Guutip oqaasia ilinniarfigiuk

Sooq Guutimit ilinniartinneqarumasariaqarpugut?

Apeqqutit immaqa eqqarsaatiginikuusatit allaaserisami matumani sammineqassapput, aamma apeqqutinut taakkununnga akissutit illit nammineq Biibilinni sumi atuarsinnaaneritit paasissutissiissutigineqartassaaq. Jehovap Nalunaajaasuisa illit peqatigalutit apeqqutinut taakkununnga akissutit taakku sammerusukkaluarpaat.

1. Sooq Guutimit ilinniartinneqarumasariaqarpugut?

Guuti inuiannut nuannersumik nutaarsiassaateqarpoq. Nutaarsiassaq tamanna Biibilimi eqqartorpaa. Biibili Ataatatsinnit qilammiusumit asannittumit allagarsiatsitut ippoq. — Atuaruk Jeremia 29:11.

2. Nutaarsiassaq nuannersoq suugami?

Inuiaat iluamik aqutsisunik naalakkersuisoqarnissartik pisariaqartippaat. Nunarsuarmi naalakkersuisut arlaannaataluunniit inuit nakuusernermit, naapertuilluanngissusermit, nappaatinit toqumillu aniguisissinnaanngilai. Nuannersumilli nutaarsiassaqarpoq. Guutip inuit naalliuutaannut pissutaasunit tamanit aniguisitsisussamik iluamik aqutsisunik naalakkersuisoqalernissaat isumagissavaa. — Atuaruk Danieli 2:44.

3. Sooq Guutimit ilinniartinneqarumanissarput pingaaruteqarpa?

Guuti qanittukkut nunarsuarmik minguiaassaaq inuit naalliuttoqartarneranut pissutaasut piiarlugit. Tamanna pinngikkallartillugu inuit maniguuttut millionillit asanninneq tunngavigalugu qanoq pitsaanerusumik inuulersinnaanerannik ilinniartippai. Inuit Guutip oqaasia atorlugu, inuunermi ajornartorsiutinik qanoq iliuuseqarfiginnissinnaanertik qanorlu ilillutik piviusumik pillualersinnaanertik Guutimillu qanoq ilillutik nuannaartitsisinnaanerlutik, ilikkartarpaat. — Atuaruk Sefania 2:3.

  4. Kina Biibilimik atuakkiortuua?

Biibili atuagaaqqanit 66-init katitigaavoq angutinillu 40-t missaanniittunit allanneqarluni. Atuakkat, imaluunniit allakkat, siulliit tallimat Mosesimit ukiut 3500-t missiliorlugit matuma siorna allanneqarput. Atuagaq kingulleq apustilip Johannesip ukiut 1900-t sinnerlugit matuma siorna allappaa. Biibilimilli allattut namminneq eqqarsaatitik pinnagit Guutip eqqarsaatai allappaat. Tassa Guutiuna Biibilimik atuakkiortuusoq. — Atuakkit 2 Timotheusi 3:16; 2 Petrusi 1:21.

Biibilimi siunissamut siulittuutit eqqoqqissaartuunerat pissutigalugu nalunngilarput Biibili Guutimeersuusoq. Inuit taamatut siulittuisinnaanngillat. (Esaja 46:9, 10) Aamma Guutip qanoq asannitsiginera Biibilimi erseqqilluinnarpoq. Guutip oqaasia iluaqutigalugu inuit inuunertik allanngortissinnaanngortarpaat pitsaanerusunngortillugu. Tamakku pissutigalugit inuit millionillit Biibili Guutip oqaaserigaa qularutigiunnaarsimavaat. — Atuakkit Josva 23:14; 1 Thessalonikamiut 2:13.

5. Illit Biibili qanoq ilillutit paasisinnaaviuk?

Jiisusip Guutip oqaasia pillugu ilinniartitsisarnini ilisimaneqaatigaa. Oqaloqatigisaasa amerlanersaat Allakkanik ilisimannilluaraluarlutik taakkuninnga paasinninnissamut ikiorneqartariaqarsimapput. Jiisusi taakku ikiorumallugit allassimaffinnik innersuussisaqattaartarpoq qanorlu paasisariaqarnerannik nassuiaasarluni, taakku ‘Allakkanik paasinnissinnaalersillugit’. Allaaserisani “Guutip oqaasia ilinniarfigiuk”-mik qulequtalinni, aalajangersimasumik ilanngunneqartartussani, illit ikiorniarlutit tamannattaaq periaaserineqartassaaq. — Atuakkit Lukasi 24:27, 45.

Inuunerup qanoq siunertaqarneranik Guutimit ilinniartinneqarnermit tiguartinnarnerusut arlaqanngillat. Immaqali illit Biibilimik misissuinerit inuit ilaasa nuannarissanngilaat. Tamanna nikalluutigissanngilat. Illit Guutimik ilisarisimannilerniarlutit iliuuseqaruit aatsaat naassaanngitsumik inuulersinnaavutit. — Atuakkit Matthæusi 5:10-12; Johannesi 17:3. (wp11 01/01-E)

Paasissutissat amerlanerusut atuakkami matumani Biibilimi sorpiaat ajoqersuutigineqarpat?-miipput, kapitali 2-miipput. Jehovap Nalunaajaasuinit saqqummersinneqartoq.