Taman Eden​—Toho do Jabu ni Jolma na Parjolo?

BAYAKKON ma hamu hundul di sada taman. Luas hian do taman on. Dang adong na mangganggu hamu disi. Dang adong soara bising songon na biasa tabege di kota. Jala tenang hian do disi. Na mambahen las muse rohamuna, dang marsak be hamu disi. Dang adong be sahitmuna. Dang dihilala hamu be alergi jala dang dihilala hamu be na haccit.

Mula-mula diida hamu ma akka bunga na bagak warnana, aek na marhillong, akka bulung-bulung dohot rumput na ijo warnana na hona las ni ari dohot bayangan ni akka hau. Boi ma dihilala hamu alogo na mangullus. Jala boi dianggo hamu angur ni akka bunga i. Dibege hamu ma muse soara ni bulung-bulung na diullus alogo, soara ni aek na hona tu akka batu, soara ni akka pidong dohot sese. Molo dibayakkon hamu inganan i, pasti lomo do rohamuna disi kan?

Godang do halak na di portibi on porsea, inganan na songon i do jabu ni jolma na parjolo. Saleleng marratus taon, porsea do agama Jahudi, Susunan Kristen, dohot agama Islam adong Taman Eden. Debata do mambahen taman i lao gabe inganan ni si Adam dohot si Hawa. Didok di Bibel, marlas ni roha do nasida disi jala sonang do ngolu ni nasida. Mardame do nasida tu binatang dohot tu Debata. Jala didok Debata, boi do nasida mangolu saleleng ni lelengna disi.​—1 Musa 2:15-24.

Halak Hindu pe porsea do adong paradeiso najolo, nang pe dang sarupa paradeiso na dibayakkon nasida dohot na dibayakkon agama na asing. Songon i do tong halak Buddha. Didok nasida, sian jaman keemasan do ro pamimpin agama ni nasida. Di tikki i didok nasida songon paradeiso dope tano on. Jala godang do agama di Afrika na mangajarhon cerita na mirip tu cerita taringot si Adam dohot si Hawa.

Sebenarna godang do agama na mangajarhon adong paradeiso najolo. Jala godang do dongeng na ceritana mirip tusi. Adong sahalak penulis na mandok, “Godang do halak na porsea adong paradeiso najolo. Sempurna do sude disi, adong kebebasan, hadameon, las ni roha, godang sipanganon, dang adong halak na mamaksa donganna, jala dang adong parsalisian dohot parbadaan. . . . Alani i ma tarpaima-ima dope halak adong muse paradeiso i.”

Boi do dokkonon sarupa do asal usul ni dongeng dohot cerita i? Manang alana diingot jolma do adong paradeiso najolo makana adong ajaran sisongon i? Toho do memang adong Taman Eden najolo, songon i nang si Adam dohot si Hawa?

Alai godang do halak na so porsea adong Taman Eden najolo. Tarlumobi ma ala nungnga maju jaman, godang do halak na mandok holan dongeng dohot cerita na dibahen-bahen jolma do taringot Taman Eden i. Dang holan parsikkola na timbo na so porsea adong Taman Eden, alai dohot do tong akka pamimpin agama. Didok nasida dang toho adong Taman Eden najolo. Holan dongeng, perumpamaan, dohot cerita na dibahen-bahen jolma do i.

Memang godang do perumpamaan na dipaboa di Bibel. Jesus pe sering do paboahon perumpamaan na terkenal. Alai dang perumpamaan cerita na dipaboa Bibel taringot Taman Eden. Justru sejarah na hea masa do i. Asing ni i, molo dang toho cerita na dipaboa di Bibel taringot Taman Eden, berarti dohot do dang toho cerita na asing na dipaboa di Bibel. Jadi saonari taida ma boasa dang porsea akka halak adong Taman Eden najolo. Jala taida ma masuk akkal do alasan ni nasida i manang na dang. Dung i taida ma boasa penting cerita taringot Taman Eden i tu hita sude.