Yihoowayyo Yexxite!

“Taani de7⁠ido keenan ubban ta Xoossaa sabbana.” —MAZ. 146:2.

1. Yelaga Daawiti ba mazamuretuppe amaridaageeta giigissanaadan denttettiday aybee?

DAAWITI yelagatetta wodiyan, Beetaliheeme matan ba aawaa dorssaa wudiyaa daro saatiyau heemmees. I dorssaa heemmiiddi, Yihooway medhido maalaalissiyaabaa: xoolinttee kumido saluwaa, “sa7aa do7atanne saluwaa kafota” beˈana danddayees. I beˈidobay wozanappe denttettin, he maalaalissiyaabaa Medhidaagaa sabbanau ufayssiya mazamuriyaa giigissiis. Daawiti giigissido mazamuretuppe daroti Mazamure maxaafan deˈoosona. *—Mazamure 8:3, 4, 7-9 nabbaba.

2. (a) Muuziqay issi ura waatana danddayii? Leemisuwaa yoota. (b) Mazamure 34:7, 8⁠ppenne Mazamure 139:2-8⁠ppe Daawitau Yihoowaara deˈiya dabbotaabaa ay akeekana danddayiyoo?

 ² Daawiti ba deˈo layttan yexxiyoogaa loyttidi meezetidoy he wode milatees. I qara yettancha gidido gishshau, Kawuwaa Saaˈoolau diittaa diixxanaadan shoobettiis. (Lee. 22:29) Loˈˈo muuziqay ha wodiyankka darotoo asaa woppissiyoogaadan, Daawita muuziqay unˈˈettida kawuwaa woppissiis. Daawiti ba diittaa diixxiyo wode ubban “Saa7⁠oolayyo keheesinne i paxees.” (1 Sam. 16:23) Xoossau yayyiya he yettanchaynne mazamuriyaa xaafee giigissido mazamuree hanno gakkanaashinkka maaddees. Ane hagaa qoppa! Ha wodiyan, Daawiti yelettoosappe 3,000 layttaappe dariya wodee aadhi simmin, dumma dumma hanotan diccidanne alamiyan ubbasan deˈiya, miilooniyan qoodettiya asay minttettuwaanne hidootaa koyidi Daawita mazamuriyaa ubbatoo nabbabees.—2 Odi. 7:6; Mazamure 34:7, 8; 139:2-8 nabbaba; Amo. 6:5.

Tumu Goynuwan Mazamuriyau Deˈiya Xoqqa Sohuwaa

3, 4. Daawita wode Xoossau mazamuriyaa yexxanau hanotay waanidi giigidee?

³ Daawiti gooba erancha. I bau deˈiya eraa goˈettanau danddayiyo ubbaappe aadhiya ogiyan, giishin Yihoowa bonchanau goˈettiis. Daawiti Israaˈeele kawo gidi simmidi, ufayssiya muuziqaa gujjin gayttiyo dunkkaaniyaa oosuwaa giigissiis. Beetamaqidasiyan oottiya Leewatu ubbaappe tammaappe issi kushe gidiyaageeti, giishin 4,000 gidiyaageeti “GODAA galatiyaageeta” gididi oottoosona; eta giddoppe 288⁠ti ‘daro eray deˈiyo, yettan loohidaageeta.’—1 Odi. 23:3, 5; 25:7.

⁴ Leewati yexxido daro mazamuriyaa Daawiti giigissiis. Daawita Mazamuree yexettiyo wode he sohuwan beettida Israaˈeele asa ubbaa wozanaa siyido mazamuree keehippe denttettidoogee sirissenna. Guyyeppe maachaa taabootay Yerusalaame yiido wode, “Diittaanne maazinqqiyaa diixxiiddi, daalaa qaattiiddi, ufaissiya yettaa yexxana mala, Leewata kaalettiyaageeti bantta dabbota sunttanaadan Daawiti azaziis.”—1 Odi. 15:16.

5, 6. (a) Daawita haaruwaa wode muuziqaa keehippe xoqqu oottidi xeellidoy aybissee? (b) Beni Israaˈeelen goynuwan muuziqaa xoqqu oottidi xeellidoogaa waatidi eriyoo?

⁵ Daawita wode muuziqaa keehi xoqqu oottidi xeellidoy aybissee? Hegaadan hanidoy kawoy yettancha gidiyo gishsha xalaalaanee? Gidenna; hegau hara gaasoy deˈees; daro xeetu layttaappe simmin suure Kawuwaa Hizqqiyaasi beetamaqidasiyaa oosuwaa zaarettidi giigissido wode hegee qoncciis. Naaˈˈantto Hanidabaa Odiya 29:25y hagaadan gees: “GODAI kawuwaassi hiraagiya Gaada baggaaranne hananabaa yootiya Naataana baggaara Kawuwaa Daawita azazido azazuwaa Hizqqiyaasi kaallidi, Leewata daalaa, diittaanne maazinqqiyaa oittidi, GODAA Beeta Maqidasiyan essiis.”

⁶ Ee, Yihooway baassi goynniyaageeti mazamuriyan bana sabbanaadan hananabaa yootiyaageetu baggaara azaziis. Mazamuriyaa yexxiya qeese yarati, mazamuriyaa giigissanaunne geella meezetanaukka gidiya wodiyaa demmanaadan, hara Leewati oottiyo oosuwaa oottokkona.—1 Odi. 9:33.

7, 8. Kawotettaa mazamuriyaa yexxiyo wode gooba yettancha gidiyoogaappe aaruwan koshshiyaabay aybee?

⁷ “Mazamuriyaa yexxiyoogaa xeelliyaagan gayttiyo dunkkaaniyan yexxiya, loohida asatu mala gidanau taani mule danddayikke!” gaana danddayaasa. SHin Leewati ubbay yettaa loytti eriyaageeta gidokkona. Koyro Hanidabaa Odiya 25:8y bessiyoogaadan, ‘tamaariyaageetikka’ deˈoosona. Leewa zare gidenna Israaˈeeletu giddon keehi gooba yettancha gididaageeti deˈennan aggokkona, shin mazamuriyaa yexxanaadan Yihooway dooridoy Leewata. Loyttidi eriyaageeta gidin woy tamaariyaageeta gidin, ammanettida ubba Leewati bantta oosuwaa wozanappe oottidoogee qoncce.

⁸ Daawiti muuziqaa doseesinne yettankka gooba. SHin Xoossay xoqqu oottidi xeelliyoy  gooba gidiyoogaa xallee? Mazamure 33:3n, Daawiti, “Loitti diixxiiddi, qaalaa xoqqissidi yexxite” yaagidi xaafiis. Ha qofay qoncce: Koshshiyaabay Yihoowa “loitti” sabbiyoogaa.

Daawita Wodiyaappe Simmin Mazamuriyau Deˈiya Xoqqa Sohuwaa

9. Solomona haaruwaa wode beetamaqidasee anjjettiyoode neeni yan deˈidaba gidiyaakko, ay siyanaakkonne beˈanaakko qonccissa.

⁹ Solomona haaruwaa wode, tumu goynuwan mazamuriyau xoqqa sohoy deˈees. Beetamaqidasee anjjettiyo wode, xurumbbaa punniya 120⁠ta gujjin, keehi daro yetta miishshaa ajaban yexxiya, daro yettanchati deˈoosona. (2 Odiya 5:12 nabbaba.) Yexxiyaageetinne ubbaykka qeese gidida xurumbbaa punniyaageeti, “‘GODAI keha! Aggenna a siiqoi merinaagaa’ yaagidi GODAA sabbidosona” yaagidi Geeshsha Maxaafay yootees. He ufayssiya cenggurssay siyettosaara, Yihooway ufayttidoogaa bessiya “shaarai GODAA Beeta Maqidasiyaa kumiis.” Xurumbbaa punniyaageetunne shaˈan qoodettiya yexxiyaageetu ubbaa cenggurssaa issippe siyiyoogee keehippe ufayssiyaaba!—2 Odi. 5:13.

10, 11. Beni Kiristtaaneti goynuwan mazamuriyaa goˈettidoogaa bessiyay aybee?

¹⁰ Beni Kiristtaanetikka goynuwan mazamuriyaa goˈettidosona. Koyro xeetu layttan Xoossaayyo goynniyaageeti issippe shiiqiyoy gayttiyo dunkkaaniyaana woy beetamaqidasiyaana gidennan, buzo keettaana. Yedetaanne hara metuwaa gaasuwan, darotoo eti shiiqiyo sohoy injjetenna. Gidikkokka, he Kiristtaaneti Xoossaa mazamuriyan sabbidosona.

¹¹ Kiitettida PHauloosi Qolasiyaasan deˈiya ba mala Kiristtaaneta, “Issoi issuwaa zorite; . . . Xoossaa galatiiddi, xalotiyaanne mazamuriyaa, Xoossaa sunttaa xoqqu oottiya yettaa yexxite” yaagidi minttettiis. (Qol. 3:16) PHauloosinne Sillaasi qashettido wode, etau mazamure maxaafay baynnaba gidikkonne, “Xoossaa woossiiddi, mazamuriyaa yettan Xoossaa” galatiyoogaa doommidosona. (Oos. 16:25) Neeni qashettiyaaba gidiyaakko, hassayada Kawotettaa mazamuriyaappe ay keenaa yexxana danddayay?

12. Nuuni Kawotettaa mazamuriyaa xoqqu oottidi xeelliyoogaa waatidi bessana danddayiyoo?

¹² Nu goynuwan mazamuriyau xoqqa sohoy deˈiyo gishshau, nuna kaallidi deˈiyaagaadan oychana koshshees: ‘Taani mazamuriyaa xoqqu oottada xeelliyaanaa? Ta ishatuuranne michotuura doometta mazamuriyaa yexxanau gubaaˈiyaa shiiqotanne gita shiiqota wodiyan gakkanau tau danddayettidabaa oottiyaanaa, qassi wozanappe yexxiyaanaa? Tiˈokiraase Haggaazo Timirtte Keettaa shiiquwaappenne Haggaazo SHiiquwaappe gidduwan woy dere haasayaappenne Wochiyo Keelaa xinaatiyaappe gidduwan yexxiyo mazamuriyaa ta naati koshshennan uttosaappe geella gede birshshanau qaaxerettiyo injjedan xeellennaadan minttettiyaanaa? Nuuni goynniyo ogiyaappe issoy mazamuriyaa yexxiyoogaa. Ee, ‘loyttidi eriyaageeta’ gidin ‘tamaariyaageeta’ gidin, nuuni ubbay Yihoowa sabbanau issippe yexxana danddayoos; qassi hegaadan oottana koshshees.—2 Qoronttoosa 8:12⁠ra gatta xeella.

Wodee Laamettiyoode Nuussi Koshshiyaabaykka Laamettees

13, 14. Gubaaˈe shiiquwaa wode wozanappe yexxiyoogee maaddiyoy aybissee? Leemisuwaa yoota.

¹³Xiyoone Wochiyo Keelay 100⁠ppe dariya layttappe kase, nu mazamuree keehippe koshshiyo gaasuwaappe issuwaa qonccissiis. He maxeetee, “Tumaabaa yexxiyoogee Xoossaa asay bantta qofaaninne wozanan hegaa wottiyo loˈˈo oge” yaagiis. Nu mazamuretuppe darotu danttoti Geeshsha Maxaafaappe ekettidaageeta; yaatiyo gishshau, guuxxiis giishin issi issi mazamureta xannaˈiyoogee tumaa nu wozanan wottanau keehippe maaddana danddayees. Gubaaˈiyan mazamuriyaa wozanappe yexxiyoogee, nu shiiquwaa koyro yiyaageeta darotoo keehippe denttettees.

 ¹⁴ CHarles Tez Raasili 1869n, issi galla omarssi ooso keettaappe soo simmiiddi, issi pooqe keettau garssa baggan deˈiya issi addaraashan mazamuriyaa yexxiyoogaa siyiis. He wode, Xoossaabaa tumaa mule erana danddayennabadan au siyettiis. Yaatiyo gishshau, asay Xoossaabaa tumaa eranaadan maaddana danddayennaba gidikkokka, miishsha demmikko aquwaaban gidikkonne maaddana giidi ba oosuwaa minnidi oottanau qofaa qachiis. Ishaa Raasili baanattiyaanne xuma gidida he addaraashaa geliyo wode, haymaanooteera gayttidabay yan oosettiiddi deˈees. I uttidi ezggiis. He omarssi i siyidobay, “Xoossay maaddin, Geeshsha Maxaafay Xoossaa ayyaanaa kaaletuwan xaafettidoogaa xeelliyaagan shuggida [ba] ammanuwaa minttanau” maaddidoogaa guyyeppe xaafiis. Ishaa Raasili he shiiquwan beettanaadan koyro denttettiday mazamuriyaa gidiyoogaa akeeka.

15. Nuuni akeekiyooban pooˈoy gujjido ayba hanotay, mazamure maxaafan issi issibaa giigissanaadan oottidee?

¹⁵ Geeshsha Maxaafaa nuuni akeekiyo hanotay aqi peeˈidi laamettiis. Leemiso 4:18y, “Xillotu ogee gallassai seetana gakkanaashin, gujji gujji poo7⁠iya maallado xalqqiyaa mala” yaagees. Gujji gujji biya pooˈoy nuuni tumaabaa yexxiyo hanotan issi issibaa giigissanaadan denttettiis. Daro biittatun deˈiya Yihoowa Markkati aadhida 25 layttau, Yihoowa Mazamuriyan Sabbite yaagiya mazamure maxaafaa goˈettiiddi takkidosona. * He maxaafay giigido wodiyaappe doommidi daro yohotun pooˈoy gujji gujji biis; qassi he mazamure maxaafan goˈettido amarida qofay haˈˈi wodee aadhiichidoba gidiis. Leemisuwau, Inggilizetto mazamure maxaafay kaseegee ‘ooratta alamiyaa’ giyaagaa ‘ooratta siraataa’ gees. Qassi Yihoowa sunttay ‘geeshsha gidees’ goosippe attin he sunttay ‘bessiyaagaa gidiyoogee qonccees’ gookko. Geeshsha Maxaafaa baaso timirttiyaara gayttidaagan he mazamure maxaafan issi issibaa giigissana koshshiis.

16. Efisoona 5:19n deˈiya PHauloosa zoriyaa nuuni kaallanaadan ooratta mazamure maxaafay waatidi maaddii?

¹⁶ Hageetuppenne hara gaasotuppe denddidaagan, Bollaara Heemmiyaagee Yihoowayyo Yexxite yaagiya ooratta mazamure maxaafay giiganaadan oottiis. Ooratta mazamure maxaafan deˈiya mazamuretu qooday issi issi doonan 55. Tamaarana guutta mazamureti deˈiyo gishshau, ooratta mazamuretuppe guuxxiis giishin amaridaageetu danttota nuuyyo danddayettida keenan hassayana koshshees. Hegee Efisoona 5:19n (Nabbaba) deˈiya PHauloosa zoriyaara moggiyaaba.

Nashshiyoogaa Bessana Danddayaasa

17. Nuuni gubaaˈiyan mazamuriyaa yexxiyoogaa xeelliyaagan yayyiyoogaa woy yeellatiyoogaa agganaadan maaddana danddayiya qofay awugee?

¹⁷ Nuuni yayyiyoogee woy yeellatiyoogee Kiristtaane shiiqotun cenggurssaa xoqqu oottidi  yexxennaadan diggana koshshii? Hanotaa kaallidi deˈiyaagaadan qoppa: Haasayiyoobaa xeelliyaagan “nuuni ubbaikka daroban baleettees” yaagiyaagee tuma gidennee? (Yaaq. 3:2) SHin, nuuni haasayan baliyaageeta gidiyoogee sooppe soo biidi Yihoowa sabbiyoogaa digganaadan oottokko. Yaatin, nuuni yexxiiddi baliyaageeta gidiyoogee Xoossaa mazamuriyan sabbennaadan diggana koshshii? Yihooway, “asaassi doonaa medhdhidaagee” nuuni mazamuriyan a sabbiyo wode siyanau ufayttees.—Kes. 4:11.

18. Daro ishatinne michoti ooratta mazamureta eranaadan aybi maaddidee?

¹⁸ Piyaanuwaa cenggurssan giigida, Yihoowayyo Yexxite yaagiya siidee ooratta mazamureta eranau daro ishatanne michota maaddiis. Piyaanuwan giigida mazamuriyaa ezggiyoogee keehippe ufayssees. Intte son darotoo hegaa ezggiyaabanne mazamure maxaafaa oyqqidi kaalliyaaba gidikko, danttota eranaadan maaddees; qassi Kawotettaa Addaraashan yayyennan yexxanaadan oottees.

19. Kawotettaa mazamureta daro yetta miishshaa ajaban giigissiyo wode oosettiyaabay aybee?

¹⁹ Nuuni dumma shiiqo gallassan, qassi woradaanne awuraajjaa shiiquwaa wode yexxiyo, muuziqa miishshan giigida mazamureta nashshennan aggana danddayoos. He mazamureta giigissanau darobay oosettiis. Mazamureti dooretti simmin, Wachitawer dirijjitiyan, daro yetta miishshaa ajaban kaaˈiya, 64 asatussi muuziqay akeekan xaafettana bessees. He asati meezetana mala daro saatiyau zaarettoosona; yaatin, wurssettan Niyoorkke kataman Patersenen deˈiya cenggurssaa duuqqiyo kifiliyan duuqettees. He ishatuppenne michotuppe tammati deˈiyoy Amarkkaana gidenna. Xoossaa oosuwau giigissiyo he ufayssiya muuziqaa kaaˈiyoogaa eti ubbay xoqqu oottidi xeelloosona. Eti siiquwan minnidi oottiyoobaa nashshiyoogaa bessana danddayoos. Gita shiiqotun liqambbaree nu sohuwan uttanaadan shoobbiyo wode, sohuwaara uttidi ufayssiya hanotan giigida he muuziqaa wozanappe ezggiyaageeta gidoos.

20. Neeni ay oottanau murttadii?

²⁰ Nuuni a sabbanau yexxiyoogaa Yihooway akeekan ezggees. He mazamureta i xoqqu oottidi xeellees. Nuuni goynuwau shiiqiyo wode ubban, nu kumetta wozanaappe cenggurssaa xoqqu oottidi yexxiyoogan a ufayssiyaageeta gidana danddayoos. Ee, nuuni loytti eriyaageeta gidin tamaariyaageeta gidin, Yihoowayyo ‘yexxiyaageeta’ gidoos!—Maz. 104:33.

[Footnotes]

Woygada Zaaruutii?

• Mazamuree nu goynuwan keehippe xoqqu oottidi xeelliyooba gidiyoogaa bessiya, Geeshsha Maxaafan deˈiya leemisoti awugeetee?

• Yesuusi Maatiyoosa 22:37n yootidobaa azazettiyoogaanne Kawotettaa mazamureta wozanappe yexxiyoogaa giddon ayba gaytotettay deˈiyoogaa akeekay?

• Kawotettaa mazamureta nuuni nashshiyoogaa bessana danddayiyo issi issi ogeti awugeetee?

[Oyshata]

[Sinttaa 25n deʼiya misiliyaa]

Mazamuree yexettiyo wode ne naati koshshennan uttosaappe denddidi beennaadan minttettay?

[Sinttaa 26n deʼiya misiliyaa]

Ooratta mazamuriyaa danttota son meezetay?