Pergunta husi lee-naʼin

Iha Gênesis 6:3 hatete: “Haʼu-nia pasiénsia ba ema sei la hela ba nafatin tanba nia mak ema deʼit. Tan neʼe, ninia loron sira sei toʼo atus ida ruanulu.” Ida-neʼe katak Maromak la husik ema atu moris liu fali tinan 120 ka lae? No Noé halo serbisu haklaken kona-ba Rai-Nabeen neʼebé atu mai ba tinan 120 ka lae?

Resposta ba pergunta rua neʼe mak lae.

Antes Rai-Nabeen, ema barak moris ba tinan atus balu. Noé nia tinan 600 kuandu Rai-Nabeen mosu, no nia kontinua tan atu moris toʼo tinan 950. (Gên 7:6; 9:29) Ema balu neʼebé moris depois Rai-Nabeen mós iha tinan liu 120. Porezemplu, Arfaxad mate ho idade 438 no Sela ho idade 433. (Gên 11:10-15) Maibé, iha Moisés nia tempu, baibain ema nia tinan toʼo 70 ka 80 deʼit. (Sal 90:10) Tan neʼe, Maromak nia liafuan iha Gênesis 6:3 laʼós atu hatudu katak nia la husik ema atu halaʼo moris liu tinan 120.

Entaun, versíkulu neʼe mak hanesan liafuan neʼebé Maromak hatoʼo ba Noé kona-ba ninia hakarak atu halakon ema aat sira iha tinan 120 neʼebé atu mai ka lae? Lae. Dala ruma Maromak koʼalia duni ba Noé. Porezemplu, iha versíkulu balu tuirmai depois versíkulu neʼe, hatete: “Maromak koʼalia ba Noé: ‘Buat moris hotu nia rohan toʼo ona, tanba rai nakonu ho violénsia.’” No tinan balu tuirmai, Noé ramata atu halo serbisu hodi harii ró neʼebé hanesan kaixote boot, no iha tempu neʼebá “Maromak Jeová hatete ba Noé: ‘Bá, ó no ó-nia família hotu, bá tama iha ró’”. (Gên 6:13; 7:1) No iha mós tempu seluk neʼebé Maromak Jeová fó-hatene ba Noé informasaun ruma.—Gên 8:15; 9:1, 8, 17.

 Maibé, iha Gênesis 6:3 ita la haree liafuan neʼebé hatudu katak Maromak koʼalia ba Noé. Karik versíkulu neʼe mak hanesan liafuan sira neʼebé hatudu kona-ba Maromak nia hakarak ka buat neʼebé nia deside atu halo. (Kompara ho Gênesis 8:21) Hanoin-hetan mós katak iha istória kona-ba buat neʼebé akontese kleur antes Maromak kria Adão, ita lee liafuan hanesan: “Maromak hatutan tan dehan.” (Gên 1:6, 9, 14, 20, 24) Klaru katak iha tempu neʼe Maromak Jeová la koʼalia ba ema ruma iha rai, tanba nia seidauk kria ema.

Tan neʼe, ita mós bele fiar katak liafuan iha Gênesis 6:3 hatudu kona-ba desizaun neʼebé Maromak halo atu halakon buat aat hotu husi rai. Maromak sei halaʼo ninia tesi-lia iha tinan 120 oin mai, maski Noé la hatene kona-ba neʼe. Maibé tanbasá mak Maromak halo desizaun kona-ba tinan 120? Tanbasá mak nia hein?

Apóstolu Pedro nia liafuan tuirmai neʼe hatudu kona-ba razaun balu, nia hatete: “Iha Noé nia loron, wainhira Noé halo ró boot ida, Maromak hatudu pasiénsia barak ba sira. Sira uitoan deʼit, katak ema naʼin-ualu, mak hetan maksoin husi bee.” (1 Ped 3:20) Sin, Maromak halo desizaun atu hein tan tinan 120 tanba sei iha buat barak tan atu halo. Tinan 20 depois tempu neʼe, Noé no ninia feen komesa atu iha oan sira. (Gên 5:32; 7:6) Sira-nia oan naʼin-tolu sai boot no kaben, no tan neʼe ema iha Noé nia família agora “naʼin-ualu” ona. Tuirmai sira presiza harii ró neʼebé hanesan kaixote boot, no ida-neʼe laʼós serbisu neʼebé fasil tanba neʼe boot tebes no Noé nia família mak kiʼik deʼit. Sin, tanba Maromak hatudu nia pasiénsia ba tinan 120, serbisu sira-neʼe bele halo toʼo ramata no bele salva moris, katak ema laran-metin naʼin-ualu bele “hetan maksoin husi bee”.

Bíblia la fó sai kona-ba tinan neʼebé Maromak Jeová koʼalia ba Noé kona-ba nia planu atu hamosu Rai-Nabeen. Tanba Noé nia oan sai boot no kaben ona, ida-neʼe karik hatudu katak iha tinan 40 ka 50 tan mak mosu Rai-Nabeen. Iha tempu neʼe mak Maromak Jeová hatete ba Noé: “Buat moris hotu nia rohan toʼo ona.” Nia hatutan tan katak Noé tenke harii ró ida neʼebé hanesan kaixote boot no nia presiza tama iha laran hamutuk ho ninia família. (Gên 6:13-18) Durante tinan sira-neʼe, Noé hatudu ezemplu diʼak hodi halaʼo moris tuir Maromak nia hakarak. No nia mós halo buat ida tan neʼebé importante, neʼe mak sai nuʼudar haklaken-naʼin kona-ba “justisa”. Nia fó avizu ho klaru katak Maromak deside ona atu halakon ema sira iha tempu neʼebá, neʼebé la moris tuir Maromak nia matadalan. Ba tempu kleur Noé la hatene kona-ba tinan neʼebé buat sira-neʼe sei mosu, maibé nia hatene katak ida-neʼe sei mai duni. No ita hatene katak neʼe mosu duni.—2 Ped 2:5.