Etshama oma L’ɔtɛkɛta wa Nzambi

Lande na kahombayɛ mbetshama oma le Nzambi?

Sawo nɛ diekɔ la ambola wakokayɛ ndjaoka ndo mɛnyaka avɛsa wa lo Bible washa ekadimwelo. Ɛmɛnyi wa Jehowa wayonga suke dia nkɛtshanya la yɛ ekadimwelo ɛsɔ.

1. Lande na kahombayɛ mbetshama oma le Nzambi?

Nzambi ekɔ la lokumu l’ɔlɔlɔ l’ɛngɔ kɛmɔtshi ka dimɛna efula lendana l’anto tshɛ. Nde ekɔ lo totɛlɔ lo tshimbo ya Bible. Bible kekɔ oko mukanda w’oma le Shɛso ka ngandji kele l’olongo.—Adia Jeremiya 29:11.

2. Lokumu l’ɔlɔlɔ la na?

Anto tshɛ wekɔ l’ohomba wa lowandji la dimɛna. Ndoko lowandji l’ana w’anto lambonyaka akambo wa ngala, wɛngiya, hemɔ kana nyɔi. Koko tekɔ la lokumu l’ɔlɔlɔ. Nzambi ayosha anto tshɛ lowandji la dimɛna layowatshungola oma lo asui tshɛ.—Adia Danyele 2:44.

3. Lande na kele ekɔ ohomba wɛ mbetshama oma le Nzambi?

Nzambi ayanga minya anto wa kɔlɔ tshɛ. L’etena kɛnɛ, nde ekɔ lo mbetsha miliyɔ y’akanga a memakana dia vɔ monga la lɔsɛnɔ la dimɛna. Ɔtɛkɛta wa Nzambi wekɔ lo mbetsha anto woho wakokawɔ ntondoya ekakatanu, monga l’ɔngɛnɔngɛnɔ wa mɛtɛ ndo ngɛnyangɛnya Nzambi.—Adia Zefaniya 2:3.

  4. Ele Kiɔkɔ ya Bible?

Bible kekɔ la tobukubuku 66. Tɔ kakafundama oma le anto 40. Abuku atanu w’etatelo wakafundama oma le Mɔsɛ ambeta ɛnɔnyi oko 3 500. Dibuku di’ekomelo diakafundama oma le ɔpɔstɔlɔ Joani ambeta ɛnɔnyi ndekana 1 900. Afundji wa Bible wakafunde tokanyi ta Nzambi, koko aha tawɔ vɔamɛ. Ɔnkɔnɛ, Nzambi mbele Kiɔkɔ ya Bible.—Adia 2 Timote 3:16; 2 Petero 1:21.

Sho mbeyaka dia Bible kekɔ dibuku diaki Nzambi nɛ dia tɔ mɛnyaka woho wayonga nshi yayaye y’anto. Ndoko onto lakoka nsala ngasɔ. (Isaya 46:9, 10) Ndo nto, Bible toshwɛka waonga waki Nzambi ka ngandji. Tɔ kekɔ la wolo wa ntshikitanya nsɛnɔ y’anto. Awui asɔ mbêtawoya miliyɔ y’anto dia Bible kekɔ Ɔtɛkɛta wa Nzambi.—Adia Jashua 23:14; 1 Tesalonika 2:13.

5. Ngande wakokayɛ nshihodia Bible?

Yeso akeyamaka oko ombetsha w’Ɔtɛkɛta wa Nzambi. Kânga mbakeyaka anto efula wakandasambishaka Afundelo, vɔ waki l’ohomba w’ekimanyielo dia kishihodia. Dia mbakimanyiya, Yeso akawadiɛka avɛsa wa lo Bible efula ndo akâlembetshiyakawɔ “dia vo mana afundelu fundu.” Sawo nɛ diele l’ɔtɛ a dui ɔnɛ “Eka Ɔtɛkɛta wa Nzambi” diayokamba la shambo yakɔ yâmɛ dia kokimanyiya.—Adia Luka 24:27, 45.

Awui angana ato mbatosha ɔngɛnɔngɛnɔ wɛdimi la mbetshama oma le Nzambi lo kɛnɛ kendana la oyango wa lɔsɛnɔ. Koko, mbeyaka monga ko anto amɔtshi hawɔngɛnangɛna kɛna adia Bible. Tohekɔke. Dia wɛ nkondja lɔsɛnɔ la pondjo, wɛ pombaka mbeya Nzambi.—Adia Mateu 5:10-12; Joani 17:3.

Dia mbeya awui akina, enda tshapita 2 ya dibuku nɛ Bible etshatɔ mɛtɛ?, diakatondjama oma le Ɛmɛnyi wa Jehowa.