Hen Kwagh Ken Mkaanem Ma Aôndo

Er Nan i Doo u Se Hen Kwagh sha Ikyev i Aôndo?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Er nan i doo u se hen kwagh sha ikyev i Aôndo?

Aôndo ngu a loho u dedoo u kwagh u injar sha ci u uumace. A ôr se loho ne ken Bibilo. Bibilo ngi inja er ka washika u Ter wase u sha, u se doo un ishima la a nger se nahan.—Ôr Yeremia 29:11.

2. Kanyi i lu loho u dedoo shono?

Gba u uumace vea lu a gomoti u dedoo. Ma orhemen môm nan ngu a fatyô u wasen uumace sha u been a ipila man ifer man angev shin ku ga. Nahan kpa se mba a loho lu dedoo. Aôndo una va na uumace gomoti u dedoo, u una kar a hanma kwagh u a ve a ican i yan cii kera yô.—Ôr Daniel 2:44.

3. Er nan i lu hange hange u se hen kwagh sha ikyev i Aôndo?

Ica ia gba ga tsô Aôndo una tim ior mba ve eren akaa a van mbagenev a ican la cii shin tar ne kera. Hegen ne yô, Aôndo ngu tesen mbaasemaleghlegh mba ve lu umiliôn imôngo la gbenda u uma, u ú hembe doon yô, man gbenda ne ka u dooshima. Mkaanem ma Aôndo ma tesen ior er vea nôngon a mbamzeyol mba uma yô man er vea zua a msaanyol u mimi shi vea eren ishima i Aôndo kpaa yô.—Ôr Sefania 2:3.

  4. Ka an nan lu Orngeren Bibilo jim jimi?

Bibilo ngi a ityakerada i kiriki kuma 66. Ka iorov 40 yange ve nger i ye. Ityakerada itian i hiihii la ka Mose yange nger i ye. A nger i kuma er anyom 3,500 nahan ken ijime. Takerada u Bibilo u masetyô la di lu apostoli Yohane nger u ye. A nger u hemba anyom 1,900 hegen. Kpa mbangeren Bibilo mban yange ve nger mbamhen mba Aôndo, lu mba vev ga. Nahan yô ka Aôndo a lu Orngeren Bibilo jim jim ye.—Ôr 2 Timoteu 3:16; 2 Peteru 1:21.

Se fa ser Bibilo due hen Aôndo sha ci u i tsengaôron akaa a ken hemen vighe vighe. Orumace môm nana fatyô u eren nahan ga. (Yesaia 46:9, 10) Shi Bibilo pase se aeren a Aôndo a doon tsung la vighe vighe. Ngi a tahav mbu geman ior sha er uma ve una hemba doon yô. Akaa ne cii na yô, ior umiliôn imôngo na jighjigh ér Bibilo ka Mkaanem ma Aôndo.—Ôr Yosua 23:14; 1 Mbatesalonika 2:13.

5. U fa Bibilo nena?

Yesu yange hingir ortesen Mkaanem ma Aôndo u zan gwa kpishi. Shin er ior kpishi mba Yesu lamen a ve la hoghol a Bibilo nahan kpa, yange gba u á tese ve cii ve vea kav akaa a i nger ker la ye. Yesu yange una ôron kwagh a ve yô, a teren atôakaa kposo kposo ken Bibilo shi a pasen ve inja i kwagh u i nger ken “icighanruamabera” la sha er vea kav yô. Kwaghngeren u a lu a itinekwagh ér “Hen Kwagh ken Mkaanem ma Aôndo” u se geman ngeren un hanma shighe ne kpa una wase u sha imba gbenda ne.—Ôr Luka 24:27, 45.

U henen kwagh u ityôkyaa i se lu uma sha ikyev i Aôndo la ka kwagh u maan se iyol kpishi, man ka akaa kpuaa tseegh a maan se iyol imba la ye. Kpa alaghga a doo ior mbagen a we ga sha ci u ú ngu ôron Bibilo yum. De yen ishima ga. Saa u fa Aôndo ve u lu a ishimaverenkeghen i va zuan a uma u tsôron la ye.—Ôr Mateu 5:10-12; Yohane 17:3.

Wea soo u seer zuan a iwanger yô, ôr ityough 2 ki takerada u Bibilo Tese Ér Nyi Jimi? ka Mbashiada mba Yehova ve gber u ye.