Amwiiye Ncolyaamba Jwi Lya Leza

Nkaambo nzi Ncotweelede Kwiiya Kuli Leza?

Cibalo eeci cili amibuzyo imwi njomwakalibuzyide alimwi cilatondezya nkomukonzya kubujana bwiinguzi mu Bbaibbele lyanu. Bakamboni ba Jehova bayookkomana kubandika andinywe bwiinguzi kumibuzyo eeyi.

1. Nkaambo nzi ncotweelede kwiiya kuli Leza?

Leza ulijisi makani mabotu aagwasya kubantu boonse. Ulatwaambila kujatikizya ngawo mu Bbaibbele. Ibbaibbele lili mbuli lugwalo luzwa kuli Taateesu wakujulu siluyando.—Amubale Jeremiya 29:11.

2. Ino makani mabotu ninzi?

Bantu boonse bayandika mfwulumende mbotu. Kunyina mweendelezi waansi wacikonzya kulemununa bantu kuzwa kulunya, kutalulama, malwazi, alimwi alufwu. Pele kuli makani mabotu. Leza uyooleta mfwulumende mbotu kubantu yalo iiyooleta lwaanguluko kuzwa kumapenzi oonse.—Amubale Daniele 2:44.

3. Nkaambo nzi ncociyandika kwiiya kuli Leza?

Ino-ino, Leza uyoogusya bantu boonse baleta mapenzi. Kwaciindi ecino, Leza ulayiisya bantu banji babombe myoyo kupona buumi bubotu, ibuyeeme aluyando. Kuzwa Mujwi lya Leza, bantu balayiya mbobakonzya kuliyumya mumapenzi, ambobakonzya kujana lukkomano lwini-lwini alimwi ambobakonzya kukkomanisya Leza.—Amubale Zefaniya 2:3.

  4. Ino nguni Sikwaanza Bbaibbele?

Bbaibbele lilijisi mabbuku masyoonto-syoonto aasika ku 66. Bbaibbele lyakalembwa abaalumi basika ku 40. Mabbuku osanwe aakusanguna akalembwa a Musa myaaka iili 3,500 yainda. Bbuku lyamamanino lyakalembwa amutumwa Johane myaaka iili 1,900 yainda. Nokuba boobo, basikulemba Bbaibbele bakalemba mizeezo ya Leza kutali yabo pe. Aboobo Leza ngo Sikwaanza Bbaibbele.—Amubale 2 Timoteyo 3:16; 2 Petulo 1:21.

Tulizyi kuti Bbaibbele lyakazwa kuli Leza akaambo kakuti lililuzi nolyaamba zyakumbele. Kunyina muntu ukonzya kucita boobo. (Isaya 46:9, 10) Bbaibbele lilatwaambila bube bwa Leza bwa luyando. Lilijisi nguzu zikonzya kucinca maumi aabantu. Twaambo ootu tupa kuti bantu banji basyome kuti Bbaibbele Ndijwi lya Leza.—Amubale Joshua 23:14; 1 Batesalonika 2:13.

5. Mbuti mbomukonzya kulimvwisya Bbaibbele?

Jesu wakalizyibidwe kuti mwiiyi Wajwi lya Leza. Nokuba kuti bantu mbaakali kuyiisya bakalijisi kale luzyibo lwamu Bbaibbele, bakali kuyandika lugwasyo kutegwa bamvwisye. Kutegwa Jesu abagwasye, wakabapandulwida kabotu-kabotu cibalo cimwi acimwi camu Bbaibbele kuti “baamvwe [ncaamba] Magwalo.” Eeci cibalo caamba kuti “Amwiiye Ncolyaamba Jwi Lya Leza” ciyoobelesya nzila njoona eeyi kumugwasya.—Amubale Luka 24:27, 45.

Zisyoonto zyintu zikkomanisya mbuli kwiiya jwi lya Leza akuzyiba mpindu yabuumi. Pele bantu bamwi tabakakkomani akaambo kakuti mubala Bbaibbele. Tamweelede kutyompwa pe. Bulangizi bwanu bwakuyookkomana kukabe kutamani buyeeme akuzyiba Leza.—Amubale Matayo 5:10-12; Johane 17:3.

Kutegwa muzyibe zinji, amubone cibalo 2 mubbuku eeli, lyakamwaigwa a Bakamboni ba Jehova.