Takwaba Kucelwa mu Kubombela Lesa

Mu Málaga, ku kapinda ka ku kulyo aka Spain, namayo umo uwe shina lya Ana, no mwana wakwe, Ana balibatishiwe pa 19 December, mu 2009. Bali pa bantu 2,352 ababatishiwe mu Spain mu 2009. Nomba pali cimo ici-ibelele pali uyu nyina no mwana wakwe. Ne ci myaka yabo. Banyina ilyo balebatishiwa bali ne myaka 107 e lyo umwana ali ne myaka 83!

Cinshi calengele ukuti balange ukuipeela kwabo kuli Yehova ukupitila mu kubatishiwa? Mu kutendeka kwa ba 1970, umwina mupalamano aleitako ba Ana, abana, kwi Sambililo lya Citabo pa Cilonganino ilyalebela mu ng’anda ya kwa Nte. Ba Ana balesangwako ilingi line. Lelo pa mulandu wa ncito balebomba, balifililwe ukulunduluka.

Ilyo papitile nalimo imyaka 10, abana bamo aba ba Ana balitendeke ukusambilila Baibolo kabili mu kuya kwa nshita baishileba ababomfi ba kwa Yehova. Bamo ni ba Mari Carmen, aba-afwile banyinabo ukutendeka ukutemwa icine ca mu Baibolo na kabili. Lyena banakulu ba ba Mari Carmen, ba Ana, nabo balitendeke ukutemwa ifyo Baibolo isambilisha. Mu kulekelesha, ababatishiwe muli ulu lupwa bafikile 10.

Ilyo ba Ana na bana babo ba Ana balebatishiwa, balitemenwe sana. Ba Ana ababatishiwe ninshi bali ne myaka 107, batile: “Yehova alintemwa sana, pantu alenga namwishiba.” Abana babo nabo batile: “Ilyo Paradaise ishilaisa, ndefwaya ukubombela Yehova, ukulacita ukufwaya kwakwe no kubila imbila nsuma ukulingana na maka yandi.”

Icilenga ukuti aba bamukamfwilwa babili baleba ne nsansa, kulasangwa ku kulongana. Eluda umo mu cilonganino baba atile: “Tabapuswa ku kulongana nangu kumo. Balaipekanya lyonse ukwasukapo pe Sambililo lya Ulupungu lwa kwa Kalinda.”

Bucishinka bwabo butwibukisha mukamfwilwa wa ku kale uwe shina lya Ana. Baibolo itila, “talepuswa pe tempele, alebomba umulimo wa mushilo ubushiku na kasuba no kuleka ukulya, kabili alepepa amapepo ya kupapaata.” Ici calengele ukuti akwate ishuko lya kumona Yesu ilyo ali akanya. (Luka 2:36-38) Ukuba ne myaka 84 takwalengele Ana ukufilwa ukubombela Yehova, kabili e cimo cine na aba bamashina bakwe babili.

Bushe mwalikwata ba lupwa lwenu abakutika ku bukombe bwaba mu Baibolo? Nangu mwalisangapo umukote uwatemwa ukukutika ku fyo mulelanda ilyo mwaya pa mwakwe mu kushimikila? Aba musango yo, kuti baba nga ba Ana babili twalandapo muli ici cilangililo, pantu takwaba kucelwa mu kubombela Lesa wa cine, Yehova.

[Amashiwi pe bula 25]

“Yehova alintemwa sana”

[Amashiwi pe bula 25]

“Ilyo Paradaise ishilaisa, ndefwaya ukubombela Yehova”