Dizenu Nsañu Yidi Mwizu Danzambi

Muloñadi Wakudizila Kudi Nzambi?

Ichi chibaaba chikweti malwihu imwadihulahu dehi nawa chinakushimuna nsona yimwatela kutaña hakuwana ñakwilu muBayibolu yenu. A Yinsahu jaYehova anateli kuhanjeka nenu hakwakula awa malwihu.

1. Muloñadi wakudizila kudi Nzambi?

Nzambi wukweti nsañu yayiwahi yayuma yayiwahi yakuleja antu. Watulejaña iyi nsañu kuhitila muBayibolu. Bayibolu yidi neyi mukanda wakufuma kudi Tata yetu wamwiwulu wukweti kukeña.—Tañenu Yeremiya 29:11.

2. Nsañu yayiwahi hichumanyi?

Antu anakukeña nfulumendi yayiwahi. Chiyuulu chawantu chinakañanyi kukuula antu kumadombu, kukutama, kuyikatu nikukufwa. Hela chochu, kudi nsañu yayiwahi. Nzambi wakayinka antu nfulumendi yayiwahi yakakuula antu kuyuma yejima yakojejaña makabi.—Tañenu Danyeli 2:44.

3. Muloñadi kudizila kudi Nzambi chikwalemena?

Nzambi keña yafumishuhu antu aletaña makabi heseki. Chayinu mpinji nakudizisha antu amavulu adizoza kulonda ashakameña chiwahi nikumukeña Nzambi niantuñi nawu. Muloña wakudiza Izu daNzambi, antu anakwiluka chiyatela kuumika kukala kwamonañawu muchihandilu, chakwikala amuzañalu, nichakumuzañalesha Nzambi.—Tañenu Zefwaniya 2:3.

4. Indi Nsoneki yaBayibolu hinyi?

MuBayibolu mwekala nyikanda yanyana 66. Ayisonekeli kudi antu 40. Nyikanda yitanu yakutachikilahu ayisonekeli kudi Mosi yaaka 3,500 yinahituhu. Mukanda wakukumishaku awusonekeli kudi kapostolu Yowanu kubadika yaaka 1,900 yinahituhu. Ilaña ansoneki aBayibolu asonekeli yitoñojoka yaNzambi bayi yawuku. Dichi Nzambi diyi Nsoneki yaBayibolu—Tañenu 2 Timotewu 3:16; 2 Petulu 1:21.

Tweluka netu Bayibolu yafuma kudi Nzambi muloña yashimunañahu dehi yuma yakamwekena kumbidi choloka. Kwosi muntu wunateli kwila mwenimu. (Isaya 46:9, 10) Bayibolu cheñi yatuleja yililu yaNzambi. Yikweti ñovu yakuhimpa yihandilu yawantu. Iwu wunsahu wakwashaña antu kwiluka nawu Bayibolu Hizu daNzambi.—Tañenu Yoshuwa 23:14; 1 Atesalonika 2:13.

5. Munateli kwiluka ñahi mwatalisha nsañu yamuBayibolu?

Yesu amwilukili nankashi nawu wadiña ntañishi Wezu daNzambi. Hela chakwila antu amavulu ahosheleñayi nawu adiña eluka Nyikanda, akeñekeleña kuyikwasha kulonda atiyishishi. Hakwila nawu yayikwashi, Yesu wavulileña kuzatisha nsona yamuBayibolu nawa wayilejeleña ‘mwalumbulukila Nyikanda yajila.’ Muchinu chibaaba chinakwila nawu, “Dizenu Nsañu Yidi Mwizu daNzambi,” anazatishi njila yoyimu kulonda ayikwashi.—Tañenu Luka 24:27, 45.

Kudizila kudi Nzambi kutalisha hamuloña watuleñeleliyi kwatuzañaleshaña hama. Ilaña antu amakwawu akutiya kutama neyi eluka nawu munakutaña Bayibolu. Bayi mulekaku. Kuchiñeja kwenu kwakudiluñisha wumi wahaya nyaka kwashindamena hakumwiluka Nzambi.—Tañenu Matewu 5:10-12; Yowanu 17:3.

Neyi munakukeña nsañu yayivulu, talenu kapetulu 2 kaniwu mukanda, Chumanyi Chacheni Chatañishaña Bayibolu? wasonekawu kudi aYinsahu jaYehova.