Xoossaa Qaalaappe Tamaarite

Xoossaappe Tamaarana Koshshiyoy Aybissee?

Ha huuphe yohoy inttena qofissidaba gidana danddayiya oyshata oyqqiis; qassi he oyshatuyyo zaaruwaa Geeshsha Maxaafan awan demmana danddayiyaakko qonccissees. Yihoowa Markkati he zaarota inttenaara tobbanau ufayttoosona.

1. Xoossaappe tamaarana koshshiyoy aybissee?

Xoossay issi loˈˈobaa mishiraachuwaa asaa naatussi yootees. I hegaabaa nuussi Geeshsha Maxaafan qonccissiis. Geeshsha Maxaafay saluwan deˈiya, nuna siiqiya Aawaappe yiida dabddaabbe mala.—Ermmaasa 29:11 nabbaba.

2. He mishiraachoy aybee?

Asaa naatuyyo loˈˈo kawotettay koshshees. Asaa naata makkalaappe, pirdda pacaappe, harggiyaappe woykko hayquwaappe shemppissida asa haaroy baawa. SHin hegaa xeelliyaagan mishiraachoy deˈees. Xoossay asaa naatuyyo loˈˈo kawotettaa ehaana; he kawotettay tuggau gaaso gidida ubbabaappe asaa laˈa kessana.—Daaneela 2:44 nabbaba.

3. Xoossaappe tamaariyoogee keehippe koshshiyoy aybissee?

Xoossay mata wodiyan, saˈaa bollappe tuggau gaaso gidida asaa xayssana. Hegee gakkanaashin, miilooniyan qoodettiya ashkke asaa loˈˈo deˈo ogiyaa i siiquwan tamaarissees. Asay deˈuwan gakkiya metuwan waanidi genccana danddayiyaakko, tumu ufayssaa waatidi demmana danddayiyaakko, qassi Xoossaa waatidi ufayssana danddayiyaakko Xoossaa Qaalaappe tamaariiddi deˈees.—Sofonaasa 2:3 nabbaba.

  4. Geeshsha Maxaafaa Xaafissidaagee oonee?

Geeshsha Maxaafan 66 guutta maxaafati deˈoosona. Hegeeta 40 gidiya asati xaafidosona. Koyro ichashu maxaafata 3,500 gidiya layttappe kase Muusee xaafiis. Wurssetta maxaafaa 1,900ppe dariya layttappe kase, kiitettida Yohaannisi xaafiis. SHin Geeshsha Maxaafaa xaafidaageeti bantta qofaa gidennan, Xoossaa qofaa xaafidosona. Yaatiyo gishshau, Geeshsha Maxaafaa xaafissidaagee Xoossaa.—2 Ximootiyoosa 3:16; 2 PHeexiroosa 1:21 nabbaba.

Geeshsha Maxaafay sinttanaabaa geeshshidi kaseti yootiyo gishshau, Xoossaappe yiidoogaa nuuni eroos. Ay asinne hegaadan oottana danddayenna. (Isi. 46:9, 10) Geeshsha Maxaafay Xoossaa eeshshaakka nuussi qonccissees. Geeshsha Maxaafay loˈˈobau asaa deˈuwaa laammiyo wolqqay deˈees. Ha yohoti miilooniyan qoodettiya asay Geeshsha Maxaafay Xoossaa Qaala gidiyoogaa ammananaadan oottidosona.—Yaasa 23:14; 1 Tasalonqqe 2:13 nabbaba.

5. Geeshsha Maxaafaa waatidi akeekana danddayeetii?

Yesuusi Xoossaa Qaalaa tamaarissiyoogan erettidaagaa gidiis. I tamaarissido asaappe dariya baggay Geeshsha Maxaafaa eriyaaba gidikkokka, hegaa akeekanau etau maadoy koshshiis. Yesuusi eta maaddanau, Geeshsha Maxaafaa xiqiseta dumma dumma sohuwaappe yootidi, ‘Xoossaa maxaafati giyoobaa’ etau qonccissiis. “Xoossaa Qaalaappe Tamaarite” giya ha huuphe yohoy inttena maaddanau hagaa mala ogiyan giigana.—Luqaasa 24:27, 45 nabbaba.

Deˈuwaa halchuwaabaa Xoossaappe tamaariyoogaadan keehippe ufayssiyaabi he keena. SHin intte Geeshsha Maxaafaa nabbabiyoogan issi issi asay ufayttennan aggana danddayees. Hidootaa qanxxoppite. Intte merinaa deˈuwaa demmiyo hidootay Xoossaa eriyoogaara gayttidaba.—Maatiyoosa 5:10-12; Yohaannisa 17:3 nabbaba.

Gujo qofaa demmanau, Yihoowa Markkati attamissido ha maxaafaa, shemppo 2 xeella. Tumuppe Geeshsha Maxaafay Tamaarissiyoy Aybee?