Sambirani Kufuma mu Mazgu gha Ciuta

Cifukwa Wuli Tikwenera Kusambira Kufuma kwa Ciuta?

Mu nkhani iyi muli mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵazamuŵa ŵakukondwa kudumbiskana namwe mazgoro agha.

1. Cifukwa wuli tikwenera kusambira kufuma kwa Ciuta?

Ciuta wali na nkhani yiwemi yakuti waphalire ŵanthu. Nkhani iyi yili mu Baibolo. Baibolo lili nga ni kalata iyo Adada ŵithu ŵacitemwa ŵakucanya ŵatilembera.—Ŵazgani Yeremiya 29:11.

2. Kasi nkhani yiwemi njakuti wuli?

Ŵanthu ŵakukhumbikwira boma liwemi. Palije muwusi waliyose wa ŵanthu uyo wamazga vivulupi, vinthu vyambura urunji, matenda, panji nyifwa. Kweni pali nkhani yakukondweska. Nkhani yake njakuti Ciuta wapenge ŵanthu boma liwemi ilo lizamuwuskapo vinthu vyose ivyo ŵanthu ŵakusuzgika navyo.—Ŵazgani Daniel 2:44.

3. Cifukwa wuli nchakuzirwa kusambira kufuma kwa Ciuta?

Sonosono apa Ciuta wawuskengepo ŵanthu awo ŵakupangiska masuzgo pa caru. Panyengo yasono wakusambizga ŵanthu ŵakuzika mamiliyoni ghanandi kuŵa na umoyo uwemi, uwo wajintha pa citemwa. Mu Mazgu gha Ciuta, ŵanthu ŵakusambira umo ŵangazizipizgira masuzgo, umo ŵangaŵira ŵakukondwa nadi, ndiposo umo ŵangakondweskera Ciuta.—Ŵazgani Zefaniya 2:3.

 4. Ni njani wali kulemba Baibolo?

Mu Baibolo muli mabuku 66. Mabuku agha ghakalembeka na ŵanalume ŵakukwana 40. Mabuku ghankhondi ghakwambilira wakalemba ni Mozesi vilimika pafupifupi 3,500 ivyo vyajumpha. Buku laumaliro wakalemba ni mpositole Yohane vilimika vyakujumpha 1,900 ivyo vyajumpha. Kweni awo ŵakalemba Baibolo, ŵakalemba maghanoghano ghawo yayi, kweni gha Ciuta. Ntheura, mulembi mweneco wa Baibolo ni Ciuta.—Ŵazgani 2 Timote 3:16; 2 Petrosi 1:21.

Tikumanya kuti Baibolo ndakufuma kwa Ciuta cifukwa likulongosora makoraghene ivyo vizamucitika kunthazi ndipo vikuzakacitika nadi. Palije munthu uyo wangacita ici. (Yesaya 46:9, 10) Kweniso, Baibolo likulongolerathu mikhaliro yiwemi iyo Ciuta wali nayo. Lili na nkhongono ya kusintha umoyo wa ŵanthu kuŵa uwemi. Ici ndico cakhorweska ŵanthu ŵanandi kuti Baibolo ni Mazgu gha Ciuta nadi.—Ŵazgani Joshua 23:14; 1 Ŵatesalonika 2:13.

5. Kasi mungalipulikiska wuli Baibolo?

Yesu wakamanyikwa pa caru cose kuŵa msambizgi wa Mazgu gha Ciuta. Nangauli ŵanthu ŵanandi awo wakadumbiskananaga nawo ŵakalimanyanga Baibolo, kweni ŵakakhumbikiranga kovwirika kuti ŵalipulikiske. Kuti waŵawovwire, Yesu wakayowoyanga mavesi ghakupambanapambana gha mu Baibolo na kulongosora “ng’anamuro la Malemba.” Cigaŵa ici cakuti “Sambirani Kufuma mu Mazgu gha Ciuta,” naco ndimo cilembekerenge kuti cimovwirani.—Ŵazgani Luka 24:27, 45.

Nchakukondweska comene kusambira cilato ca umoyo kufuma kwa Ciuta. Ndipouli, ŵanyake ŵakondwenge yayi kuti mukuŵazga Baibolo. Kweni mungagongowanga yayi. Kuti muzakasangwe na umoyo wamuyirayira vikuthemba pa kumanya Ciuta.—Ŵazgani Mateyu 5:10-12; Yohane 17:3.

Kuti mumanye vinandi, wonani cipaturo 2 mu buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.