Ithute Lentšung La Modimo

Ke ka Baka la Eng o Swanetše go Ithuta go Modimo?

Sehlogo se se tsoša dipotšišo tšeo o ka bago o ile wa ipotšiša tšona le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Ke ka baka la’ng o swanetše go ithuta go Modimo?

Modimo o na le ditaba tše dibotse tša se sekaone bakeng sa batho. O re botša tšona ka Beibeleng. Beibele go rena e bjalo ka lengwalo le le tšwago go Tate yo lerato wa legodimong.—Bala Jeremia 29:11.

2. Ditaba tše dibotse ke eng?

Batho ba nyaka mmušo wa go loka. Ga go mmuši wa motho yoo a kilego a imolla batho bošorong, go hlokeng toka, bolwetšing goba lehung. Eupša go na le ditaba tše dibotse. Modimo o tla nea batho mmušo wa go loka wo o tlago go ba lokolla mehuteng ka moka ya tlaišego.—Bala Daniele 2:44.

3. Ke ka baka la’ng go le bohlokwa go ithuta go Modimo?

Go se go ye kae Modimo o tla tloša batho ka moka ba bakago tlaišego mo lefaseng. Re sa letetše seo, o ruta dimilione tša batho ba boleta go swara tsela e botse ya bophelo, yeo e theilwego leratong. Batho ba ithuta kamoo ba ka lebeletšanago le mathata a bophelo, kamoo ba ka hwetšago lethabo la kgonthe le kamoo ba ka thabišago Modimo, go tšwa lentšung la Modimo.—Bala Tsefanya 2:3.

  4. Mongwadi wa Beibele ke mang?

Beibele e bopša ke dipuku tše 66 tše dinyenyane. Dipuku tše di ngwadilwe ke banna ba e ka bago ba 40. Tše hlano tša mathomo di ngwadilwe ke Moshe, nywaga e ka bago e 3 500 e fetilego. Ya mafelelo e ngwadilwe ke moapostola Johane nywageng ya ka godimo ga e 1 900 e fetilego. Eupša bangwadi ba Beibele ba ngwadile dikgopolo tša Modimo e sego tša bona. Ka baka leo, Modimo ke Mongwadi wa Beibele.—Bala 2 Timotheo 3:16; 2 Petro 1:21.

Re tseba gore Beibele e tšwa go Modimo ka gobane e bolela e sa le pele ka bokamoso ka mo go nepagetšego le ka botlalo. Ga go motho yo a ka dirago seo. (Jesaya 46:9, 10) Le gona, Beibele e re utollela semelo se lerato sa Modimo. E na le matla a go fetoša maphelo a batho gore e be a makaone. Mabaka a a kgodiša ba dimilione gore Beibele ke Lentšu la Modimo.—Bala Joshua 23:14; 1 Bathesalonika 2:13.

5. O ka kwešiša Beibele bjang?

Jesu o be a tsebega ka go ba morutiši wa Lentšu la Modimo. Gaešita le ge batho ba bantši bao a bego a bolela le bona ba be ba tlwaelane le Beibele, ba be ba tsoma thušo ya go e kwešiša. Go ba thuša, Jesu o ile a ba lebiša ditemaneng tše dingwe tša Beibele le go ba hlathollela “seo se bolelwago ke Mangwalo.” Sehlogo se sa “Ithute Lentšung la Modimo,” se tla diriša mokgwa o swanago bakeng sa go go thuša.—Bala Luka 24:27, 45.

Ke dilo tše sego kae tšeo di kgahlišago go feta go ithuta go Modimo mabapi le morero wa bophelo. Eupša batho ba bangwe ba ka no se thabišwe ke gore o bala Beibele. O se ke wa nyama. Kholofelo ya gago ya go phela ka mo go sa felego e ithekgile ka gore o tsebe Modimo.—Bala Mateo 5:10-12; Johane 17:3.

Bakeng sa tsebišo e oketšegilego, bona kgaolo 2 ya puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.