Bâ ye so Bible afa

Ngbanga ti nyen ti hinga ye so Nzapa afa?

Article so ahunda ambeni tënë so peut-être mo hunda tere ti mo na ni awe nga ayeke fa na mo ndo so mo lingbi ti wara akiringo tënë ni dä na yâ ti Bible ti mo. A yeke nzere mingi na aTémoin ti Jéhovah ti sara lisoro na mo na ndo ti akiringo tënë ni so.

1. Ngbanga ti nyen ti hinga ye so Nzapa afa?

Nzapa ayeke na mbeni nzoni tënë ti tene na azo. Lo fa ni na e na yâ ti Bible. Bible ayeke tongana mbeni lettre so Babâ ti e ti yayu so aye e mingi atokua ni na e.​—Diko Jérémie 29:11.

2. Nzoni tënë ni ayeke so wa?

Azo ayeke na bezoin ti mbeni nzoni ngorogbia. Mbeni gbia na sese so a lingbi pëpe ti zi azo na yâ ti sarango ye ti ngangu, sarango ye ti kirikiri, kobela nga na kuâ. Me mbeni nzoni tënë ayeke dä. Nzapa ayeke mû na azo mbeni nzoni ngorogbia so ayeke zi ande aye kue so asara si azo ayeke bâ pasi.​—Diko Daniel 2:44.

3. Ngbanga ti nyen a yeke kota ye ti hinga ye so Nzapa afa?

Na yâ ti ngoi kete, Nzapa ayeke futi azo kue so asara si pasi ayeke na ndo ti sese. Ti ku na ngoi ni so, Nzapa ayeke fa ye na azo kutu mingi so ayeke na tâ be-ti-molenge ti duti na mbeni fini so ayeke nzoni, so aluti na ndo ti ndoye. Mbeti ti Nzapa afa na azo tongana nyen ti hon ndo ti akpale, tongana nyen ti wara tâ ngia nga tongana nyen ti nzere na lê ti Nzapa.​—Diko Sophonie 2:3.

 4. Bible ayeke tënë ti yanga ti zo wa?

Na yâ ti Bible a yeke wara akete buku 66. Wungo ti azo 40 tongaso la asû ni. Moïse la asû akozo oku buku ni. Lo sû ni a sara ngu 3500 tongaso awe. Bazengele Jean la asû ndangba buku ni a sara ngu 1900 na ndo ni awe. Me azo so asû Bible asû gi apensé ti Nzapa me ti ala wani pëpe. Tongaso, Bible ayeke tënë ti yanga ti Nzapa.​—Diko 2 Timothée 3:16; 2 Pierre 1:21.

E hinga so Bible ayeke tënë ti yanga ti Nzapa ndali ti so anzene nzene ye so lo fa tënë ni kozoni aga tâ tënë biani. A yeke ye so mbeni zo alingbi ti sara ni pëpe (Ésaïe 46:9, 10). Bible afa nga na e asarango ye ti tere ti Nzapa. Bible ayeke na ngangu ti changé fini ti azo ti tene aga nzoni. Aye so ague na azo mingi ti yeda so Bible ayeke tënë ti yanga ti Nzapa.​—Diko Josué 23:14; 1 aThessalonicien 2:13.

5. Mo lingbi ti sara tongana nyen ti mä yâ ti aye so Bible afa?

Jésus aga lani mbeni kota wafango tënë ti Nzapa. Atâa so mingi ti azo so lo sara tënë lani na ala ayeke azo so ahinga Bible, ala yeke na bezoin ti tene a mû maboko na ala ti gbu ndani. Ti mû maboko na ala Jésus asara kusala na ambeni tënë nde nde so ayeke na yâ ti Bible ti fa “nda ti Mbeti ti Nzapa.” Article so, “Bâ ye so Bible afa”, ayeke sara nga kusala na oko kode so ti mû maboko na mo.​—Diko Luc 24:27, 45.

A yeke nzere ande na mo mingi tongana mo zia si Nzapa afa na mo ngbanga ti nyen lo leke e azo. Me a lingbi ti nzere pëpe na ambeni zo ti bâ mo na dikongo Bible. Zia si bê ti mo anze pëpe. Mo yeke duti na beku ti wara fini ti lakue lakue gi tongana mo hinga Nzapa.​—Diko Matthieu 5:10-12; Jean 17:3.

Ti hinga ambeni tënë na ndo ni, bâ chapitre 2 ti buku Bible afa nyen biani?, so aTémoin ti Jéhovah asigigi na ni.