Botšofadi ga bo re Thibele go Hlankela Modimo

Kua Málaga, ka borwa bja Sepania, mma gotee le morwedi wa gagwe, bao bobedi bja bona ba bitšwago bo Ana, ba kolobeditšwe ka December 19, 2009. Ba be ba le gare ga batho ba 2 352 bao ba kolobeditšwego kua Sepania ka 2009. Eupša go be go na le se sengwe se se kgahlišago ka mma yo le morwedi wa gagwe—nywaga ya bona. Mma o be a na le nywaga e 107 gomme morwedi a na le e 83!

Ke’ng seo se ba tutueleditšego go kolobetšwa e le pontšho ya boineelo bja bona go Jehofa? Mathomong a bo-1970, moagišani yo mongwe o be a tlwaetše go laletša Ana—morwedi—Thutong ya Puku ya Phuthego yeo e bego e swarelwa legaeng la Hlatse. Nako le nako Ana o be a fela a eba gona dibokeng. Lega go le bjalo, Ana o ile a palelwa ke go dira tšwelopele ka baka la mošomo wa gagwe wa boiphedišo.

Mo e ka bago nywaga e lesome ka morago, ba bangwe ba bana ba Ana ba ile ba thoma go ithuta Beibele gomme ba feleletša ba hlankela Jehofa. Mafelelong yo mongwe wa bona e lego Mari Carmen, o ile a dira gore mmagwe a rate therešo ya Beibele gape gomme a mo thuša go amogela thuto ya Beibele. Ke moka, makgolo wa Mari Carmen, e lego Ana yo mogolo, o ile a thoma go kgahlegela Beibele. Ka morago ga moo, ditho tše lesome tša lapa le di ile tša tšea kgato ya go kolobetšwa.

Mma gotee le morwedi wa gagwe bao ba bitšwago bo Ana, ba be ba thabile kudu letšatšing la bona la kolobetšo. Ana wa nywaga e 107 o itše: “Jehofa o lokile, o ntumeletše go mo tseba.” Morwedi wa gagwe o okeditše ka gore: “Ke nyaka go hlankela Jehofa pele Paradeise e fihla, ke dire thato ya gagwe gomme ke bolele ditaba tše dibotse go fihla moo nka kgonago gona.”

Bahlologadi ba ba babedi ba be ba thabišwa kudu ke go ba gona dibokeng. Mogolo yo mongwe wa phuthegong ya bona o re: “Ba ba gona dibokeng ka mehla. Ba dula ba ikemišeditše go araba Thutong ya Morokami.”

Mohlala wa bona wa potego o re gopotša wa mohlologadi yo a bitšwago Anna, yo a bego “a sa ke a hlokwa tempeleng, a dira tirelo e kgethwa bošego le mosegare, a ikona dijo le go lopa.” Se se dirile gore a be le tokelo ya go bona Jesu wa lesea. (Luka 2:36-38) Gaešita le ge a be a na le nywaga e 84, Anna ga se a dumelela botšofadi bo mo palediša go hlankela Jehofa, go fo swana le ge go bile bjalo ka bo Ana ba mehleng yeno.

Na o na le ba leloko bao ba ikemišeditšego go kwa molaetša o tšwago Beibeleng? Goba na o ile wa kopana le motšofadi yo a nago le kgahlego yo a ka ratago go go theetša ge o be o mo etetše ka gae? Batho ba bjalo ba ka swana le bo Ana ba phihlelong ye, ka ge botšofadi bo sa re thibele go hlankela Modimo wa therešo, Jehofa.

[Ntlhakgolo go letlakala 25]

“Jehofa o lokile”

[Ntlhakgolo go letlakala 25]

“Ke nyaka go hlankela Jehofa pele Paradeise e fihla”