Mme Mbụme Oro Mme Andikot Ẹbụpde

Genesis 6:3 ọdọhọ ete: “Spirit mi idiyọhọ owo ke nsinsi koro enye edide obụk. Edi isua uwem esie edidi isua ikie ye edịp.” Ndi itien̄wed emi owụt ke Abasi ama osụhọde isua uwem owo ekenịm ke isua 120, ndien ke Noah akada isua 120 ọkwọrọ aban̄a Ukwọ?

Ibọrọ mbụme mbiba emi edi baba.

Mbemiso Ukwọ ekedide, ediwak owo ẹma ẹsidu uwem ke ata ediwak isua. Noah ekedi isua 600 ke ini Ukwọ, ndien enye akakpa ke isua 950. (Gen. 7:6; 9:29) Ediwak mbon oro ẹkemanade ke Ukwọ ama ekebe ẹma ẹdu uwem ẹbe isua 120. Arpachshad okodu uwem isua 438, ndien Shelah odu isua 433. (Gen. 11:10-15) Edi etisịm ini mme Moses, isua uwem owo ama osụhọde edisịm 80 ye 70. (Ps. 90:10) Ntre, Genesis 6:3 iban̄ake isua uwem owo.

Ke edide ntre, ndi Abasi eketịn̄ ikọ emi ọnọ Noah ete ọkọtọt ererimbot ke imọn̄ isobo mmọ ke isua 120 ke iso? Baba. Imọfiọk ke Abasi ama esineme nneme ediwak ini ye Noah. Genesis 6:13 ọdọhọ ete: “Ekem Abasi ọdọhọ Noah ete: ‘Utịt kpukpru obụkidem emedi ke iso mi, koro oto mmọ afai ọyọhọ isọn̄.’” Noah ama ọkọn̄ akaka ubom ama ke mme isua oro ẹketienede, ndien “Jehovah ọdọhọ Noah ete: ‘Afo ye ofụri ufọk fo, ẹka ẹkedụk ubom.’” (Gen. 6:13; 7:1) Enyene mme ebiet en̄wen ke Bible emi Jehovah etịn̄de ikọ ọnọ Noah.—Gen. 8:15; 9:1, 8, 17.

 Edi Genesis 6:3 enen̄ede okpụhọde ye mme itien̄wed emi; enye isiakke-siak Noah m̀mê ndidọhọ ke Abasi eketịn̄ ikọ ye enye. Ẹkeme ndida itien̄wed emi nte ekikere Abasi m̀mê se enye ekebierede ndinam. (Men Genesis 8:21 domo.) Imesikụt utọ ikọ nte, “Ndien Abasi ọdọhọ ete,” ke mbụk aban̄ade nte ẹkebotde mme n̄kpọ ke ini owo mîkakam ibotke-bot Adam kan̄a. (Gen. 1:6, 9, 14, 20, 24) Ana ata in̄wan̄-in̄wan̄ ke Jehovah ikesitịn̄ke mme ikọ emi inọ owo ke isọn̄ emi, sia owo ndomokiet ikodụhe ini oro.

Owụt ifiọk ndidọhọ ke Genesis 6:3 edi ubiere emi Abasi akanamde ke idemesie ndisobo mbiara ererimbot ini oro. Jehovah ama ebiere ndinam oro ke isua 120 oro ẹketienede, kpa ye oro Noah mîkọfiọkke n̄kpọ ndomokiet iban̄a oro. Edi ntak emi Abasi ekenịmde ibat isua oro? Ntak emi enye ekebetde ntre?

Apostle Peter ọnọ ibọrọ ete: “Ime Abasi [ekebet] ke eyo Noah, ke adan̄aemi ẹkekọn̄de ubom, emi ẹkedade ẹnyan̄a owo ifan̄, oro edi, ukpọn̄ itiaita, ebe ke mmọn̄.” (1 Pet. 3:20) Ih, enyene mme n̄kpọ emi akanade ẹnam emi akanamde Abasi enịm isua 120. Ke isua 20 ẹma ẹkebe tọn̄ọ Abasi akanam ubiere emi, Noah ye n̄wan esie ẹma ẹtọn̄ọ ndinyene nditọ. (Gen. 5:32; 7:6) Nditọiren mmọ ẹma ẹkponi ẹnyụn̄ ẹdọ iban, ntre ẹma ẹwak ẹsịm “ukpọn̄ itiaita” ke ubon Noah. Akana mmọ ẹkọn̄ ubom, ndien emi ikedịghe utom usen kiet m̀mê iba koro ubom oro ama enen̄ede okpon, n̄ko ẹma ẹwak ke ufọk mmọ. Ih, isua 120 emi Abasi ekenịmde ama ọniọn̄ ekem mmọ ndinam kpukpru emi, man ẹnyan̄a mme odu uwem n̄kpọ, emi esịnede owo itiata ke ubon Noah, emi ẹkedide mme anam-akpanikọ asan̄autom Abasi.

Bible isiakke isua emi Jehovah eketịn̄de ọnọ Noah ke Ukwọ eyedi. Edi sia nditọ esie ẹma ẹkemana, ẹkponi ẹma, ẹnyụn̄ ẹdọ iban, etie nte akayak isua 40 m̀mê 50 Ukwọ ndidi. Ndien Jehovah ama ọdọhọ Noah ete: “Utịt kpukpru obụkidem emedi ke iso mi.” Jehovah ama ọdọhọ enye ọkọn̄ akaka ubom man ẹkpeda ẹnyan̄a enye ye ubon esie. (Gen. 6:13-18) Noah ama enịm ata eti uwụtn̄kpọ edinen ido ke mme isua emi ẹkesụhọde mbemiso Ukwọ. Noah ekedi “ọkwọrọ edinen ido” emi eketịn̄de nnennen nnennen ọnọ mme owo se Abasi aduakde ndinam. Enye ama etịn̄ ọnọ mmọ ke Abasi ọmọn̄ osobo kpukpru mbon emi mîkopke uyo Esie. Abasi ikabakke isian Noah ini emi Ukwọ edidide, edi Noah ama ọfiọk ke Ukwọ eyedi. Afo ke idemfo ọmọfiọk ke Ukwọ ama edi.—2 Pet. 2:5.