Me Sauma na iVolatabu

Na Cava me Vakavulici Keda Kina na Kalou?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. Na cava me vakavulici keda kina na Kalou?

E tiko na itukutuku vinaka e vinakata na Kalou meda kila qai vakatakila qori ena iVolatabu. Qo na nona ivola vei keda na Tamada vakalomalagi dauloloma.​—Wilika Jeremaia 29:11.

2. Na cava na itukutuku vinaka?

Eda gadreva na kawatamata e dua na matanitu vinaka. Se sega ni dua na iliuliu e vuravura me vakaotia na itovo kaukaua, cakacaka tawadodonu, tauvimate, se mate. Ia e tiko na itukutuku vinaka. Ena tauyavutaka na Kalou e dua na matanitu vinaka me baleti keda na kawatamata. Ena sereki keda mai na veika kece ga e vakavuna na rarawa.​—Wilika Taniela 2:​44.

3. Na cava e bibi kina me vakavulici keda na Kalou?

Sa voleka sara me vakarusai ira na vakavuna tiko na rarawa na Kalou. Ena gauna qo e vakavulici ira tiko e le milioni na yalomalumalumu mera marautaka na bula e vinaka cake ena nodra veilomani. Era vulica ena Vosa ni Kalou na sala mera walia kina na nodra leqa, kunea na marau dina, kei na ka mera cakava mera vakamarautaka kina na Kalou.​—Wilika Sefanaia 2:⁠3.

  4. O cei e vakavuna na volai ni iVolatabu?

E 66 na ivola e tiko ena iVolatabu, qai rauta ni 40 na tagane era vola. A vola na imatai ni lima na ivola o Mosese ena rauta na 3,500 na yabaki sa oti. Na iotioti ni ivola a vola na yapositolo o Joni ena 1,900 vakacaca na yabaki sa sivi. Ia era vola na dauvolaivolatabu na nona vakasama na Kalou sega ni nodra ga. Na Kalou gona e vakavuna na volai ni iVolatabu.​—Wilika 2 Timoci 3:​16; 2 Pita 1:​21.

Eda kila ni Kalou e vakavuna na iVolatabu ni tukuna tu mai vakamatailalai na veika se bera ni yaco. Sega tale ni dua e rawa ni cakava qori. (Aisea 46:​9, 10) E tukuna tale ga na iVolatabu na nona itovo na Kalou. Na Vosa ni Kalou e veisautaka na bula ni tamata me vinaka. Na veika kece qo era vakadeitaka kina e le milioni ni iVolatabu e Vosa ni Kalou.​—Wilika Josua 23:14; 1 Cesalonaika 2:​13.

5. O na kila vinaka vakacava na iVolatabu?

E kilai o Jisu me qasenivuli ni Vosa ni Kalou. Levu a vosa vei ira o Jisu era kila tu na iVolatabu, ia ena gadrevi mera vukei mera kila vinaka sara. A cakava qo o Jisu ena nona vakayagataka e vica na tikinivolatabu qai vakamacalataka na kedra “ibalebale.” Na ulutaga gona qo, “Me Sauma na iVolatabu,” e vakayagataka na iwalewale vata qori me vukei iko.​—Wilika Luke 24:​27, 45.

E tiko eso na ka talei eda via kila me vaka na nona vakavulici keda na Kalou me baleta na inaki ni noda bula. Ia era na rairai sega ni taleitaka eso ni o vulica na iVolatabu. Mo kua ni yalolailai. Na nomu nuitaka na bula tawamudu e vakatau ena nomu kila na veika me baleta na Kalou.​—Wilika Maciu 5:​10-​12; Joni 17:⁠3.

Me ikuri ni ivakamacala, raica na wase 2 ni ivola qo, Na Cava Sara Mada e Kaya na iVolatabu?, e tabaka na iVakadinadina i Jiova.