Nkonko ya babadi

Tudi tubala mu Genese 6:3 ne: ‘Nyuma wanyi kena utendekena bantu tshiendelele, bualu bua badi anu ba pa buloba, ne matuku abu neikale bidimu lukama ne makumi abidi.’ Yehowa uvuaku ukosela bantu bidimu bia muoyo 120 anyi? Noa uvuaku muyishe bua dilua dia mvula wa kabutu munkatshi mua bidimu bionso ebi anyi?

Diandamuna dia nkonko yonso ibidi eyi didi ne: Tòo.

Kumpala kua mvula wa kabutu, bantu bavule bavua balala bidimu nkama ya bungi. Tshilejilu, Noa uvua ne bidimu 600 pakaloka mvula au ne wakafua ne bidimu 950. (Gen. 7:6; 9:29) Bamue bantu bakaledibua panyima pa mvula au bavua balale bidimu bipite pa 120. Tshilejilu, Âpakashada wakafua ne bidimu 438 ne Shela ne 433. (Gen. 11:10-15) Kadi mu tshikondo tshia Mose, bantu bakavua benza anu bidimu 70 anyi 80. (Mus. 90:10) Nanku mu Genese 6:3, Nzambi kavua ukosela bantu bidimu bia muoyo 120 to.

Nunku, mvese eu udiku uleja muvua Nzambi muambile Noa bua adimuije bantu bua dibutuka divua ne bua kulua mu bidimu 120 anyi? Tòo. Bushuwa, Nzambi uvua wakula ne Noa misangu ya bungi. Bible udi uleja pashishe mu mvese wa 13 ne: ‘Nzambi wakambila Noa ne: Ku nshikidilu kua bantu bonso kuakufika kumpala kuanyi: bualu bua buloba budi buule tente ne mayoyo.’ Mu bidimu biakalonda, Noa wakajikija mudimu munene wa kuenza buatu ne dîba adi, ‘Yehowa wakambila Noa ne: Buela biebe mu buatu ne bantu bonso ba mu nzubu muebe.’ (Gen. 6:13; 7:1) Kuvua misangu mikuabu ivua Yehowa muleje Noa tshia kuenza.​—Gen. 8:15; 9:1, 8, 17.

 Kadi tshitudi tubala mu Genese 6:3 ntshishilangane ne tshidi mu mvese mikuabu eyi, bualu kabena batelamu Noa anyi baleja ne: Nzambi uvua umuambila bualu. Tudi mua kutshiangata bu mushindu udi Nzambi uleja tshidiye mulongolole bua kuenza anyi dipangadika diende. (Tangila Genese 8:21.) Tudi ne bua kumanya ne: mu malu adi Bible ulonda avua menzeke bidimu bia bungi kumpala kua kufukabu Adama, tudi tupeta biambilu bu mudi: “Nzambi wakamba.” (Gen. 1:6, 9, 14, 20, 24) Bidi bimueneka ne: Yehowa kavua wakula ne muntu pa buloba to, bualu kavua muanji kufuka muntu.

Nunku tudi mua kuamba ne: Genese 6:3 udi uleja dipangadika dia Nzambi dia kujikija malu mabi avua enzeka pa buloba tshikondo atshi. Yehowa wakapangadija bua kujikija malu mabi mu bidimu 120 nansha muvua Noa kayi mumanye bualu abu. Kadi bua tshinyi uvua mukose bidimu? Bua tshinyi wakindila?

Mupostolo Petelo udi utuambila tshivuaye muenzele nanku wamba ne: ‘Pakadi lutulu lua Nzambi luindila mu matuku a Noa, pakadi buatu bunene bulongolodibua, muakasungidibua bantu banya-banya, bantu muanda mukulu mene mu mâyi.’ (1 Pet. 3:20) Pavua Nzambi muangate dipangadika dia kuindila bidimu 120, kuvua malu avua akengela kuenza. Bidimu 20 pashishe, Noa ne mukajende bakatuadija kulela bana. (Gen. 5:32; 7:6) Bana babu basatu ba balume bakakola ne kusela, nunku dîku diakalua ne “bantu muanda mukulu.” Bavua ne bua kuenza buatu ne mudimu au uvua ne bua kunenga bikole bualu buatu buvua ne bua kuikala bunene ne dîku dia Noa divua ne bantu bakese tshianana. Nunku Nzambi wakindila bidimu 120 bua malu onso aa enzeke ne bua kulongolola mushindu wa kulama mioyo ya bantu muanda mukulu bavua ne lulamatu bua ‘basungidibue mu mâyi.’

Bible kena uleja tshidimu tshivua Yehowa muambile Noa ne: ke tshivua mvula mua kuloka to. Bu muvua bana bende bamane kuledibua, kukola ne kusela, kuvua mua kuikala kushale bidimu 40 anyi 50 kumpala kua mvula kuloka. Pashishe Yehowa wakambila Noa ne: ‘Ku nshikidilu kua bantu bonso kuakufika kumpala kuanyi.’ Kumuambilaye bua kuenza buatu bunene ne kubuelamu ne bena mu dîku diende bonso. (Gen. 6:13-18) Munkatshi mua bidimu biakashala, Noa kavua anu mufile tshilejilu tshia muntu muakane to. Kadi uvua kabidi “muambi wa malu mimpe” uvua ne bua kuambila bantu dipangadika dia Nzambi dia kubutula bantu babi ba tshikondo atshi. Noa kavua mudianjile kumanya tshidimu tshivua kabutu aku ne bua kulua to, kadi uvua mumanye ne: kavua ne bua kulua. Tuetu petu tudi bamanye ne: kavua kalue.​—2 Pet. 2:5.