Aka revista liytʼirinakan jisktʼäwinakapa

Génesis 6:3 qillqatanxa, akham siwa: “Janiw jaqirux wiñayataki jakaykxäti, jupasti janchikiwa. Ukhamasti pataka pä tunkani maranakakiw jakani” sasa. Uka arunakampixa, ¿jaqix 120 maranakakwa jakani saskänti? ¿Noé chacharux uka maranakanwa yatiyäta saskpachänti?

Janiw ukhamäkiti.

Uma juiciot nayraxa, walja jaqinakaw patak patak maranak jakawayapxi. Noé chachax 600 maranïkäna ukhaw uma juiciox purinïna, ukat 950 maraniw jiwawayxi (Gén. 7:6; 9:29). Uma juicio qhipat nasirinakas janiw 120 maranakakix jakapkänti. Arfaxad ukat Sala sat chachanakaxa, 438 ukat 433 maranakaw jakawayapxi (Gén. 11:10-15). Moisés chachan urunakapanxa, jaqinakar 70 ukat 80 maranakatsa jukʼamp maranak jakirix mä qhawqhakiw uñjasxänti (Sal. 90:10). Ukhamasti, Génesis 6:3 qillqatax janiw jaqinakax 120 maranakakiw jakapxani sañ munkänti, janirakiw 120 maranakakiw jakapxani sañ munkänti.

Ukhamasti, ¿uma juiciox 120 maranakatwa purinini sasin masinakamar yatiyanim sasat Noé chachar Diosax saskäna? Janiwa. Yaqha tiemponx Noé chacharuw parläna sasax qhanwa saraki. Sañäni, tunka tʼaqanak qhipanxa, akham siwa: “Noerux sanwa: ‘Taqi jaqinak tukjañwa amtta. Jupanakan jucha luratanakap laykusti aka uraqinxa jan waltʼañanakakiw utjxi’” sasa. Qhipa maranakatxa, arka lurañ tukuyxäna ukhaxa, “Diosax Noerux sarakïnwa: ‘[...] jichhax familiamampi arcar mantxam’” sasa (Gén. 6:13; 7:1). Ukat Noé chacharux yaqha tuqinakat  qhanañcharakïnwa sasaw yaqha jisktʼa tʼaqanakan qhanañcharaki (Gén. 8:15; 9:1, 8, 17).

Ukampisa, Génesis 6:3 jiskʼa tʼaqax janiw ukanakjamäkiti, Diosax Noé chacharuw parli sasax janiw may kutis siskiti. Ukatwa, kuntï uka qillqatan siski ukax Diosan mä amtapaw sisnaxa (uñxattʼarakismawa Génesis 8:21). Diosaxa, jaqir janïr lurkasax kunanaksa luratayna, ukxarux kuns lurarakïna ukanakat yatxatasaxa, Biblianxa akaw jikxatasi: “Diosax sarakïnwa” sasa (Gén. 1:6, 9, 14, 20, 24). Ukhamax uka arunakampix janiw khiti jaqirus parlkänti, kunattix janiw aka Uraqin khitis utjkänti, ni Adanas utjkänti.

Ukhamasti, Génesis 6:3 qillqatanxa, Jehová Diosax jan wali jaqinakar aka Uraqit chhaqtayañwa amtaskpachäna. Jilïr jachʼa Juezjamaxa, Noé chachar janïr yatiykasaw 120 maranakat tukjañ amtäna. ¿Kunatsa ukha maranakat tukjañ amtpachäna? ¿Kunatsa suytʼañ amtäna?

Apóstol Pedrow uka tuqit mä qhawqha qhanañchtʼistu, akham sänwa: “Noé chachax arca luraskän ukkhax janiw jaysapkataynati, Diosax jupanakar suytʼaskchïna ukasa. Uka arcansti kimsaqallqunikirakiw uma tuqi qhispiyasipxäna” sasa (1 Ped. 3:20). Kunjamtï uñjktanxa, Jehová Diosax 120 maranak suytʼañ amtkäna ukhaxa, waljaw phuqasiñanakapax utjaskäna. Ukat niya pä tunka maranak qhipatxa, Noé chachampi esposapampix mä wawanïpxänwa (Gén. 5:32; 7:6). Qhiparux pä lluqall wawanakanïpxarakïnwa, jilarxasinxa, kimspachaniw jaqichasxapxäna, ukhamatwa Noé chachan familiapanx kimsaqallqunïxapxäna. Ukatsti, taqiniw arka lurañ qalltapxäna, tukuyañatakix walja maranakaw irnaqapxpachäna, kunattix wali jachʼänwa, ukat jupanakax jukʼanikïpxarakïnwa. Ukhamasti, Diosan 120 maranak suytʼatapatwa, ukax phuqasiwayi, ukat jakäwis utjaskakiraki. Ukat Diosar taqi chuyma luqtir kimsaqallqunix “uma tuqi qhispipxäna”.

Jehová Diosax kuna maransa Noé chacharux Uma Juiciomp tukjañ amtapxa yatiyäna ukxa, Biblianxa janiw qhanañchkiti. Ukampis Noé chachan wawanakap nasiñapkamasa casarasipxañapkamasa walja maranakaw pasäna, ukatxa 40, jan ukax 50 maranakatwa uma juiciox purisinkäna. Ukampis akham sasaw Diosax säna: “Taqi jaqinak tukjañwa amtta” sasa. Ukat mä arka lurañamawa, familiamampiw ukar imantasiñama sasaw sarakïna (Gén. 6:13-18). Jutïr maranakanxa, Noé chachax janiw yatiqaskayaki sarnaqkänti. Jan ukasti “chiqa arunak” yatiyäna, ukasti wakiskirirakïnwa, kunattix uka tiempon jakir jaqinakar tʼunjañwa Diosax amtäna. Kuna maras Uma Juiciox jutani ukxa janis Noé chachax walja maranak nayrax yatkchïnxa, purinipuniniw sasaw suyäna, ukat purinkäna ukhasti chiqätapwa amuyasxarakïna (2 Ped. 2:5).