Penjo Moa Kuom Josombwa

E Chakruok 6:3, wasomo kama: “Roho mara ok noked gi dhano ndalo duto, nikech en ringruok: to ndalone nobedi higini piero apar gi piero ariyo.” Be mano nyiso ni Jehova ne keto higini mag ngima dhano obed 120, to be Noa ne olando wach Ataro kuom higinigo?

Dwoko mar penjo ariyogo duto en ooyo.

Kapok ne Ataro obiro, thoth dhano ne dak kuom higini miche. Noa ne en jahigini 600 kane Ataro ochakore, kendo higini duto mag ngimane ne gin 950. (Chak. 7:6; 9:29) Moko kuom joma ne onyuol bang’ Ataro bende nodak kuom higini mokalo 120. Arpaksad notho ka ojahigini 438 to Shela ka ojahigini 433. (Chak. 11:10-15) Kata kamano, ka nochopo ndalo Musa, higini mag ngima dhano nosedok chien nyaka 70 kata 80. (Zab. 90:10) Omiyo, Chakruok 6:3 ne ok ket giko mar higini mag ngima dhano mondo obed 120.

Ka en kamano, be dibed ni kare ndikono nyiso ni Nyasaye nochiko Noa mondo ochiw ne jomoko siem kuom higini 120, e wi kethruok ma ne biro? Ooyo. Nyasaye ne owuoyo gi Noa nyading’eny. E siganano, wasomo kuonde abiriyo mawacho ni: ‘Nyasaye nowacho ni Noa: “Giko mar ringruok duto osebiro e nyima; niwira piny opong’ gi achach.”’ E higini ma noluwo, Noa notieko tich maduong’ mar gero yie, kendo gie kindeno ‘Jehova nowacho ni Noa: “Biuru, in kod joodi duto udonj e yie.”’ (Chak. 6:13; 7:1) Nitie ndalo mamoko bende ma Jehova nonyiso Noa weche moko.—Chak. 8:15; 9:1, 8, 17.

 Kata kamano, weche mwasomo e Chakruok 6:3 to opogore; ndikono ok hul nying’ Noa kendo wechego ok nyis ni Nyasaye ne wuoyo kode. Wanyalo kawo wechego kaka weche moa kuom Nyasaye malero dwache kuom wach moseng’ado. (Pim gi Chakruok 8:21.) Ber ng’eyo ni weche mondiki e wi gik ma ne otimore chon ka ndalo Adam ne podi, kinde mang’eny wayudo kiwachonwa ni: “Nyasaye nowacho niya.” (Chak. 1:6, 9, 14, 20, 24) Nenore maler ni Jehova ne ok wuo gi dhano moro e piny, nimar ne oyudo pok ochwe dhano.

Kuom mano, en gima winjore malong’o ng’ado ni Chakruok 6:3 nyiso wach ma Nyasaye noseng’ado mar tieko joricho e piny ndalono. Jehova noseng’ado ni ne odhi timo kamano bang’ higini 120, kata obedo ni Noa ne pok ong’eyo wachno. Ang’o momiyo Jehova noketo kinde sie kamano? Ang’o momiyo ne orito?

Jaote Petro chiwonwa gik momiyo niya: “Nyasaye ne pod ohore orito e ndalo mag Nowa, ka nonwang’o ihondho yie ma noresgo ji manok e pi, gin ji aboro.” (1 Pet. 3:20) Ee, kane Nyasaye oseng’ado wach higini 120, ne nitie gik mapod ne nyaka timre. Higini madirom 20 bang’e, Noa kod chiege nochako bedo gi nyithindo. (Chak. 5:32; 7:6) Yawuotgi adek nodongo mokendo, mi gimiyo kwan joodno omedore nyaka gichopo “ji aboro.” Kae to ne nyaka giger yie, ma ne ok en tich manyalo dhi piyo nikech ne odhi bedo maduong’ ahinya, to jood Noa ne nok. Ee, Nyasaye nohore mos kuom higini 120, kendo mano nochiwo thuolo mar timo gik moko ma ne dhi miyo ngima ji otony, kendo mano ne omiyo dhano aboro ma ne oluoro Nyasaye ‘ores e pi.’

Muma ok nyiswa higa sie ma Jehova nowachonie Noa ni Ataro ne dhi biro. Nimar ne osenyuol yawuote, mi gisedongo, kendo donjo e kend, nyalo bedo ni ne odong’ higini 40 kata 50 kapok Ataro chop. Kae to Jehova nowacho ne Noa niya: “Giko mar ringruok duto osebiro e nyima.” Ne omedo wacho ni Noa ne onego oger yie maduong’ mi bang’e odonjie gi joode. (Chak. 6:13-18) E higini pieche ma ne odong’, Noa notimo gik mang’eny e ngimane, maok mana keto ranyisi e luwo tim makare kende. Ne otiyo kaka “jayal wach makare” ma ne lando siem achiel kachiel, tiende ni wach ma Nyasaye noseng’ado mar ketho joma ne ok oluore e ndalogo. Noa ne ok ong’eyo motelo higa ma mano ne dhi timore, to nong’eyo ni higano ne nyaka chop. In bende ing’eyo ni higano nochopo.—2 Pet. 2:5.