Ekpeko Sɛɛ Tsɔ Akɛ Obaasɔmɔ Nyɔŋmɔ

Yɛ December 19, 2009 lɛ, abaptisi yoo ko kɛ ebiyoo, ní atsɛɔ amɛ fɛɛ akɛ Ana lɛ yɛ Spain wuoyigbɛ he ko ni atsɛɔ jɛmɛ Málaga. Amɛfata mɛi 2,352 ní abaptisi yɛ Spain yɛ afi 2009 lɛ ahe. Shi nɔ ko yɛ ni sa kadimɔ yɛ nyɛ kɛ ebi nɛɛ he—afii ni amɛye lɛ. No mli lɛ nyɛ lɛ eye afii 107 ni bi lɛ eye afii 83!

Mɛni hewɔ amɛha abaptisi amɛ kɛfee amɛhe nɔ ni amɛjɔɔ amɛha Yehowa lɛ he okadi lɛ? Kɛjɛ afi 1970 kɛmiimɔ afi 1973 afii lɛ amli lɛ, Ana ni ji bi lɛ akutsoŋnyo ko ni ji Odasefonyo lɛ fɔ̃ɔ lɛ nine koni eba Asafoŋ Wolo Nikasemɔ ni afeɔ yɛ Odasefonyo lɛ shĩa lɛ. Kɛ́ eyɛ mli aahu lɛ, kɛkɛ lɛ Ana etee shikome. Shi yɛ Ana nitsumɔ hewɔ lɛ, enyɛɛɛ eya ehiɛ.

Aaafee afii nyɔŋma sɛɛ lɛ, Ana bii lɛ ekomɛi bɔi Biblia lɛ kasemɔ, ni sɛɛ mli lɛ amɛbatsɔmɔ Yehowa tsuji. Naagbee lɛ, ebii nɛɛ ateŋ mɔ kome ni atsɛɔ lɛ Mari Carmen lɛ tsĩɛ miishɛɛ ni emami yɔɔ yɛ Biblia mli anɔkwalei ahe lɛ hiɛ ekoŋŋ, ni eye ebua emami ni ekpɛlɛ ní akɛ lɛ akase Biblia lɛ. No sɛɛ lɛ, Mari Carmen naa, ni lɛ hu atsɛɔ lɛ Ana lɛ hu bɔi Biblia lɛ he miishɛɛ namɔ. Naagbee lɛ, weku nɛɛ mlibii nyɔŋma sɔŋŋ ha abaptisi amɛ.

Gbi ni abaptisi mami Ana kɛ ebiyoo Ana lɛ, amɛyi enyɔ lɛ fɛɛ mii shɛ amɛhe waa. Mami Ana ni eye afii 107 lɛ kɛɛ akɛ: “Yehowa kɛ mi eye jogbaŋŋ akɛni eha mibale lɛ lɛ hewɔ.” Ebiyoo lɛ hu kɛshi sɛɛ akɛ, “Miisumɔ ni masɔmɔ Yehowa, ni mafee esuɔmɔnaa nii, ni mashiɛ sanekpakpa lɛ babaoo bɔ ni manyɛ, dani Paradeiso lɛ aba.”

Nɔ ni haa yei okulafoi enyɔ nɛɛ náa miishɛɛ waa ji asafoŋ kpeei ni amɛyaa lɛ. Amɛsafo lɛ mli onukpa ko kɛɛ akɛ, “Amɛfolɔɔɔ kpeei amli kɔkɔɔkɔ. Be fɛɛ be nɛɛ amɛfee klalo akɛ amɛbaaha saji ahetoo yɛ Buu-Mɔɔ Nikasemɔ lɛ shishi.”

Amɛnɔkwayeli lɛ haa wɔkaiɔ yoo okulafo ko ni atsɛ lɛ Hana, “ni ejeee sɔlemɔwe lɛ kwraa, shi ejáa Nyɔŋmɔ kɛ buadayeli kɛ faikpamɔ nyɔɔŋ kɛ shwane” lɛ. Enɛ ha ená hegbɛ kɛna Yesu gbekɛbiiashi. (Luka 2:36-38) Beni Hana eye afii 84 lɛ, no mli lɛ egbɔko tsɔ akɛ ebaasɔmɔ Yehowa, ni nakai eji yɛ mɛi enyɔ nɛɛ ni akɛ egbɛ́i tsɛɔ amɛ lɛ hu agbɛfaŋ.

Ani oyɛ wekumɛi ni miisumɔ ni amɛbo shɛɛ sane ni yɔɔ Biblia lɛ mli lɛ toi? Aloo beni oyaa shĩa kɛ shĩa lɛ, okɛ mɔ ko ni efɔ̃ nɔ yɛ afii amli ekpe ni eyɛ wiemɔ lɛ he miishɛɛ, ni miisumɔ ni ebo bo toi? Mɛi ni tamɔ nɛkɛ lɛ baanyɛ afee tamɔ nyɛ kɛ ebi ni atsɛɔ amɛ Ana ní awieɔ amɛhe sane nɛɛ, ejaakɛ ekpeko sɛɛ tsɔ akɛ mɔ ko baaje shishi akɛ ebaasɔmɔ Yehowa, ni ji anɔkwa Nyɔŋmɔ lɛ.

[Wiemɔ ni akɔ ni akɛmiitsu nii ni yɔɔ baafa 25]

“Yehowa kɛ mi eye jogbaŋŋ”

[Wiemɔ ni akɔ ni akɛmiitsu nii ni yɔɔ baafa 25]

‘Miisumɔ ni masɔmɔ Yehowa dani Paradeiso lɛ aba’