Agsursuroka iti Sao ti Dios

Apay nga Agsursuroka iti Dios?

Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kadagiti sungbat.

1. Apay nga agsursuroka iti Dios?

Adda naimbag a damag ti Dios agpaay iti sangatauan. Ilawlawagna dayta iti Biblia. Ti Biblia ket mayarig iti surat manipud iti naayat nga Amatayo idiay langit.​—Basaem ti Jeremias 29:11.

2. Ania ti naimbag a damag?

Agkasapulan ti sangatauan iti nasayaat a gobierno. Awan pay ti agturay ditoy lubong a nakaikkat iti kinaranggas, di kinahustisia, sakit, wenno ipapatay. Ngem adda naimbag a damag. Ti Dios ipaayannanto ti sangatauan iti nasayaat a gobierno a mangikkat iti amin a pakaigapuan ti panagsagaba.​—Basaem ti Daniel 2:44.

3. Apay a napateg nga agsursuroka iti Dios?

Din agbayag, pukawento ti Dios dagiti tattao a pakaigapuan ti panagsagaba. Kabayatanna, sursuruanna ti minilion a naemma a tattao no kasano a maaddaanda iti nasaysayaat a panagbiag, a naibatay iti ayat. Manipud iti Sao ti Dios, masursuro dagiti tattao no kasano a mapagballigian dagiti parikut iti biag, no kasano a mabirokan ti pudpudno a kinaragsak, ken no kasano a paragsaken ti Dios.​—Basaem ti Sofonias 2:3.

  4. Asino ti Autor ti Biblia?

Ti Biblia ket buklen ti 66 a babassit a libro. Agarup 40 a lallaki ti nangisurat kadagita. Ti umuna a lima a libro ket insurat ni Moises agarup 3,500 a tawen ti napalabasen. Ti maudi a libro ket insurat ni apostol Juan nasurok a 1,900 a tawen ti napalabasen. Ngem dagiti kapanunotan ti Dios ti insuratda imbes a ti bukodda a kapanunotan. Isu a ti Dios ti Autor ti Biblia.​—Basaem ti 2 Timoteo 3:16; 2 Pedro 1:21.

Ammotayo a ti Biblia ket manipud iti Dios agsipud ta detalyado nga ipadtona dagiti mapasamak iti masanguanan. Awan ti tao a makaaramid iti dayta. (Isaias 46:9, 10) Kasta met, ipalgak kadatayo ti Biblia dagiti kualidad ti Dios. Adda bilegna a mangpasayaat iti biag dagiti tattao. Gapu kadagitoy, minilion a tattao ti nakombinsir a ti Biblia ket Sao ti Dios.​—Basaem ti Josue 23:14; 1 Tesalonica 2:13.

5. Kasanom a matarusan ti Biblia?

Nagbalin a nalatak ni Jesus kas mannursuro iti Sao ti Dios. Nupay kaaduan kadagiti tattao a nakasaritana ket pamiliar iti Biblia, kasapulanda ti tulong a mangtarus iti dayta. Tinulongan ida ni Jesus babaen ti panangibinsabinsana kadagiti teksto ti Biblia sa inlawlawagna ti “kaipapanan dagiti Kasuratan.” Daytoy a benneg nga “Agsursuroka iti Sao ti Dios” ket tumulong kenka iti kasta met laeng a pamay-an.​—Basaem ti Lucas 24:27, 45.

Awanen ti ad-adda pay a makapainteres ngem iti panagsursuro iti Dios maipapan iti panggep ti biag. Ngem mabalin a saan a maragsakan ti dadduma no basbasaem ti Biblia. Saanka a maupay. Ti namnamam a maaddaan iti agnanayon a biag ket agdepende iti panangam-ammom iti Dios.​—Basaem ti Mateo 5:10-12; Juan 17:3.

Para iti kanayonan nga impormasion, kitaem ti kapitulo 2 daytoy a libro Ania a Talaga ti Isursuro ti Biblia? nga impablaak dagiti Saksi ni Jehova.