Leeqkunaq tapukusqan

Génesis 6:3 texton nin: “Espirituyqa manan wiñaypaqchu runapi kashanqa, payqa wañuq runallan, cheqaqtapunin runaqa aychalla. P’unchayninkunapas pachak iskay chunka watalla kachun”, nispa. ¿120 watata runakuna kawsanankumantachu Jehová Dios rimasharqan? Icha, ¿Noetachu nisharqan chhayna wata predicananpaq?

Manan mayqenmantapaschu rimasharqan.

Manaraq hatun para kay pachata millp’ushaqtinqa askha runakunan unay watakuna kawsarqanku. Kay pachata unu millp’uqtinqa 600 watayoqmi Noeqa kasharqan, 950 watanpitaq wañukapurqan (Gén. 7:6; 9:29). Chay qhepamanqa 120 más watakunan runakunaqa kawsarqanku, Arpaksadmi kawsarqan 438 watakuna, Selahtaq 433 watakuna (Gén. 11:10-15). Moisespa tiemponpin ichaqa 70 otaq 80 watakunakamalla runakunaqa kawsarqanku (Sal. 90:10). Chaymi Jehová Diosqa mana rimashanmanchu karqan runakunaqa 120 watakuna kawsanankumanta.

Chhaynaqa, ¿Noetachu Jehová Dios nishanman karqan 120 watakunamanta millay runakunata tukuchipunanmanta? Manan chaytapaschu nisharqan. Bibliaqa sut’itan willan huk kutikunapi Jehová Dios paywan rimasqanmanta. Chunka versiculokuna qhepamanmi khaynata nin: “[Diosmi] Noeta nirqan: ‘Llapan kawsaqtan p’uchukachipusaq, paykuna hawa kay pacha mana chanin-kaywan hunt’a kashasqanrayku’”, nispa. Arcata ruwayta tukuqtintaq Jehová Dios “Noeta nirqan: ‘Arcaman haykuy llapa familiaykipiwan’”, nispa (Gén. 6:13; 7:1). Wak versiculokunapas qhawarichinmi imakunatawan Noeman nisqanmantaqa (Gén. 8:15; 9:1, 8, 17).

 Génesis 6:3 texton ichaqa mana Noewan Diospa rimasqanmantachu willashan. Aswanpas chay textoqa Diospa imachus yuyaykusqanmantan willashan (tupachiy Génesis 8:21). Kay pachapi manaraq runa kamasqa kasqanmanta willaspan Bibliaqa nin: “Diosmi nirqan”, nispa (Gén. 1:6, 9, 14, 20, 24). Chaypiqa manan mayqen runawanpaschu Jehová Diosqa rimasharqan, Adantapas manaraqmi kamarqanchu.

Chhaynaqa chay textoqa willashan kay pachamanta millay runakunata tukuchipunanpaq Jehová Diospa yuyaykusqanmantan. Ancha Hatun Kamachikuqmi yuyaykurqan 120 watamanta tukuchipunanpaq, Noeqa manan chayta yacharqanchu. ¿Imanaqtinmi Jehová Dios yuyaykurqan chhayna tiempomanta millay runakunata tukuchinanpaq?

Apóstol Pedron nirqan: “Chay tiempopi arcata Noé wakichishaqtinmi Diosqa pacienciawan suyasharqan. Chay arcapin pusaq runakunalla unumanta qespichisqa karqanku”, nispa (1 Ped. 3:20). Manaraq Jehová Dios millay runakunata tukuchinanpaqqa imaymanaraqmi sucedenan karqan. Iskay chunka wata qhepamanmi Noepa kurak churin nacerqan (Gén. 5:32; 7:6). Noepa familianpiqa ‘pusaq runakunan’ karqanku, paypa esposan, kinsa churinkuna esposankunapiwan. Paykunaqa Diospa kamachisqanman hinan hatunkaray arcata ruwayta qallarirqanku, pusaqllataq karqanku chayqa unay watakunapin ruwayta tukurqanku. Diospa paciencianwan suyasqan 120 watakunapiqa tukuy chaykunan sucederqan, chhaynapin ‘arcapi pusaq runakuna unumanta qespichisqa karqanku’.

Bibliaqa manan willanchu ima watapichus Jehová Dios Noeman willarqan millay runakunata chinkachipunanmanta chaytaqa. Noepa wawankunaq nacesqanmantapacha casarakapunankukamaqa askha watakunachá pasarqan, chay qhepaman millay runakunaq chinkapunan tiempo chayamunankamapas 40 otaq 50 watakuna hinan pasarqan. Imaynaña kaqtinpas, Jehová Diosqa allintan yacharqan ima tiempopichus Noeman: “Llapan kawsaqtan p’uchukachipusaq”, nispa ninantaqa. Paytan kamachirqan arcata ruwananpaq, chhaynapi familiantin chayman haykunankupaq (Gén. 6:13-18). Chay qhepamanqa tukuy atisqantan Noeqa ruwarqan Diospaq hina kawsananpaq, ‘chanin kawsaymanta willananpaqpas’, runakunatan nirqan: “Jehová Diosmi yuyaykun millay runakunata ch’usaqyachipunanpaq”, nispa. Noeqa manaña yacharqanchu hayk’aq chay sucedenanta chaypas, manan iskayrayarqanchu millay runakunata Jehová Dios chinkachipunanmantaqa (2 Ped. 2:5).