Guidúʼndanu para Jiobá

«Zuundaʼ salmo para Dios biaʼ dxi nabaneʼ.» (SAL. 146:2)

1. Xi bicaa David, hombrehuiiniʼ que gucaa caadxi salmo.

 ¡STALE ora nga gudiʼdiʼ David dxi nahuiiniʼ ra cayapa ca dendxuʼ stiʼ bixhoze gaxha de Belén! Laga cayápabe ca dendxuʼ que guleebe tiempu para guyadxibe ca beleguí ni cá guibáʼ, «ca maniʼ guiʼxhiʼ», «ca maniʼ ripapa guibáʼ» ne xcaadxi cosa sicarú ni bizáʼ Dios. Guiráʼ ni biiyabe que bicaa ni laabe quixhe chaahuibe caadxi diidxaʼ riuundaʼ ni biree de ndaaniʼ ladxidoʼbe para gusisácabe Jiobá, ni bizáʼ guiráʼ cosa sicarú. Ca dxi stinu riʼ, ridxélanu stale de ca diidxaʼ riuundaʼ ca lu libru stiʼ Salmo. Biblia na: «Ora guuyaʼ guibáʼ stiluʼ, ca dxiiñaʼ ni bizáʼ ca bicuini naluʼ, beeu ne ca beleguí ni bizaʼluʼ, tuu nga binni guidxilayú para guietenalaʼdxuʼ laa, ne tuu nga xiiñiʼ binni guidxilayú para gápaluʼ laa yaʼ» (Salmo 8:3, 4). a

2. 1) Xi runi sentir binni ora rucaadiaga saa. Bizeeteʼ ti ejemplu. 2) Ximodo rusihuinni ca salmo ca pabiáʼ gaxha guyuu David de Jiobá.

² Zándaca tiempu que nga biziidiʼ chaahuiʼ  David guxhidxi ca saa que. Guizáʼ galán modo bixhídxibe arpa dede guca invitarbe guxhídxibe saa para rey Saúl (Pro. 22:29). Saa sicarú ruxhidxi David que riguixhedxini ladxidóʼ rey que, ne zacaca nga runi sentir binni yanna ora gucaadiaga xiixa saa sicarú. Ora ruxhidxi David arpa que «ratadxí ladxidóʼ Saúl ne runi sentir galán» (1 Sam. 16:23). Ca diidxaʼ riuundaʼ ni gudixhe chaahuiʼ David, hombre ridxibi Dios que, dede yanna rietenaláʼdxiruʼ binni de laacani neca maʼ gudiʼdiʼ stale tiempu. Dede ca dxi stinu riʼ, chonna mil iza despué de gule David, millón de binni pobre o ricu, ni nabeza lu guidubi Guidxilayú nabé riuuláʼdxicaʼ gúʼndacaʼ ca salmo bicaa David para quixhedxini ladxidoʼcaʼ, ne gánnacaʼ zanda gaca chaahuiʼ xiixa ni cayácacaʼ. Biblia na: «Ángel stiʼ Jiobá naguu leʼ cani ridxibi laabe, ne rulabe laacaʼ. Lagudii cuenta ne laguuyaʼ pabiáʼ nachaʼhuiʼ Jiobá; nayecheʼ nga riuu hombre ni nadipaʼ ni guyubi laabe para gápabe laa» (Salmo 34:7, 8; 2 Cró. 7:6; Amós 6:5).

Risaca nga guidúʼndanu ora runi adorarnu Dios

3, 4. Xi gudixhe David gaca para xhidxi saa ora gaca adorar Jiobá.

³ David biquiiñeʼ guiráʼ gracia gupa para gusisaca Jiobá. Ne ora gúcabe rey stiʼ Israel, gudíxhebe chuʼ binni guxhidxi saa sicarú ndaaniʼ tabernáculo que. Lade 4,000 levita ni cayuni dxiiñaʼ que, bibí caadxi para «gusisaca Jiobá». De ládecabe, 288 de laacabe «biziidiʼ guʼndaʼ para Jiobá, guirácabe guizáʼ nánnacabe gúʼndacabe» (1 Cró. 23:3, 5; 25:7).

⁴ Stale de ca salmo bicaa David que nga cani bixhidxi ca levita que. Para ca israelita que risaca nga chuʼcaʼ ora maʼ caxidxi ca saa que purtiʼ rusiéchecani ladxidóʼcabe. Despué, ora bidxiña dxi chinécabe arca stiʼ pactu que ndaaniʼ guidxi Jerusalén, «David gudxi ca xaíque stiʼ ca levita que guzuhuaacaʼ ca bíʼchicaʼ ni ruundaʼ ne ca instrumentu ni ruxhídxicaʼ, ca instrumentu ni napa cuerda ne arpa ne címbalo, para guxhídxicaʼ nadipaʼ» ne zaqué «xhidxi ti saa ni rusiecheʼ binni» (1 Cró. 15:16).

5, 6. 1) Xiñee nabé bizaaláʼdxicabe xhidxi saa dxi guca David rey. 2) Ximodo nánnanu nabé bisaca para ca israelita que guxhídxicaʼ saa ora maʼ cayuni adorarcaʼ Dios.

⁵ Xiñee nabé guyuuláʼdxicabe diidxaʼ riuundaʼ ca dxi stiʼ David que yaʼ. Ñee purtiʼ si riuulaʼdxiʼ rey que guxhidxi saa la? Coʼ. Guyuu sti razón jma risaca, casi bihuínnini gudiʼdiʼ si stale siglu despué dxi guníʼ Ezequías gaca adorar Jiobá casi ante. Lu 2 Crónicas 29:25, ridúʼndanu xi biʼniʼ rey ni runi ni jneza que: «Bizuhuaabe ca levita ndaaniʼ lidxi Jiobá, para guxhídxicaʼ címbalo, ne cítara ne arpa, purtiʼ zacá biʼniʼ mandar David gácani ne Gad hombre ni ruuyaʼ visión stiʼ rey ca ne Natán, ni riguixhená que, ne purtiʼ zacá biʼniʼ mandar Jiobá cani riguixhená stiʼ guiniʼcaʼ gácani».

⁶ Casi maʼ bidúʼndanu ca, Jiobá gudxi cani riguixhená gabi ca xpínnibe gusisácacaʼ laabe ne diidxaʼ riuundaʼ. Ca levita ni ruundaʼ que la? qué ñúnicaʼ xcaadxi dxiiñaʼ ni biʼniʼ xcaadxi de laacaʼ. Xiñee yaʼ. Para gápacabe tiempu biaʼ caquiiñecabe para quixhe chaahuicabe ca saa que, ne zándaca dede para guni ensayárcabe (1 Cró. 9:33).

7, 8. Xii nga ni jma risaca ora maʼ cadúʼndanu saa stiʼ Reinu.

⁷ Yanna, zándaca na tuuxa: «Naa qué gannadiáʼ guundaʼ. Nannaʼ dxicheʼ qué liica nibícabe naa para ñuundaʼ lade cani nabé nanna guʼndaʼ ndaaniʼ tabernáculo que». Peru cadi guiaandaʼ laanu cadi guiráʼ diʼ ca levita ni ruxhidxi que nánnacaʼ. Lu 1 Crónicas 25:8 na guyuu ni caziidiʼ ládecabe. Ne zándaca guyuu xcaadxi hombre ni nanna guxhidxi saa ne guʼndaʼ lade xcaadxi tribu stiʼ Israel que, peru Jiobá gulí ca levita si para gúnicaʼ dxiiñaʼ que. Neca nácacabe maestru o deruʼ caziidicabe guxhídxicabe saa la? nanna dxíchinu de guidubi ladxidóʼ ca levita que biindacaʼ para Dios.

⁸ Neca gupa David gracia para guxhidxi saa ne riuuláʼdxibe gúnibe ni, cadi guiníʼ íquenu jma rusisaca Dios ca gracia ni napa binni para laani. Lu Colosenses. 3:23 na: «Irá ni guni tu la? laguni ni de idubi ladxidó to, casi ñaca xhiiña Señor cayuni tu, cadi xhiiña binni». Ndiʼ nga ni  cusiidiʼ textu ca laanu: ora gusisácanu Jiobá la? naquiiñeʼ gúninu stipa pur gúninu ni de guidubi ladxidoʼno.

Modo biquiiñecabe saa despué de David

9. Xi nidúʼyanu ne ñunadiáganu pa ñuʼnuʼ dxi biluxe yuʼduʼ ni bicuí Salomón que.

⁹ Tiempu biʼniʼ mandar Salomón nabé biquiiñecabe saa para biʼniʼ adorárcabe Dios ni dxandíʼ. Casi dxi biluxe yuʼduʼ que guyuu ti orquesta naroʼbaʼ, ne guyuu ti gayuaa gande binni ni bixhidxi trompeta (biindaʼ 2 Crónicas 5:12). Biblia na cani ruxhidxi trompeta que —guiracaʼ nácacaʼ ni ruzaaquiʼ guʼxhuʼ— ne cani ruundaʼ que, «tobi si ridxi bihuinni ora bizulú biindacabe para gusisácacabe Jiobá ne gudiicabe xquíxepeʼ laabe». Lu ca diidxaʼ riuundaʼ que riníʼcabe sicaríʼ: «Purtiʼ laabe nacháʼhuibe, purtiʼ qué rusaanabe de gannaxhiibe binni». Ora biluxe saa sicarú que «guyuu ti za» ndaaniʼ yoo stiʼ Jiobá que, ni bisihuinni guyuulaʼdxiʼ Jiobá ni bíʼnicabe que. ¡Nanna pabiáʼ nayecheʼ biʼniʼ sentir guiráʼ ca binni nuu raqué ora binadiágacaʼ guxidxi guiráʼ trompeta que ne tobi si modo biindaʼ guiráʼ ca hombre que! (2 Cró. 5:13.)

10, 11. Ximodo nánnanu biquiiñeʼ ca primé xpinni Cristu que saa ora biʼniʼ adorarcaʼ Jiobá.

¹⁰ Ca xpinni Cristu de primé siglu que laaca biquiiñecaʼ saa ora biʼniʼ adorarcaʼ Jiobá. Peru laacabe qué nidagulisaacabe ndaaniʼ yuʼduʼ o tabernáculo, sínuque bidagulisaacabe ralidxi binni. Ne stale biaje bíʼnicabe zacá neca guzananda binni laacabe o gúpacabe sti clase guendanagana. Neca zacá, qué nusaanacabe de nusisácacabe Jiobá né diidxaʼ riuundaʼ.

¹¹ Pablu gudxi ca xpinni Cristu de Colosas uguusaacaʼ gana laacaʼ ne «salmo ne himno ne cantu sti Dios» (Col. 3:16). Casi dxi biseguyoocabe laabe ne Silas, «caníʼ né cabe Dios ne cayuunda [...] cabe» para laa, neca qué gápacabe ti libru ra cá diidxaʼ riuundaʼ (Hech. 16:25). Pur ejemplu ni bíʼyanu de laacabe ca, cada tobi de laanu galán ninabadiidxaʼ laca laa: «Pa nuseguyoocabe naa, panda diidxaʼ riuundaʼ stiʼ Reinu ñanda ñuundaʼ de memoria yaʼ».

12. Ximodo rusihuínninu rusisácanu ca diidxaʼ riuundaʼ stiʼ Reinu.

¹² Cumu nabé risaca diidxaʼ riuundaʼ ca ora maʼ cayuni adorarnu Jiobá la? naquiiñeʼ guinabadiidxanu laca laanu: «Ñee rusisacaʼ ca diidxaʼ riuundaʼ ca la? Ñee runeʼ stipa para chindayaʼ tempranu ra raca ca guendaridagulisaa ni raca guiráʼ semana ne ca guendaridagulisaa roʼ ca para guundaniáʼ ca bicheʼ ne ca bizaʼnaʼ ora maʼ chiguzulú cani la? Ñee ruundaʼ né stale gana la? Ximodo ruuyaʼ familia stinneʼ ca diidxaʼ riuundaʼ ni rixidxi ora maʼ biluxe Scuela stiʼ cani Rucheeche Diidxaʼ ne ora ruzulú Guendaridagulisaa stiʼ Dxiiñaʼ Stinu, ora riluxe ti libana ne ora guzulú guiuundaʼ revista Torre stiʼ ni rapa. Ñee rusiideʼ ca xiiñeʼ cadi para guiasa diʼ binni lu banguʼ stiʼ ne guni xiixa cosa o para gusigaa ñee nga ora maʼ chixhidxi ca diidxaʼ riuundaʼ ca la? Qué chuʼ dxi guiaandaʼ laanu cayuni adorarnu Jiobá nga ora ridúʼndanu ca saa ca. Gastiʼ naca pa nánnaluʼ gúʼndaluʼ o pa deruʼ caziidiluʼ, naquiiñeʼ gúniluʼ ni. Guiranu zanda guidúʼndanu juntu para gusisácanu Jiobá (zanda gúʼndaluʼ 2 Corintios 8:12).

Ruchaa ni caquiiñeʼ binni ora maʼ zidiʼdiʼ iza

13, 14. Xiñee nabé risaca nga guidúʼndanu ne stale gana ra ridagulisaanu. Bisiene ni né ti ejemplu.

¹³ Raca jma de ti gayuaa iza, revista Torre stiʼ ni rapa ni biree lu diidxaʼ inglés bisiene xiñee nabé risaca ca diidxaʼ riuundaʼ stiʼ Reinu: «Ora guidúʼndanu cani dxandíʼ cazíʼdinu de Dios jma zacané nga laanu guiaana cani ndaaniʼ íquenu ne chindácani ndaaniʼ ladxidoʼno». Cumu guiráʼ cani zeeda lu ca diidxaʼ riuundaʼ ca riree cani de lu Biblia la? ora rizíʼdinu cani de memoria riaazicani dede ndaaniʼ ladxidoʼno. Nga runi, nabé jneza nga gánnanu chupa chonna de laacani de memoria. Stale binni ni deruʼ primé biaje zigánnacaʼ laanu ndaaniʼ Yoo stiʼ Reinu guizáʼ ridxagayaacaʼ ora ruuyacaʼ dede ndaaniʼ ladxidóʼ chupa chonna de ca xpinni Cristu ruundacaʼ ca diidxaʼ riuundaʼ ca.

¹⁴ Yanna guiníʼ íquenu ni bizaaca ti gueelaʼ  stiʼ iza 1869. Ora zeeda Charles Russell de dxiiñaʼ para cheʼ ralidxi, binadiaga ridxi stiʼ ti diidxaʼ riuundaʼ ndaaniʼ ti yoo ni nuu xagueteʼ yú. Dxi bizaacabe nga mápeca guníʼ íquebe maʼ qué zanda diʼ guidxélabe tu gusiidiʼ laabe ni dxandíʼ de Dios ne maʼ gudixhe íquebe guni tenderbe ca negocio stibe. Cumu guníʼ íquebe maʼ qué zanda gacanebe binni guiziidiʼ de Dios la? gudixhe íquebe iquiiñebe bueltu guni ganarbe para gudiibe ni caquiiñeʼ binni. Ora biétebe ndaaniʼ yoo que, biiyabe dagulisaa caadxi binni cayuni adorar Dios. Neca dxaʼ yú ndaaniʼ yoo que ne maʼ nayooxhoʼ ni, guribe para gucaadiágabe. Gudiʼdiʼ si iza bicaabe ca diidxaʼ riʼ de ni binadiágabe gueelaʼ que: «Ni binadiagaʼ raqué, ne modo gucané Dios naa, biquiiñeʼ cani para guneʼ cré dxandíʼ nga Dios guníʼ xi guicá lu Biblia». Peru cadi guiaandaʼ ndiʼ laanu, ni bicaa Russell chuʼ raqué nga ca diidxaʼ riuundaʼ binadiágabe cayuundaʼ ca binni que.

15. Xiñee bidxaa caadxi cosa lu libru ra zeeda diidxaʼ riuundaʼ.

¹⁵ Ra zidiʼdiʼ iza jma ziyénenu ni cá lu Stiidxaʼ Dios. Maca bizeeteʼ Proverbios 4:18 ni: «Neza stiʼ cani nachaʼhuiʼ zeeda gaca casi biaaniʼ ridxíʼ ni zeʼ ora jma ziyaca nayaʼniʼ dede guiaaniʼ dxindxi». Cumu zeʼ dxi jma ziyénenu stiidxaʼ Dios la? nga runi jneza nga guchaʼnu modo «guidúʼndanu cani dxandíʼ cazíʼdinu de Dios». Veinticinco iza ni maʼ gudiʼdiʼ ca, ca testigu stiʼ Jiobá de stale guidxi roʼ huaquiiñenu libru ni láʼ Canten alabanzas a Jehová. b Peru dede dxiqué, ziziidiʼ chaahuinu stale cosa ni rusiidiʼ Biblia nga runi stale de ca diidxaʼ ni gucuá lu libru ca maʼ qué riquiiñenu cani. Casi yanna la? maʼ qué rininu «nuevo orden», sínuque «nuevo mundo» o «guidxilayú cubi». Laaca maʼ qué rininu gaca «vindicar» lá Jiobá, sínuque maʼ rininu gaca «santificar», o «guisaca» labe. Cumu jma jneza modo riénenu cani rusiidiʼ Biblia yanna la? nga runi naquiiñeʼ guidxaa caadxi de cani zeeda lu libru ra zeeda ca diidxaʼ riuundaʼ ca.

16. Ximodo zacané libru cubi ra zeeda ca diidxaʼ riuundaʼ ca laanu chinándanu conseju stiʼ Efesios 5:19.

¹⁶ Nga nga caadxi de ca razón gupa Grupu ni Zaniruʼ para guiníʼ gaca sti libru cubi de diidxaʼ riuundaʼ ni láʼ Cantemos a Jehová. c Yanna maʼ nápani 135 diidxaʼ riuundaʼ si, nga zacané laanu guizíʼdinu letra stícani jma nagueenda, neca chupa chonna si de laacani. Ne jneza gúninu zacá pur conseju ni bidii Pablu lu Efesios 5:19 (biindaʼ ni).

Gusihuínninu rusisácanu cani

17. Xi zacané laanu para cadi guidxíbinu pa gucheʼnu ora guidúʼndanu ra ridagulisaanu.

¹⁷ Ñee qué zadúʼndanu ora maʼ caxidxi ca diidxaʼ riuundaʼ ca purtiʼ si ridxíbinu gucheʼnu la? Coʼ xa. Ñee cadi dxandíʼ «irá nu ruchéʼ nu» stale biaje la? (Sant. 3:2.) Peru cadi pur nga diʼ rusaananu de gusisácanu Jiobá de yoo pur yoo. Yanna, xiñee gusaananu de gusisácanu Jiobá né  diidxaʼ riuundaʼ purtiʼ si qué gánnanu guidúʼndanu galán yaʼ. Jiobá, Dios ni bizáʼ «ruaa binni», nabé riéchebe ora iquiiñenu stídxinu para guidúʼndanu diidxaʼ riuundaʼ para laabe (Éxo. 4:11).

18. Xi zacané laanu guizíʼdinu letra stiʼ ca diidxaʼ riuundaʼ ca.

¹⁸ Lu stale diidxaʼ maʼ nuu ca discu Cantemos a Jehová (coro y orquesta), lu discu ca zeeda caadxi saa sicarú ne nuu tu cayuundaʼ luni. Guizáʼ galán modo guca grabar cani. Pa nuucani lu ti diidxaʼ ni rieʼnuʼ la? bicaadiaga cani gatigá, nga zacané lii para guiziidiluʼ neca chupa chonna de ca diidxaʼ riuundaʼ ca. Stale de ca letra ni zeeda lu ca diidxaʼ riuundaʼ ca nexheʼ chaahuiʼ cani casi ti versu, nga runi nagueendaca zuxuíʼluluʼ xcaadxi diidxaʼ zeeda despué. Yanna xi zanda gúninu ora guxhídxinu discu ca yaʼ. Galán gúninu stipa pur chinándanu cani cayuundaʼ luni. Pa guizíʼdinu ca letra ne tono stícani ralídxinu la? jma zudii gana laanu guidúʼndanu cani ndaaniʼ Yoo stiʼ Reinu.

19. Xi dxiiñaʼ raca para gata chaahuiʼ saa stiʼ Reinu ni runi grabar orquesta Watchtower.

¹⁹ Ora rápanu guendaridagulisaa de ti dxi, de chupa gubidxa ne de chonna gubidxa ruxhídxicabe caadxi saa sicarú stiʼ diidxaʼ riuundaʼ. Neca raca nagana para laanu gucaadiáganu cani, naquiiñeʼ gánnanu né stale dxiiñaʼ nga raca ca diidxaʼ riuundaʼ ca. Primé la? ribícabe xi saa xhidxi, de racá maʼ riguixhe chaahuicabe ximodo guxhidxi orquesta Watchtower ni, ra nuu 64 hombre ne gunaa xpinni Cristu. Cada tobi de laacabe ribee stale tiempu para guʼyaʼ ca nota stiʼ ni zaquiiñeʼ ora maʼ guni ensayarcaʼ ne guni grabarcaʼ ndaaniʼ ca cuartu ra raca grabar ni nuu Patterson (Nueva York). Guiráʼ cani nuu lu grupu riʼ —chii de laacaʼ nácacaʼ de sti guidxi roʼ ne de racá riecaʼ Estados Unidos— rusisácacaʼ dxiiñaʼ ni nápacaʼ de quixhe chaahuicaʼ ca diidxaʼ riuundaʼ ca para iquiiñenu cani ra ridagulisaanu. Rudiʼnu xquíxepeʼ laacabe de guidubi ladxidoʼno. Ximodo zanda gusihuínninu rudiʼnu xquíxepeʼ laacabe pur stipa rúnicabe ora maʼ nuunu lu ca guendaridagulisaa roʼ ca yaʼ. Ra guzúʼbanu diidxaʼ ora gábicabe laanu maʼ zanda cuinu lugar stinu para gucaadiáganu cani sin guchiiñaʼ gastiʼ laanu, purtiʼ né stale guendarannaxhii nga gúcacani para laanu.

20. Xi naquiiñeʼ quixhe íquenu gúninu.

²⁰ Dios stinu rucaadiaga ca diidxaʼ riuundaʼ ridúʼndanu ora ridagulisaanu para guni adorarnu laa. Para laabe nabé risaca cani. Nga runi, gusiéchenu ladxidóʼ Jiobá ra guidúʼndanu cani né stale gana. Nga runi, pa nánnanu guidúʼndanu o pa cazíʼdirunu la? galán ¡guidúʼndanu para Jiobá! (Sal. 104:33.)

[Cani cá ñee yaza]

Xi riníʼ íqueluʼ

• Xi ejemplu zeeda lu Biblia ni rusihuinni pabiáʼ risaca nga guidúʼndanu ora maʼ cayuni adorarnu Dios.

• Xiñee zanda guininu cusihuínninu cayúninu ni na Mateo 22:37 ora guidúʼndanu ca diidxaʼ riuundaʼ stiʼ Reinu de guidubi ladxidoʼno.

• Ximodo rusihuínninu rusisácanu ca diidxaʼ riuundaʼ stiʼ Reinu.

[Guendarinabadiidxaʼ stiʼ párrafo]

[Dibuju/foto ni zeeda lu yaza 23]

Ñee rusíʼdinu ca xiiñinu cadi guiásacaʼ ora maʼ caxidxi ca diidxaʼ riuundaʼ ca pa cadi caquiiñeʼ gúnicaʼ ni la?

[Dibuju/foto ni zeeda lu yaza 24]

Ñee cazíʼdinu letra stiʼ ca diidxaʼ riuundaʼ nacubi ca ralídxinu la?