La tarde liu atu serbí Maromak

Iha Málaga, parte súl husi rai-España, inan ida ho nia oan-feto, ho naran neʼebé hanesan, Ana, hetan batizmu iha 19 Dezembru 2009. Sira naʼin-rua mós inklui ho ema naʼin-2.352 iha España neʼebé halo desizaun atu hetan batizmu durante tinan 2009. Maibé iha buat ida neʼebé úniku kona-ba inan neʼe no nia oan-feto. Neʼe mak sira-nia tinan. Inan neʼe tinan 107 no oan-feto tinan 83.

Saida mak book sira atu halo desizaun atu hetan batizmu hodi hatudu katak sira dedika an ba Maromak Jeová? Iha tinan 1970, viziñu ida konvida Ana (oan-feto) atu tuir reuniaun ba Grupu Estudu Livru nian neʼebé halaʼo iha ninia uma. Dala ruma Ana tuir reuniaun neʼe. Maibé tanba Ana serbisu, nia la laʼo ba oin iha lia-loos.

Tinan sanulu depois neʼe, Ana nia oan sira komesa estuda Bíblia no ikusmai serbí Maromak Jeová. Ninia oan-feto ida naran Mari Carmen ikusmai halo ninia inan nia domin ba lia-loos husi Bíblia sai buras fali no ajuda nia atu estuda fali Bíblia. Tuirmai, Mari Carmen nia avó feto neʼebé mós naran Ana komesa hatudu interese ba Bíblia. Ikusmai, ema naʼin-sanulu husi família halo desizaun atu hetan batizmu.

Iha sira-nia loron batizmu nian, Ana rua neʼe, inan no oan-feto, sira-nia matan nabilan tanba kontente tebes. Ana neʼebé tinan 107 hatete: “Maromak Jeová laran-diʼak tebes mai haʼu, hodi husik haʼu atu koñese nia.” Ninia oan-feto hatete: “Antes mundu foun mai, haʼu hakarak atu serbí Maromak Jeová, hodi halo ninia hakarak no haklaken lia-foun diʼak tuir haʼu-nia kbiit.”

Buat neʼebé halo feto-faluk naʼin-rua neʼe kontente tebes mak asiste reuniaun sira. Sira-nia katuas kongregasaun nian ida hatete: “Sira nunka falta reuniaun ida. Sira sempre prontu atu fó komentáriu iha reuniaun Estudu Livru Haklaken nian.”

Sira-nia ezemplu kona-ba laran-metin fó-hanoin mai ita kona-ba feto-faluk ida iha tempu uluk naran Ana neʼebé “la husik templu, maibé serbí Maromak kalan loron, hodi halo jejún no hamulak”. Nuneʼe, nia hetan bensaun atu haree Jesus neʼebé bebé hela. (Lc 2:36-38) Maski Ana tinan 84, maibé neʼe la hanetik nia atu serbí Maromak Jeová. Neʼe mós hanesan ho Ana naʼin-rua neʼebé temi iha leten.

Ita iha família ruma neʼebé hakarak rona mensajen husi Bíblia ka lae? Ka, kuandu Ita bá haklaken Ita hasoru ona katuas ka ferik ida neʼebé hakarak rona ba Ita? Ema sira-neʼe bele sai hanesan Ana naʼin-rua iha esperiénsia neʼe, tanba la tarde liu atu serbí Maromak loos, Jeová.

[Dezeñu iha pájina 25]

“Maromak Jeová laran-diʼak tebes mai haʼu”

[Dezeñu iha pájina 25]

“Antes mundu foun mai, haʼu hakarak atu serbí Maromak Jeová”