Fesili Mai le ʻAufaitau

Ua taʻua i le Kenese 6:3: “E lē faavavau ona faapalepale loʻu agaga i tagata, auā ua na o ni tagata i latou. O lea, o o latou aso e selau ma le lua sefulu tausaga ia.” Pe na faatulaga e Ieova e 120 tausaga le umi e feola ai tagata, ma po o le umi lenā na talaʻi ai e Noa le oo mai o le Lolo?

O le tali i na vaega uma e lua o le fesili, e leai.

A o lumanaʻi le Lolo, na ola tagata mo le tele o senituri. E 600 tausaga o Noa ina ua oo mai le Lolo, ma e 950 tausaga na ola ai o ia. (Kene. 7:6; 9:29) O nisi na fananau mai ina ua tuanaʻi le Lolo, e silia i le 120 tausaga na ola ai. E oti Afasata ua 438 ona tausaga, a o Selaa ua 433 ona tausaga. (Kene. 11:10-15) Ae e oo ane i taimi o Mose, ua na o le 70 pe 80 tausaga o tagata. (Sala. 90:10) O lea la, e leʻi uiga atu le Kenese 6:3 e faapea, e 120 tausaga le umi e feola ai tagata.

Ae po o lenā mau o se faatonuga a le Atua iā Noa, ia lapataʻi isi e uiga i le faaumatiaga o le a oo mai pe a uma tausaga e 120? E leai. E iai taimi na fetalai mai ai le Atua iā Noa. Ua taʻua i le fuaiupu e 13 o lenā tala: “Ua fetalai mai le Atua iā Noa: ‘⁠Ua ou iloa ua oo mai le taimi e tatau ai ona faaumatia tagata uma lava, ona ua tumu le lalolagi i faiga sauā.’” I tausaga mulimuli ane, na māeʻa ai ona fai e Noa le galuega tele o le fauina o le vaa: “Ona fetalai mai lea o Ieova iā Noa: ‘Ia e ulu atu i le vaa, o oe ma lou aiga atoa.’” (Kene. 6:13; 7:1)  E iai foʻi isi taimi na fetalai mai ai Ieova iā Noa i ni mataupu patino.—Kene. 8:15; 9:1, 8, 17.

Peitaʻi i le Kenese 6:3; e lē o taʻua mai ai Noa pe faapea na fetalai mai le Atua iā te ia. O lona uiga ua na o se faailoaga o le finagalo o le Atua. (Faatusatusa i le Kenese 8:21.) O le mea tāua, i tala i mea na tutupu a o leʻi taitai faia Atamu, ua taʻua ai faaupuga e pei o nei: “Ua fetalai ane le Atua.” (Kene. 1:6, 9, 14, 20, 24) E mautinoa e leʻi fetalai mai Ieova i se tagata i le lalolagi, auā o le taimi lenā e leʻi faia le tagata.

Ua talafeagai la ona tatou faapea atu, ua faaalia i le Kenese 6:3, ua finagalo le Atua e faaumatia le faiga amioleaga o mea i le lalolagi. Na faatulaga e Ieova e faia faapea pe a mavae tausaga e 120, ae e leʻi iloa e Noa lenā mea. Ae aiseā na faatulaga ai se taimi? Aiseā na faatali ai?

Ua taʻu mai e le aposetolo o Peteru māfuaaga: “[Na] faatalitali ma le onosaʻi le Atua i aso o Noa, ina o fausia le vaa lea na faasaoina ai mai i le vai ni nai tagata, e na o le toʻavalu lava.” (1 Pete. 3:20) Ioe, ina ua faia e le Atua lona finagalo e uiga i tausaga e 120, sa iai pea mea na tatau ona faia. I le 20 tausaga mulimuli ane, na amata ai ona maua ni fanau a Noa ma lana avā. (Kene. 5:32; 7:6) Na tutupu aʻe le la fanau tama e toʻatolu ma faaipoipo, ma maua ai le aiga e “toʻavalu.” Sa tatau ona latou fauina le vaa, ma e lē o se galuega faigofie pe a fua i le telē o le vaa ma le toʻaitiiti o le aiga. Ioe, o le onosaʻi o le Atua mo tausaga e 120, na mafai ai ona faataunuu na mea ma maua ai se auala e “faasaoina ai mai i le vai” tagata faamaoni e toʻavalu.

E lē o taʻua i le Tusi Paia le tausaga na taʻu atu e Ieova iā Noa o le a oo mai ai le Lolo. Talu ai na fananau mai ona atalii, tutupu aʻe ma faaipoipo, atonu la pe tusa ma le 40 pe 50 tausaga na totoe a o leʻi oo mai le Lolo. Ona fetalai mai lea o Ieova iā Noa: “Ua ou iloa ua oo mai le taimi e tatau ai ona faaumatia tagata uma lava.” Na ia fetalai atili mai iā Noa ia fau se vaa telē ma ulu atu i ai i totonu ma lona aiga. (Kene. 6:13-18) A o faagasolo ia tausaga, e lē gata na faataatia e Noa se faaaʻoaʻoga o se olaga amiotonu, ae e iai foʻi se isi mea na ia faia. Na avea o ia ma “lē e talaʻi le amiotonu” ma faailoa atu se feʻau lapataʻi e faapea, ua finagalo le Atua e faaumatia tagata amiolētonu i lenā taimi. E leʻi iloa e Noa le tausaga o le a tupu ai lenā mea, ae na ia mautinoa o le a oo mai. O le mea lenā na tupu.—2 Pete. 2:5.