Aʻoaʻoga a le Tusi Paia

O le ā o Aʻoaʻo Mai e le Atua?

Ua lāgā i lenei mataupu nisi o fesili atonu na e taumānatu ai, ma faasino mai i le Tusi Paia tali. E fiafia Molimau a Ieova e talatalanoa ma oe e faatatau i nei tali.

1. O le ā o aʻoaʻo mai e le Atua?

O loo iai i le Atua se tala lelei, o se lumanaʻi matagofie mo tagata, lea o loo taʻua i le Tusi Paia. Ua pei le Tusi Paia o se tusi na tusia e lo tatou Tamā alofa i le lagi mo i tatou.—Faitau le Ieremia 29:11.

2. O le ā le tala lelei?

E manaʻomia e tagata se faigāmalo e lelei. E leʻi mafaia lava e se tagata ona aveesea faiga sauā, mea lē tonu, faamaʻi ma le oti. Ae ua iai se tala lelei. O le a saunia e le Atua se faigāmalo e lelei, e aveesea mea uma o loo māfua ai puapuaga.—Faitau le Tanielu 2:44.

3. Aiseā e tāua ai aʻoaʻoga a le Atua?

Ua toeitiiti ona faaumatia lea e le Atua o ē o loo māfua ai puapuaga. Ae i le taimi nei, ua ia aʻoaʻoina le faitau miliona o tagata ina ia ola i se olaga e sili ona lelei, lea e faavae i le alofa. O le Afioga a le Atua ua iloa ai e tagata foʻia faafitauli, ola fiafia ma faafiafiaina le Atua.—Faitau le Sefanaia 2:3.

4. O ai le Tusitala o le Tusi Paia?

E 66 tusi o le Tusi Paia, na tusia e tane e 40. O uluaʻi tusi e lima na tusia e Mose pe tusa o le 3,500 tausaga ua mavae. Na tusia le tusi mulimuli e Ioane, i le silia i le 1,900 tausaga ua mavae. Ae na tusia e na tane manatu o le Atua, ae lē o o latou lava manatu. O lea, o le Atua o le Tusitala o le Tusi Paia.—Faitau le 2 Timoteo 3:16; 2 Peteru 1:21.

O le Tusi Paia e mai i le Atua, auā ua valoia ai ma le saʻo mea o le a tutupu i le lumanaʻi. E lē mafai e se tagata ona fai lenā mea. (Isaia 46:9, 10) Ua faaalia mai ai foʻi uiga matagofie o le Atua. Ua iai le mana e suia ai olaga o tagata. O lea ua talitonu ai le faitau miliona o tagata, o le Tusi Paia o le Afioga lea a le Atua.—Faitau le Iosua 23:14; 1 Tesalonia 2:13.

5. E faapefea ona e malamalama i le Tusi Paia?

Sa lauiloa Iesu o se faiaʻoga o le Tusi Paia. E ui sa masani i le Tusi Paia tagata na ia talanoa i ai, ae sa tatau ona fesoasoani iā i latou ia malamalama i ai. O lea, sa taʻu atu e Iesu mau o le Tusi Paia ma faamatala atu le uiga “o Tusitusiga Paia.” O le mea foʻi lenā o le a faia e lenei faasologa o le mataupu ua taʻua, “Aʻoaʻoga a le Tusi Paia,” ina ia fesoasoani iā te oe.—Faitau le Luka 24:27, 45.

O le aʻoaʻoina o le finagalo o le Atua e uiga i le lumanaʻi o tagata, o le mea sili lea ona lelei e tatou te faia. Ae atonu o nisi tagata e lē fiafia pe a e faitauina le Tusi Paia. Aua e te lotovaivai ai. E faalagolago lou mauaina o le ola e faavavau, i lou iloa lelei o le Atua.—Faitau le Mataio 5:10-12; Ioane 17:3.

Mo nisi manatu, tagaʻi i le mataupu e 2 o lenei tusi, O ā Aʻoaʻoga Moni a le Tusi Paia? ua lomia e Molimau a Ieova.