Aksi fu leisiman

Genesis 6:3 e taki: „Mi no o abi pasensi moro nanga sma fu di den na libisma nomo. Dati meki den o libi ete wán hondro tutenti yari.” A de so taki Yehovah ben bosroiti taki libisma no ben o libi moro langa leki 120 yari? A de so taki na 120 yari langa Noa ben preiki taki a Frudu ben o kon?

A piki tapu ala den tu aksi disi na, nôno.

Bifo a Frudu, furu sma ben e libi hondrohondro yari langa. Noa ben abi 600 yari di a Frudu kon, èn a dede di a ben abi 950 yari (Gen. 7:6; 9:29). Son sma di ben gebore baka a Frudu, ben e kon owru omeni yari pasa 120 yari. Fu eksempre, Arpaksad dede di a ben abi 438 yari, èn Sela dede di a ben abi 433 yari (Gen. 11:10-15). Ma na ini a ten fu Moses, furu sma no ben e kon owru moro leki 70 noso 80 yari (Ps. 90:10). Sobun, den wortu na Genesis 6:3, no wani taki dati sma no ben o kon owru moro leki 120 yari.

We, a de so dan taki a vers dati na wan boskopu di Gado e gi Noa fu warskow sma gi a pori di ben o kon baka 120 yari? Nôno. A tru taki Gado ben taki nanga Noa na tra okasi. Na Genesis 6:13 wi e leisi: „Gado taigi Noa: ’A ten doro fu mi pori ala libisma, fu di den meki taki grontapu kon lai nanga ogridu.’” Na ini den yari baka dati, Noa klari a bigi wroko di a ben kisi fu bow na ark, èn na a ten dati „Yehovah taigi Noa: ’Go na ini na ark, yu, makandra nanga yu heri osofamiri’” (Gen. 7:1). Èn tra okasi de tu di Yehovah taigi Noa spesrutu sani.—Gen. 8:15; 9:1, 8, 17.

Ma Genesis 6:3 e difrenti fu den tekst di ben  kari na fesi. A tekst dati no e taki fu Noa, èn a no e taki tu dati Gado ben e taki nanga Noa. Wi kan si den wortu fu a tekst dati leki wan sani di Gado ben taki fu sori taki trutru a ben o du san a ben abi na prakseri. (Luku Genesis 8:21.) A moi fu sabi taki te wi e luku den tori di e fruteri sortu sani ben pasa langa ten bifo Adam ben de na libi, dan wi e leisi wortu soleki: „Gado ben taki” (Gen. 1:6, 9, 14, 20, 24). A de krin taki Yehovah no ben e taki nanga wan sma na grontapu, bika a no ben meki libisma ete.

Dati meki wi kan frustan taki Genesis 6:3 abi fu du nanga a fasti bosroiti di Gado abi fu tyari wan kaba kon na a ogri sistema na grontapu. Yehovah ben bosroiti na fesi san a ben o du baka 120 yari, ma Noa no ben sabi fu dati ete. Ma fu san ede a ben o wakti 120 yari langa fosi a tyari a kaba kon?

Na apostel Petrus e taigi wi fu san ede dati ben de so. A e taki: „Gado ben e wakti nanga pasensi na ini a ten fu Noa; na a ten dati Noa ben e meki na ark di tyari wan tu sma nomo, namku aiti sili, pasa a watra libilibi” (1 Petr. 3:20). Iya, di Gado bosroiti taki a ben o pori libisma baka 120 yari, dan moro sani ben de fu du ete. Sowan 20 yari baka dati, Noa nanga en wefi bigin meki pikin (Gen. 5:32; 7:6). Den dri manpikin fu den gro kon bigi, den trow, èn te fu kaba „aiti sili” ben de na ini a famiri. Den ben musu bow na ark, èn disi no ben de wan wroko di den ben kan du esi-esi, fu di na ark ben bigi, èn furu sma no ben de na ini a famiri fu Noa. Iya, fu di Gado ben hori pasensi 120 yari langa, meki ala den sani dati ben kan pasa, èn na so sma ben o man kisi frulusu. Iya, te fu kaba aiti libisma di ben e gi yesi na Yehovah, ben kan „pasa a watra libilibi”.

Bijbel no e taki na ini sortu yari Yehovah ben taigi Noa taki a Frudu ben o kon. Baka di den manpikin fu en gebore, teleki den gro kon bigi èn den trow, a kan taki sowan 40 noso 50 yari ben tan ete fosi a Frudu ben kon. Baka dati, Yehovah taigi Noa: „A ten doro fu mi pori ala libisma.” A ben taki tu dati Noa ben musu bow wan bigi ark èn en nanga en osofamiri ben musu go na ini (Gen. 6:13-18). Na ini den someni yari di ben tan abra ete, a no ben de so nomo taki Noa ben libi na wan regtfardikifasi. A ben e dini tu leki „wan preikiman fu regtfardikifasi” di ben musu meki wan krakti boskopu bekènti. Iya, a ben musu warskow sma taki Gado ben abi a fasti bosroiti fu pori den ogrisma fu a ten dati. Noa no ben sabi langa na fesi na ini sortu yari dati ben o pasa, ma a ben sabi taki a ben o kon trutru, soleki fa yusrefi sabi.—2 Petr. 2:5