A rẹ Kpako Vrẹ Ọghẹnẹ Ọgọ Họ

Evaọ Málaga, ofẹ obọze ovatha-ọre Spen, aye jọ avọ ọmọ riẹ, nọ odẹ aimava na o rrọ Ana, a họ-ame evaọ December 19, 2009. A jọ usu ahwo idu ivẹ, egba esa gbe udhuvẹ gbe ikpegbivẹ (2,352) nọ e jọ Spen họ-ame evaọ 2009. Rekọ evaọ usu ahwo nọ a họ-ame na, oware jọ u gbunu evaọ oma oni gbe ọmọ nana—ikpe rai. Oni na ọ jọ ikpe udhusoi gbe ihrẹ (107), ọmọ na kọ udhone gbe esa (83)!

Eme ọ wọ rai họ-ame, onọ o rrọ oka omauromudhe rai kẹ Jihova? Evaọ emuhọ ikpe 1970, aye jọ nọ ọ rrọ omọvo Isẹri Jihova nọ a gbẹ riẹ oma ọ jẹ hai zizie Ana, ọmọ na, kpohọ Uwuhrẹ Obe Ukoko nọ a jẹ jọ uwou Osẹri na ru. Ana ọ jẹ hai kpohọ uwuhrẹ na n’oke t’oke. Rekọ Ana ọ sai wo ẹnyaharo viere he fiki iruo riẹ.

Nọ oware wọhọ ikpe ikpe e ruemu no, emọ Ana jọ a te mu Ebaibol na họ ewuhrẹ, nọ oke o be nyaharo na a te ti zihe ruọ idibo Jihova. Ọjọ rai nọ a re se Mari Carmen o te ru oni riẹ wariẹ wo isiuru kẹ uzẹme Ebaibol na je fi obọ họ kẹe jẹ uwuhrẹ Ebaibol rehọ. Kẹsena, Ana, oni ologbo Mari Carmen, nọ o yẹ Ana avivẹ na o te je mu isiuru họ ewo kẹ uwuhrẹ Ebaibol. Uwhremu na, imakpe evaọ uviuwou nana a tẹ te họ-ame.

Eva e were Ana ivẹ na, oni gbe ọmọ na gaga evaọ ẹdẹ nọ aimava na a rọ họ-ame. Oni na nọ ọ kpako te ikpe udhusoi gbe ihrẹ no na ọ ta nọ: “Jihova ọ re omẹ ohrọ kẹhẹ, nọ ọ rọ kẹ omẹ uvẹ nọ mẹ rọ riẹe.” Ọmọ riẹ na o fibae nọ: “Taure Aparadase ọ tẹ te ze, mẹ gwọlọ gọ Jihova, ru oreva riẹ, jẹ ta usiuwoma te epanọ ẹgba mẹ o mu.”

Iwuhrẹ enya e be wha evawere ilogbo se eyae-uku ivẹ nana. Ọkpako jọ evaọ ukoko rai ọ ta nọ: “Ewuhrẹ ọvo o re vo ai hi. Ẹsikpobi a rẹ gwọlọ kuyo evaọ Uwuhrẹ Uwou-Eroro na.”

Oriruo ẹrọwọ rai o rẹ kareghẹhọ omai Anna, aye-uku nọ a fodẹ evaọ Ebaibol na, ọnọ “o je no uwou egagọ-ode he, ọ gọ, yọ ọ se emuọriọ ba, jẹ lẹ te aso te uvo.” Onana u ru nọ ọ sai ro wo uvẹ-ọghọ nọ ọ rọ ruẹ Jesu nọ a yẹ obọ nọ a rehọ iẹe ziọ uwou egagọ-odẹ na. (Luk 2:36-38) Dede nọ ọ jọ ikpe udhone gbe ene, Anna o du rehọ iẹe nọ ọ kpako vrẹ Jihova ọgọ họ, yọ ere ọvona o rrọ kẹ ekpọ riẹ nọ ma be jọ uzoẹme nana ta ẹme kpahe na.

Kọ imoni ra jọ e riẹ nọ o te were re a gaviezọ kẹ ovuẹ Ebaibol na? Hayo kọ whọ ruẹ ọkpako-soso jọ no nọ ọ rẹ gaviezọ kẹ owhẹ nọ whọ tẹ nyae ta usiuwoma kẹe? Ekpako-soso itieye na a rẹ sae jọ wọhọ Ana ivẹ nọ ma ta ẹme te na, keme ohwo ọ rẹ kpako vrẹ oke nọ ọ rẹ rọ gọ Jihova, Ọghẹnẹ uzẹme na ha.

[Ẹme nọ a fi ẹgba họ nọ ọ rrọ ẹwẹ-obe avọ 25]

“Jihova ọ re omẹ ohrọ kẹhẹ”

[Ẹme nọ a fi ẹgba họ nọ ọ rrọ ẹwẹ-obe avọ 25]

“Taure Aparadase ọ tẹ te ze, mẹ gwọlọ gọ Jihova”