Sambilileni Icebo ca kwa Lesa

Mulandu Nshi Tulingile Ukusambilila Kuli Lesa?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.

1. Mulandu nshi tulingile ukusambilila kuli Lesa?

Lesa alikwatila abantunse imbila nsuma ya fintu ifisuma. Alatweba iyi mbila nsuma muli Baibolo. Baibolo yaba kwati ni kalata iyo Shifwe wa ku muulu uwatutemwa atulembela.—Belengeni Yeremia 29:11.

2. Imbila nsuma cinshi?

Abantunse balakabila ubuteko ubusuma. Takwatala akuba kateka umuntunse uwafumyapo ulubuli, ulufyengo, amalwele, nelyo imfwa. Lelo kwaliba imbila nsuma. Lesa akaleta ubuteko ubusuma ubukafumyapo fyonse ifilenga abantu ukucula.—Belengeni Daniele 2:44.

3. Mulandu nshi ukusambilila kuli Lesa kwacindamina?

Nomba line fye, Lesa ali no konaula abantu bonse abalenga ukuti pano calo pabe amacushi. Lelo pali ino nshita alesambilisha iminshipendwa ya bantu abafuuka ukutemwana pa kuti baleikala bwino. Ukubomfya Icebo ca kwa Lesa, abantu balesambilila ifya kupwisha nelyo ukushipikisha amafya bakwata, ifya kusanga insansa sha cine cine, ne fya kusekesha Lesa.—Belengeni Sefania 2:3.

4. Nani walembele Baibolo?

Muli Baibolo mwaba amabuuku ayanono 66. Abalembele aya mabuuku baume 40. Amabuuku ya kubalilapo 5 yalembelwe na Mose imyaka nalimo 3,500 iyapita. Ilya kulekeleshako lyalembelwe no mutumwa Yohane imyaka ukucila 1,900 iyapita. Lelo abalembele Baibolo balelemba ifyo Lesa alefwaya balembe, tabalembele ifya mu mitwe yabo. Kanshi Lesa e walembele Baibolo.—Belengeni 2 Timote 3:16; 2 Petro 1:21.

Twalishiba ukuti Baibolo yafuma kuli Lesa pantu ilalondolola bwino sana ifikacitika ku ntanshi. Takwaba umuntu nangu umo uwingacita ifi. (Esaya 46:9, 10) Na kabili, Baibolo ilalondolola bwino sana imibele ya kwa Lesa. Baibolo yalikwata amaka ya kwalula abantu. Ifi fishinka filalenga abantu abengi nga nshi ukushininkisha ukuti Baibolo Cebo ca kwa Lesa.—Belengeni Yoshua 23:14; 1 Abena Tesalonika 2:13.

5. Kuti mwacita shani pa kuti mumfwikishe ifyalembwa mu Baibolo?

Yesu alesambilisha sana Icebo ca kwa Lesa. Nangu ca kutila abantu aleshimikilako balishibe Amalembo, balekabila uwa kubafwa ukumfwikisha ifyalembwamo. Pa kubafwa ukumfwikisha, lyonse aleambula amashiwi yalekanalekana ayalembwamo no kulondolola “umwalola Amalembo.” Ici cipande ica kulati, “Sambilileni Icebo ca kwa Lesa,” cakulalondolola amalembo mu nshila imo ine pa kuti mwingomfwikisha ifyaba mu Baibolo.—Belengeni Luka 24:27, 45.

Ilyo mwakulasambilila fimo pa mulandu Lesa abumbile abantu, mwakulamona kwati mulesambilila fye kuli Lesa umwine. Lelo abantu bamo tabakatemwe ukumumona mulebelenga Baibolo. Mwikanenuka pantu nga mwaishiba fye Lesa, e lyo mukakwata ishuko lya kuba no mweo wa muyayaya.—Belengeni Mateo 5:10-12; Yohane 17:3.

Nga mulefwaya ukwishibilapo na fimbi, belengeni icipandwa 2 icaba muli ici citabo citila Bushe Cinshi Baibolo Isambilisha? icalembwa ne Nte sha kwa Yehova.