Lanem Wanem Bible Talem

Why Lane From God?

Disfala article storyim olketa kwestin wea pipol tingim and olketa ansa wea iu savve readim long Bible bilong iu. Olketa Jehovah’s Witness hapi tumas for storyim olketa ansa hia witim iu.

1. Why lane from God?

God garem gud nius abaotem olketa samting wea barava gud for olketa man. God talem iumi olketa gud samting hia insaed long Bible. Bible hem olsem wanfala leta from Dadi bilong iumi long heven wea lovem iumi.—Readim Jeremiah 29:11.

2. Wanem nao datfala gud nius?

Olketa man needim gudfala gavman. No enitaem man wea rul hem finisim raf fasin, olketa samting wea no stret, sik, or dae. Bat gud nius hem stap. God bae givim long olketa man wanfala gud gavman wea bae finisim evri wei for safa.—Readim Daniel 2:44.

3. Why nao hem important for lane from God?

Klosap nao God bae finisim pipol wea kosim wei for safa. Go kasem datfala taem, God teachim staka million pipol wea hambol for enjoyim gudfala living and for showimaot love for hem and neiba. Bible helpem pipol lane hao for deal witim olketa problem, hao for kasem trufala hapi, and wanem nao olketa savve duim for mekem God hapi.—Readim Zephaniah 2:3.

 4. Hu nao givim kam Bible?

Bible garem 66-fala smol buk and 40-fala man nao raetem. Moses nao raetem first faevfala buk, long samting olsem 3,500 year go finis. Aposol John nao raetem lastfala buk long winim 1,900 year go finis. Olketa wea raetem olketa Bible Buk raetem wanem God talem and no tingting bilong olketa seleva. So God nao givim kam Bible.—Readim 2 Timothy 3:16; 2 Peter 1:21.

Iumi savve Bible kam from God bikos hem barava talem stret wanem bae happen long future. No eniwan savve duim datwan. (Isaiah 46:9, 10) And Bible showimaot klia olketa gudfala wei bilong God tu. Bible garem paoa for changem laef bilong pipol for kamap gud. Evri samting hia mekem staka million pipol for bilivim hao Bible hem kam from God.—Readim Joshua 23:14; 1 Thessalonians 2:13.

5. Wanem nao iu savve duim for minim Bible?

Staka pipol savve hao Jesus hem man for teachim Bible. Nomata staka pipol wea Jesus story long olketa savve wanem Bible talem, olketa needim help for minim gud. Jesus hem evritaem iusim olketa difren scripture for helpem olketa “minim gud olketa Holy Raeting.” Diskaen article wea garem title, “Lanem Wanem Bible Talem,” bae iusim sem wei olsem Jesus for helpem iu.—Readim Luke 24:27, 45.

No staka samting hem interesting olsem wei for lane from God abaotem plan bilong hem for iumi. Bat maet samfala pipol no hapi taem iu readim Bible. No givap. Hope bilong iu for laef olowe hem depend long wei for iu lane abaotem God.—Readim Matthew 5:10-12; John 17:3.

For savve moa, lukim chapter 2 long disfala buk wea Olketa Jehovah’s Witness pablisim, Wanem Nao Really Samting wea Bible Teachim?.