Chanubtaseletik ta skʼop Dios

¿Kʼu yuʼun skʼan jchantik ta sventa li Diose?

Li mantal liʼe tskoltaot sventa xa sabe stakʼobil ta aVivlia atuk jlom sjakʼobiltak ti xuʼ van oy jech ajakʼojbe abae. Li sjakʼobiltak liʼe xuʼ xa chan xchiʼuk junuk yajrextiko Jeova mi jech cha kʼane.

1. ¿Kʼu yuʼun skʼan jchantik ta sventa Dios?

Li Diose yakʼoj jun aʼyej sventa spatobil yoʼonton li krixchanoetike. Li aʼyej taje te oy ta sKʼop Dios. Jech, li Vivliae jaʼ jech kʼuchaʼal jun karta ti yakʼojbutik tal li jTotik ta vinajele. (Kʼelo Jeremías 29:11.)

2. ¿Kʼusi aʼyejal yakʼoj Dios sventa li krixchanoetike?

Mi junuk ajvalil lajem yuʼun li majbaile, li kʼusitik muʼyuk tukʼ chkʼot ta pasele, li chameletike mi jaʼuk li lajele. Pe li Diose yaloj ti tsvaʼan jun tukʼil ajvalil sventa tstupʼbe skʼoplal ta jyalel svokol li krixchanoetik ta Balumile. (Kʼelo Daniel 2:44.)

3. ¿Kʼu yuʼun tsots skʼoplal skʼan xa noʼox jchantik ta sventa li Diose?

Li Diose poʼot xa slajes skotol li chopol krixchanoetike. Pe yoʼ to mu xkʼot ta pasel taje, baʼyel ta xchanubtas epal miyon krixchanoetik sventa akʼo skʼan xchiʼiltakik xchiʼuk akʼo xlekub xkuxlejalik. Li ta Vivliae xuʼ jchantik kʼuyelan xuʼ jtsaltik li vokoliletike, kʼuyelan xuʼ xi jmuyubaj noʼox xchiʼuk kʼuxi xuʼ lek xilutik li Diose. (Kʼelo Sofonías 2:3.)

4. ¿Buchʼu la spas li Vivliae?

Ta sliklejal li Vivliae oy 66 livroetik ti te van 40 viniketik la stsʼibaike. Li baʼyel voʼob livroetike oy xa ta 3,500 jabil la stsʼiba li Moisese. Li slajeb livroe oy xa ta 1,900 jabil la stsʼiba li jtakbol Juane. Li viniketik taje jaʼ la stsʼibaik li snopben Diose, mu jaʼuk li kʼusi tsnop stukike. Jech oxal, li buchʼu la spas Vivliae, jaʼ li Diose. (Kʼelo 2 Timoteo 3:16 xchiʼuk 2 Pedro 1:21.)

¿Kʼu yuʼun stakʼ jchʼuntik ti likem tal ta stojolal Dios li Vivliae? Yuʼun lek jamal chal li kʼusi chkʼot ta pasel ta tsʼakale, taje mi junuk krixchano spas yuʼun (Isaías 46:9, 10). Xchibal, te chalbe skʼoplal li skʼupil talelaltak Diose. Yoxibal, yuʼun xuʼ sjelbe xkuxlejal li krixchanoetike. Ta skoj taje, epal miyon krixchanoetik lek xchʼunojik ti jaʼ yakʼoj ta naʼel stuk Dios li Vivliae. (Kʼelo Josué 23:14 xchiʼuk 1 Tesalonicenses 2:13.)

5. ¿Kʼusi skʼan jpastik sventa xkaʼibetik smelolal li Vivliae?

Toj lek tajek kʼuyelan chanubtasvan ta sventa sKʼop Dios li Jesuse. Manchuk mi ep buchʼutik xojtikinik toʼox skʼop Dios li ta skʼakʼalil Jesuse, mu xaʼibeik smelolal. Sventa tsjambe smelolale, li Jesuse maʼuk noʼox la skʼel li sKʼop Diose, moʼoj, yuʼun la xchapbe smelolal li junantik tekstoetike. Jech ek, sventa xavaʼibe lek smelolal li chanubtaseletik ta Vivliae, li jvokʼ mantal liʼe jech ta spas ek. (Kʼelo Lucas 24:27, 45.)

Jnaʼojkutik lek ti cha kʼupin xchanel ta sventa li Diose xchiʼuk ta sventa ti kʼu yuʼun kuxulutike. Pe naʼo me, mu skotoluk lek chaʼiik ti cha chan li Vivliae. Pe skʼan mu xavikta. Yuʼun li Vivliae chal ti xuʼ xkuxiik sbatel osil li buchʼutik chchanik ta sventa Diose. (Kʼelo Mateo 5:10-12 xchiʼuk Juan 17:3.)

Mi cha kʼanbe to mas yaʼyejale, kʼelo li kapitulo 2 ta livro liʼe, ti jaʼ pasbil yuʼun yajrextikotak Jeovae.