpa, Mbakristu mbara wuese Aôndo sha atsam a wan.

¹¹ Apostoli Paulu yange wa anmgbianev nav, Mbakristu mba ken Kolose kwagh ér: “Waan nen ayol a en kwagh sha . . . upasalmi man atsam man gberen nen amo a ken jijingi, sughun nen Aôndo ken asema a en.” (Kol. 3:16) Zum u i wuhe Paulu man Shila ken gaadi la, ve va hii u “eren msen, wan atsam a civir Aôndo,” shin er ve lu a takerada u atsam, u vea nengen ker ga nahan kpaa. (Aer. 16:25) Aluer i wuhe u ken purusu a takerada u atsam shio nahan, ka atsam a ase a Tartor a me u fatyô u wana?

12. Se tese iwuese sha atsam a ase a Tartor la nena?

¹² Er ityogholov man atsam a lu kwagh u vesen ken mcivir u se civir Aôndo la yô, doo u se pine ayol a ase ser: ‘M tesen iwuese sha atsam kpa? M nôngon sha afatyô wam cii mer me zaan mbamkombo man mbamkohol mba kiriki man mba vesen sha shighe, sha er me wa icam i hiin la vea anmgbianev av mba nomso man mba kasev kpa, man ka mea waan icam nahan, m we i sagher sagher kpa? M we mbayev av kwagh mer ve de nengen ér shighe u wan icam i hiin Mkombo u Henen Tomshiren zum u i bee Makeranta u Henen Tom u Hemen u Aôndo la, shin shighe u wan icam i hiin Iyoukura i Henen zum u i ne kwaghôron u ken igbar i bee la ka shighe u vea tôô ér ka ian i ahumbe, i vea gba moughon sha mkam vem ma teman tsô, vea nalegh angahar shin vea er ma kwagh ugen ga kpa?’ Atsam a wan ka gbaa u mcivir wase. Sha nahan yô, sea lu ‘mbafan dedoo’ shin sea lu ‘mbahenen a hen’ kpa, se cii se fatyô u wan icam, man doo u se zua akenge sha u wuese Yehova kpaa.—Nenge 2 Kor. 8:12.

Shighe Ka Una Karen Yô, Mbamgbe Asev Ve Gema

13, 14. Er nan ve i lu a inja kpishi u wan atsam a ishima i môm shighe u i nyer mbamkombo mba tiônnongoo? Tese ikyav.

¹³ Iyoukura i yange i yilan ér Zion’s Watch Tower la i pase ityôkyaa i môm i i ne ve atsam a ase a Tartor a lu a inja kpishi yô hemba anyom 100 hegen. I̱ kaa ér: “Atsam a wan sha kwagh u mimi la ka gbenda u injaa, u mimi una nyôr ior mba Aôndo ken ishima yô.” Asember kpishi ken atsam a ase la har sha avur a ken Ruamabera, nahan u se tsuan atsam agen, henen asember a ker la tseegh kpa ka gbenda u dedoo, u se na mimi una shiishi se ken asema yô. Ashighe kpishi Ior ka vea va mbamkombo asev  kwa u hiihii yô, atsam a tiônnongo ngu a wa a ishima i môm la ka a kôr ve ken ishima tsung.

¹⁴ Ken inyom i 1869 la, C. T. Russell kur tom sha iyange igen aikighe, ngur hiden sha gbenda yô, a ta ato a ungwa i lu wan atsam ken iyou igen. Sha ayange la, Russell hunde ishima sha kwagh u keren mimi sha kwagh u Aôndo. Nahan a ver ishima sha kpenga u eren; lu henen ér aluer un hingir ornyar yô, a̱ hemba un u wasen ior sha u ve fa mimi sha kwagh u Aôndo kpa, ugbayol vev di tsô yô, una nenge sha mi. Anmgbian Russell nyer ken iyou i ihyuundu cinge ker kpishi shi i hôugh ker la yô, a nenge lu adua i nyôr her ye. Maa a tema a ungwa. Shighe kar yô, Russell va nger ér “sha iwasen i Aôndo yô,” kwagh u yange [un] ungwa hen tugh mbura “tseegh kpa hide taver jighjigh u vande nan ér ka Aôndo a ne i nger Bibilo, kpa jighjigh shon ndôhôr la.” Fa wer lu atsam a Anmgbian Russell ungwa i lu wan la yange hii urugh un ve za mkombo la ye.

15. Ka akaa a nyi nahan i seer zuan a mkav sha mi ve yange i nenge doo u a nyôôso akaa ken takerada u atsam laa?

¹⁵ Shighe ka una karen yô, se nyôôso mkav wase u ken Ruamabera. Anzaakaa 4:18 kaa ér: “Gbenda u orperapera ngu er iwanger i sha use nahan, ngi seer a seer zan hemen zan zan mkende u iyange sha sha tembe.” Aluer se seer zuan a iwanger man se hide se nyôôso mbampase asev yô, akaa a se ser la aa bende a asember a ken atsam ase kpee. Ken anyom 25 a a kar ne, Mbashiada mba Yehova mba ken ityar kpishi lu wan atsam a ken takerada wase u atsam, u i yer ér Sing Praises to Jehovah la. * Hii shighe u i gber takerada la je, iwanger ngi seer tan sha atôakaa kpishi, nahan asember agen a i nger ken takerada u atsam la hingir akaa a tse. U tesen ikyav yô, se mba kera er kwagh u a “paase” iti i Yehova iyol ga, kpa ka se ôr kwagh u a “tsegha” iti i Yehova. Er kwagh ne a bende a atesen a Bibilo yô, gba u se nyôôso akaa ken takerada wase u atsam.

16. Takerada wase u atsam u he ne ua wase se u dondon kwaghwan u Paulu u i nger ken Mbaefese 5:19 la nena?

¹⁶ Sha ci u ityôkyaa la man atôakyaa agen yô, Mbahemenev mba Shin Tine na ian ér i gber takerada u atsam u he, u i yer ér Sing to Jehovah la. Atsam nga ken takerada wase u atsam u he ne 135 tseegh. Er atsam a henen a kera lu kpishi ga yô, se fatyô u henen asember a ken atsam a he la je kpaa. Kwagh ne zua sha kwaghwan u Paulu u i nger ken Mbaefese 5:19 la.—Ôr.

U Fatyô u Tesen Iwuese sha Atsam

17. Ka mhen u nyi se lu a mi ken ishima ve se kera de ser mcie u cian ihyeen a yange se u wan atsam ken mbamkombo asev mba Mbakristu ga?

¹⁷ Doo u se cia ihyeen, nahan i̱ hemba se u wan atsam ken mbamkombo asev mba Mbakristuu? Hen ase yôô: “Se cii se mba nenge gbev sha akaa kpishi” shighe u ka sea lamen a ior la gaa? (Yak. 3:2) Nahan cii kpa, se mba den ser gbev mbu se nenge ken kwaghôron wase la mbu yange se u wuese Yehova sha uya uya ga. Nahan a er nan ve se de ser akenge a ase a wan  icam, a a doo i kom ga la a yange se u wan atsam wuese Aôndoo? Ka i doo Yehova, u a “er or zwa” la u ungwan atsam a wuese un, a se we sha akenge a ase la.—Eks. 4:11.

18. Tese igbenda i u fatyô u henen asember a atsam yô.

¹⁸ Icer i CD i i yer ér Sing to Jehovah—Vocal Renditions la ngi ken ijô kpishi. I wa atsam a he la i kuhwa ityogholov sha a tsembelee. Gbenda u i koho ityogholov mbin la doo u ungwan kpen kpen. Ungwan icer ne hanma shighe cii; u eren nahan yô, u ngôôr fan asember a atsam agen ken atsam a ase a he la ga. I dugh asember a atsam ne kpishi sha gbenda u ú waan hwange u hiihii la je maa, u nôngo u fan er u wa hwange u u dondo la yô. Sha nahan yô, zum u u we icer i CD la i lu gberen yô, dondo i sha u wan atsam la. Aluer u vande fan asember a atsam ne kua ityogholov mbi i koho sha mi la ken ya tsembelee yô, u fatyô u wan a ken Iyou i Tartor vangertiôr.

19. Kanyi tom ka i er sha u kuhwan ityogholov sha atsam a ase a Tartor laa?

¹⁹ Aluer se kôr ityough ga yô, se ngôôr hungur a kwagh u ityogholov mbi ka se dondo sha u wan atsam shighe u se ze sema mkohol wase u iyange i môm shin mbamkohol asev mba kiriki shin mba vesen la ga. Tom u ka i er sha u kuhwan ityogholov mbira ka zege tom je gande. Ka a tsuan atsam man ityogholov mbi a kuhwa la a been cii yô, i hide i nger gbenda u a kuhwa mbi la shin inya keve keve, sha u iorov 64 mba ve koho atsam a Watchtower la ve kuhwa yô. Nahan i gema i tôô mba kuhwan ityogholov mbara gôgô shighe u timen ken ngeren u vea kar iyol sha mi la, vea been yô, ve za mase kuran ken tser hen ijiir yase i kuran akaa, i i lu ken Patterson, ken New York la. Iorov pue ken anmgbianev mba nomso man mba kasev mba ve kuhwan atsam ne mba ken tar u Amerika ga. Ve cii ve nenge ér ian i ve lu a mi i kuhwan ityogholov mbi dedoo sha ci u mbamkombo asev mba civir Aôndo la ka i icivirigh. Doo u se tese iwuese sha tom u ve lu eren sha dooshima ne. Zum u orkyôn nan kaa a vese ér se tema inya se ungwa ityogholov shighe u ze mbamkohol asev mba kiriki shin mba vesen yô, se tema nen sha mkam asem tsuaa shi se kegh ato se ungwa ityogholov mbi i koho mbi sha dooshima la.

20. U kange ishima wer u er nyi?

²⁰ Yehova ongo atsam a wuese un a se we la. Nga un a inja. Se na i saan un iyol sha u wan un atsam a ishima yase i môm shighe u se kohol sha u civir un yô. Mimi je, sea lu mbafan dedoo shin mbahenen a hen kpa, de se “wa TER icam.”—Ps. 104:33.

[Ngeren mba shin kpe]

Ú Nenge Nena?

• Ka akav a sha ayange a tsuaa la a nyi, a tese ér atsam man ityogholov ka kwagh u vesen ken mcivir wasa?

• U nenge wer u dondon tindi u Yesu u i nger ken Mateu 22:37 la zua sha u wan atsam a ase a Tartor la a ishima i môm nena?

• Ka sha igbenda i nyi nahan se fatyô u tesen iwuese sha atsam a ase a Tartor laa?

[Mbampin mba ngeren u henen]

[Foto u sha peeji 23]

U we mbayev ou kwagh wer ve de gbe undun ijiir ve i teman shighe u i we icam ga kpa?

[Foto u sha peeji 24]

U henen asember a atsam a ase a he ne ken ya kpa?