Bako Pang Gurangon Tanganing Maglingkod sa Dios

Sa Malaga, sa timog na España, sarong mag-ina—parehong Ana an ngaran—an nabautismohan kan Disyembre 19, 2009. Kabilang sinda sa 2,352 na nagpabautismo sa España kan 2009. Alagad igwa nin pambihirang bagay dapit sa mag-inang ini—an edad ninda. Sinda 107 asin 83 anyos na!

Ano an nagpangyari sa sainda na magpabautismo bilang simbolo kan saindang pagdusay ki Jehova? Kan enot na mga taon kan dekada 1970, sarong kataed na Saksi an parateng nag-aagda ki Ana—an aki—na mag-atender sa Pag-adal sa Libro kan Kongregasyon na ginigibo sa harong kan Saksing iyan. Nag-aatender si Ana sa panapanahon. Minsan siring, huli sa sekular na trabaho nia, dai na sia kaidto nag-oswag.

Pakalihis nin mga sampulong taon, an nagkapira sa mga aki ni Ana nag-adal sa Biblia asin pag-abot nin panahon nagin mga lingkod ni Jehova. Sa katapustapusi, napukaw liwat kan saro sa sainda, si Mari Carmen, an interes kan saiyang ina sa katotoohan sa Biblia asin tinabangan ini na mag-ako nin pag-adal sa Biblia. Dangan, an lola ni Mari Carmen, an gurangon nang si Ana, nagkainteres na man sa Biblia. Pag-abot nin panahon, sampulo sa pamilyang ini an nagpabautismo.

Sa aldaw kan bautismo ninda, magayagayang marhay an mag-ina na Ana. “Nagin marahayon sa sako si Jehova, na tinogotan akong mamidbid sia,” an sabi kan 107 anyos na si Ana. “Bago umabot an Paraiso,” an sabi man kan aki nia, “gusto kong maglingkod ki Jehova, na ginigibo an kabotan nia asin ihinuhulit an maogmang bareta sagkod sa pinakamakakaya ko.”

An nangorognang nagpapagayagaya sa duwang balong ini iyo an pag-atender sa mga pagtiripon. “Dai sinda nagpapalta ni sarong pagtiripon,” an sabi kan saro sa kamagurangan sa kongregasyon ninda. “Pirme sindang andam na magkomento sa Pag-adal sa Torrengbantayan.”

An saindang maimbod na halimbawa nagpapagirumdom sa sato dapit sa sarong balo na an ngaran Ana “na dai noarin man nagpapalta sa templo, na naggigibo nin sagradong paglilingkod banggi asin aldaw na may mga pag-ayuno asin pagngayongayo.” Huli kaini, nagkapribilehio siang maheling an omboy na si Jesus. (Luc. 2:36-38) Sa edad na 84, si Ana bako pang gurangon tanganing maglingkod ki Jehova, asin iyo man an mga tukaya nia ngonyan.

May mga paryente ka daw na gustong maghinanyog sa mensahe na nasa Biblia? O ika daw nakanompong nin interesadong gurang na andam na maghinanyog sa saimo kan ika makadalaw sa harong nia? An mga arog ninda puedeng magin kapareho kan mag-ina na Ana sa eksperyensiang ini, huling sinda bako pang gurangon ni huri na tanganing pumoon na maglingkod sa tunay na Dios, si Jehova.

[Blurb sa pahina 25]

“Nagin marahayon sa sako si Jehova”

[Blurb sa pahina 25]

“Bago umabot an Paraiso, gusto kong maglingkod ki Jehova”