Mga Pamangkot Gikan sa mga Bumalasa

Sa Genesis 6:3, aton mabasa: “Ang akon [e]spiritu indi magsumpung sing dayon sa tawo, kay sia man unud, apang ang iya mga adlaw mangin-isa ka gatus kag duha ka pulo ka tuig.” Nagapahangop bala ini nga ginpat-od ni Jehova nga ang kabuhi sang tawo indi maglampas sa 120 ka tuig, kag amo bala sina kalawig ang pagbantala ni Noe tuhoy sa nagapakari nga Anaw?

Ang sabat sa sining mga pamangkot, pareho nga indi.

Antes sang Anaw, madamo nga tawo ang nagkabuhi sing siniglo. Si Noe 600 anyos sang natabo ang Anaw, kag nagkabuhi sia sing 950 ka tuig. (Gen. 7:6; 9:29) Ang pila nga natawo pagkatapos sang Anaw nagkabuhi man sing kapin sa 120 ka tuig. Si Arpacsad napatay sa edad nga 438 kag si Sela 433. (Gen. 11:10-15) Apang sang panahon ni Moises, ang normal nga kalawigon sang kabuhi sang tawo nangin 70 ukon 80 ka tuig na lang. (Sal. 90:10) Gani ang Genesis 6:3 wala nagapat-od nga 120 ka tuig lamang ang pinakamalawig ukon normal nga kalawigon sang kabuhi sang tawo.

Kon amo, ina bala nga teksto nagapatuhoy sa ginsiling sang Dios kay Noe nga paandaman ang mga tawo sa nagapakari nga kalaglagan nga mahanabo pagligad sang 120 ka tuig? Indi. Pila ka beses nga nakighambal ang Dios kay Noe. Pagkatapos sang napulo ka bersikulo, mabasa naton: “Ang Dios nagsiling kay Noe, ‘Ang katapusan sang tanan nga unud nag-abut sa atubangan nakon; kay ang duta napun-an sing panglugus.’” Pagligad sang mga tinuig, natapos ni Noe ang daku nga hilikuton nga pagtukod sang arka, kag sa sina nga tion “ang GINOO nagsiling kay Noe, ‘Sulud ka kag ang bug-os mo nga panimalay sa arca.’” (Gen. 6:13; 7:1) Kag may iban pa nga tion nga ginsugiran  ni Jehova si Noe tuhoy sa pila ka butang.—Gen. 8:15; 9:1, 8, 17.

Apang, tuhay ang mabasa naton sa Genesis 6:3; wala ini nagsambit tuhoy kay Noe, ukon nagsambit nga sia ang ginaistorya sang Dios. Gani, mahimo ini hangpon nga isa lamang ka pagpabutyag sang Dios sang iya katuyuan ukon determinasyon. (Ipaanggid ang Genesis 8:21.) Kon talupangdon naton ang rekord sang maragtas tuhoy sa mga hitabo antes pa gintuga si Adan, mabasa naton ang mga ekspresyon subong sang: “Ang Dios nagsiling.” (Gen. 1:6, 9, 14, 20, 24) Maathag nga wala si Jehova nagapakighambal sa isa ka tawo sa duta, kay wala pa sing tawo nga natuga sadto.

Gani, makatarunganon lamang nga maghinakop nga ang Genesis 6:3 amo ang pagpabutyag sang Dios sang iya pamat-od nga laglagon ang malaut nga sistema sang mga butang sa duta. Isa ini ka hudisyal nga mando ni Jehova tuhoy sa paglaglag nga himuon niya pagligad sang 120 ka tuig, pero si Noe wala pa sing ideya tuhoy sa sini. Apang ngaa kinahanglan pa magpat-od sing tion? Ngaa amo sina kadugay?

Si apostol Pedro naghatag sing mga rason: “Mapailubon nga naghulat ang Dios sadtong mga adlaw ni Noe, samtang ginahimo ang arka, nga sa sini pila lamang ka tawo, nga amo ang walo ka kalag, ang naluwas sa tubig.” (1 Ped. 3:20) Huo, sang ginpat-od ni Jehova ang 120 ka tuig, may mga butang pa nga dapat himuon. Pagligad sang mga 20 ka tuig, si Noe kag ang iya asawa nakatigayon sang mga kabataan. (Gen. 5:32; 7:6) Nagdalagku ang ila tatlo ka kabataan kag nangasawa, amo nga ang ila pamilya nangin “walo ka kalag.” Dayon kinahanglan sila magtukod sing arka, isa ka daku nga proyekto nga indi mahapos himuon kay diutay lamang sila. Apang bangod sa pagpailob sang Dios sa sulod sang 120 ka tuig, natapos nila ang ila mga hilikuton kag walo ka matutom nga tawo ang “naluwas sa tubig.”

Wala ginasugid sang Biblia kon san-o nga tuig ginsilingan ni Jehova si Noe nga may Anaw nga mahanabo. Bangod nakatigayon pa sia sang kabataan, nagdalagku ini, kag nakapangasawa, mahimo nga 40 ukon 50 ka tuig pa ang nabilin antes sang Anaw. Dayon ang Dios nagsiling kay Noe: “Ang katapusan sang tanan nga unud nag-abut sa atubangan nakon.” Dugang pa, ginsugo niya si Noe nga magtukod sang daku nga arka kag magsulod sa sini upod sa iya pamilya. (Gen. 6:13-18) Sa nabilin nga mga dekada, wala lamang si Noe nagpahamtang sang halimbawa sang pagkamatarong. Nag-alagad sia subong “isa ka manugbantala sang pagkamatarong” nga nagapahayag sang prangka kag nagapaandam nga mensahe—nga namat-od na ang Dios nga laglagon ang mga di-diosnon nga tawo sadto nga tion. Si Noe wala nakahibalo sing abanse kon san-o nga tuig ini mahanabo, apang nahibaluan niya nga mahanabo gid ini. Kag amo gid sina ang natabo.—2 Ped. 2:5.