Wuhrẹ No Ẹme Ọghẹnẹ ze

Fikieme Ma je Wuhrẹ Mi Ọghẹnẹ?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Fikieme Ma je Wuhrẹ Mi Ọghẹnẹ?

Ọghẹnẹ o wo emamọ usi orọ eware ezi rọkẹ ahwo-akpọ. Ọ vuẹ omai kpahe onana evaọ Ebaibol na. Ebaibol na ọ wọhọ ileta nọ i no obọ Ọsẹ oyoyou obọ odhiwu mai ze.—Se Jerimaya 29:11.

2. Eme họ emamọ usi na?

Ahwo-akpọ a gwọlọ emamọ isuẹsu. Osu ahwo-akpọ ọvo ọ rẹ sai si ozighi, okienyẹ, ẹyao, hayo uwhu n’otọ kẹ ahwo-akpọ họ. Rekọ emamọ usi jọ o riẹ. Ọghẹnẹ ọ te kẹ ahwo-akpọ emamọ isuẹsu nọ e te wha ufuoma rono oware kpobi nọ o rẹ wha uye-oruẹ ze.—Se Daniẹl 2:44.

3. Fikieme u je wuzou re ma wuhrẹ mi Ọghẹnẹ?

Kẹle na, Ọghẹnẹ o ti si ahwo nọ a be wha uye-oruẹ kpobi ze no otọakpọ na. Makọ enẹna, o bi wuhrẹ ima ahwo omaurokpotọ buobu epanọ a sai ro yeri emamọ uzuazọ, orọ uyoyou. Ahwo a be jọ Ẹme Ọghẹnẹ, Ebaibol na wuhrẹ epanọ a sai ro yeri kugbe ebẹbẹ, epanọ a sai ro wo uvi evawere, gbe epanọ a re ro ru eva were Ọghẹnẹ.—Se Zefanaya 2:3.

  4. Ono o wo eme Ebaibol na?

Ebe udhosa gbe ezeza sa-sa e rrọ Ebaibol na. Ezae udhuvẹ a kere i rai. Mosis ọye o kere ebe isoi ọsosuọ na oware wọhọ ikpe idu esa gbe egba isoi (3,500) nọ i kpemu. Jọn ukọ na họ ọnọ o kere obe urere na oware wọhọ ikpe odu ọvo gbe egba izii (1,900) nọ i kpemu. Rekọ iroro Ọghẹnẹ ahwo na a kere, orọnọ orọ obọrai hi. Fikiere Ọghẹnẹ họ Ọnọ o wo eme Ebaibol na.—Se 2 Timoti 3:16; 2 Pita 1:21.

Ma riẹ nọ obọ Ọghẹnẹ Ebaibol na o no ze keme eware nọ a jariẹ ruẹaro rai kpahotọ i gine rugba. Uvumọ ohwo ọ sai ru oyena ha. (Aizaya 46:9, 10) Ofariẹ, Ebaibol o dhesẹ oghẹrẹ nọ Ọghẹnẹ ọ rrọ vevẹ. Ebaibol na o wo ẹgba nọ o re ro nwene uzuazọ ahwo. Eware nana e kẹ ima ahwo buobu imuẹro inọ Ebaibol na yọ Ẹme Ọghẹnẹ.—Se Joshua 23:14; 1 Ahwo Tẹsalonika 2:13.

5. Ẹvẹ whọ sai ro wo otoriẹ Ebaibol na?

A riẹ Jesu wọhọ owuhrẹ Ẹme Ọghẹnẹ. Dede nọ ibuobu ahwo nọ o je wuhrẹ a riẹ Ebaibol na, a gbẹ gwọlọ obufihọ re a sai wo otoriẹ riẹ. Re u fi obọ họ kẹ ae, Jesu ọ jẹ hae fodẹ eria ikere sa-sa je ru ae riẹ “otọ ikerakere na.” Uzoẹme nana “Wuhrẹ No Ẹme Ọghẹnẹ Ze” nọ o te hae roma via na, o te rọ edhere ọvona fi obọ họ kẹ owhẹ.—Se Luk 24:27, 45.

Eware nọ e rẹ kẹ omawere te ẹjiroro uzuazọ nọ ma re wuhrẹ mi Ọghẹnẹ i bu hu. Rekọ ẹsejọhọ o te were ahwo jọ họ inọ who bi se Ebaibol na. Whọ kuvẹ re onana o whaha owhẹ hẹ. Re whọ sai wo uzuazọ ebẹdẹ bẹdẹ o roma hwa Ọghẹnẹ nọ whọ rẹ riẹ.—Se Matiu 5:10-12; Jọn 17:3.

Rọkẹ evuẹ efa, rri uzou avọ 2 orọ obe nana, Eme Ebaibol na O Gine Wuhrẹ? onọ Isẹri Jihova a kere.