Lilongesa Ondaka Ya Huku

Oityi Wesukisila Okulongeswa na Huku?

Onthele ei ipopia omapulo hamwe ove wasukalala nao, nokulekesa opi upondola okuvasa omakumbululo Mombimbiliya yove. Onombangi mba Jeova vena ehambu liokutomphola nove omakumbululo oo.

1. Oityi wesukisila okulongeswa na Huku?

Huku una onondaka onongwa mbovipuka oviwa pala ovanthu. Oe utupopila konthele yotyo Mombimbiliya. Ombimbiliya ukahi ngomukanda tuahonekelwa na Tate onthyolwa keulu.—Tanga Jeremias 29:11.

2. Onondaka onongwa oityi?

Ovanthu vesukisa outumini waviuka. Kutupu omutumini wetyivila okuyovola ovanthu koungangala, novipuka vihaviukile, nomauvela ine ononkhia. Mahi, kuna onondaka onongwa. Huku maavela ovanthu outumini waviuka, maukayovola ovanthu kovipuka aviho vivemonesa ononkhumbi.—Tanga Daniel 2:44.

3. Okulilongesa konthele ya Huku tyakolela mokonda yatyi?

Apa katutu, Huku makasukukisa oohi okupalamo ovanthu vamonesa ononkhumbi vakuavo. Tupu, ukahi nokulongesa noluembia ovanthu ovanyingi vaovola ondyila yomuenyo. Ovanthu vekahi nokulilongesa Mondaka ya Huku, oñgeni mavafindi ovitateka momuenyo, no ñgeni mavavasi ehambu liotyotyili, no ñgeni mavahambukiswa Huku.—Tanga Sofonias 2:3.

4. Olie Hekulu Yombimbiliya?

Ombimbiliya ina omikanda 66 omitutu. Yahonekwa novanthu 40. Vitano viotete viahonekwa na Moisesi mokueenda kuomanima 3.500. Omukanda wahulililako wahonekua no apostolu João, mokueenda kuomanima 1.900. Mahi, ovahoneki Vombimbiliya, vahoneka omalusoke a Huku, kavahonekele omalusoke avo. Ngotyo, Huku oe Hekulu Yombimbiliya.—Tanga 2 Timóteo 3:16; 2 Pedro 1:21.

Tutyii okuti Ombimbiliya yatunda ku Huku, mokonda ipopia nawa-nawa etyi matyikapita komeho. Kutupu omunthu upondola okutyilinga. (Isaías 46:9, 10) Tupu, Ombimbiliya itupopila ovituwa via Huku. Ina epondolo liokupilulula omuenyo wovanthu, avakala nomuenyo omuwa. Ovipuka ovio vikalesa ovanthu ovanyingi nonthumbi yokuti Ombimbiliya Ondaka ya Huku.—Tanga Josué 23:14; 1 Tessalonicenses 2:13.

5. Oñgeni ove upondola okunoñgonoka Ombimbiliya?

Jesus wali omulongesi wankhimana Wondaka ya Huku. Namphila ovanthu ovanyingi apopila ankho vei Ombimbiliya, mahi ankho vesukisa okukuatesuako opo veinoñgonoke vali nawa. Opo evekuateseko, Jesus ankho kese tyikando upopia otestu, nokuvehangununina etyi “Ovihonekwa vilekesa.” Onthele ei yati, “Lilongesa Ondaka ya Huku,” tupu otyo mailingi pala okukukuatesako.—Tanga Lucas 24:27, 45.

Kutupu otyipuka otyiwa vali tyipona okulongeswa na Huku konthele yomuenyo. Mahi, ovanthu vamwe kamavahambukwa tyina ove ukahi nokulilongesa Ombimbiliya. Mahi uhasoye. Ekevelelo liove liomuenyo litei kuove unoñgonoke Huku.—Tanga Mateus 5:10-12; João 17:3.

Opo ulilongese vali konthele oyo, tala okapitulu 2 komukanda ou, walingua no Nombangi mba Jeova.