Edɛni fie’n ?I yɛ ɔ ti sran’m be tranwlɛ klikli’n niɔn?

MAAN ɔ yo e kɛ e o fie klanman kun nun sa. Ninnge woyowoyo nga be yo be klɔ’m be su’n, e timan wie fi ngan lɔ. Fie sɔ’n ti dan kpa, yɛ kɛ e ti lɔ diin’n, like fi kleman e yalɛ. I kpa’n, e siman akluntitiɛ nin tukpacɛ. Ɔ leman like kun sa m’ɔ nin e wunnɛn’n sɛman ɔn, yɛ e lika wie fi yoman e ya. E kwla di fɛ wafawafa’n kwlaa kpan.

Kɛ e nian waka mɔ b’a bo nɲrɛ klanman’n, ɔ yoman e kɛ e yaci be nianlɛ. Kɛ é tó e ɲin ɔn, nzue yɛ ɔ́ sónji yɛ, ɔ bo mianmianmian. Like ng’ɔ yo ɲɛnmɛn ekun’n, yɛle waka nɲa nin ijre’n. Be ti ble mlanmlanmlan, yɛ kɛ wia’n gua su’n ɔ kpɛ fɔnvɔ klanman cɛ. Aunmuan’n fita e wun fɛɛ, yɛ lika’n bɔn fanninfannin. E ti nɲanɲa’m be tɛlɛ wɛɛ, ɔ nin nzue m’ɔ sonji gua yɛbuɛ’m be su kpuu’n. E ti anunman’m be kpanlɛ. Yɛ kakaa kɛ zɔgɔda sa’n, kɛ bé tú’n e ti be ngan wie. ?Kɛ e bu i sɔ lika’n i akunndan’n, ɔ yoman e kɛ e tran lɔ?

Asiɛ wunmuan’n su’n, sran’m be bu i kɛ, kɛ klɔ sran’m be tranwlɛ klikli’n ti kɛ ngalɛ’n sa. Kɛ ɔ fɛ i lalafuɛ nun lele’n, i Zuifu’m be Ɲanmiɛn sulɛ wafa’n nin be nga be tɔn be wun suɛn kɛ be ti Klistfuɛ’n be nunfuɛ mun o, i Ɲanmiɛn flɛfuɛ mun o, be kwlaa’n, be kleli be Edɛni i su like. Fie sɔ’n nun lɔ yɛ Ɲanmiɛn fali Adam nin Ɛvu sieli ɔ. Biblu’n waan lɔ’n, be trannin fɔundi nin aklunjuɛ nun. Be nin be wiengu sran nin nnɛn mun be trannin klanman. Yɛ be nin Ɲanmiɛn m’ɔ kunndɛli kɛ be ɲan anannganman nguan lika klanman sɔ’n nun’n be afiɛn’n sɛli wie.—Bo Bolɛ 2:15-24.

Ɛndu’m be kusu’n, ɔ le be laa mɛn klanman liɛ’n i su ndɛ liɛ mɔ be kan ɔn. Budafuɛ’m be lafi su kɛ be ɲrun dinfuɛ dandan mɔ be flɛ be Buda’n be ti blɛ kun mɔ asiɛ wunmuan’n ti kɛ mɛn klanman sa’n i nunfuɛ. Sran ble mɛn’n nun kusu’n, Ɲanmiɛn sulɛ wafa kpanngban be kan ndɛ wie m’ɔ nin Adam nin Ɛvu be liɛ’n be fa be wun kpa ɔ.

I kpa’n, mɛn klanman ndɛ’n wo klɔ sran’m be Ɲanmiɛn sulɛ nin be lalafuɛ ndɛ kpanngban nun. Fluwa klɛfuɛ kun seli kɛ: “Nvlenvle kpanngban be buli i kɛ laa mɛn klanman kun o lɛ. Naan lɔ’n lɛ nunman like fi nun. Kpɛkun alaje nin aklunjuɛ yɛ sran’m be di ɔ. Kusu like fi mianman be sa, yɛ be mianmianman sran fi lɔ, kpɛkun ndɛnnganndɛnngan nunman lɔ. [...] I sɔ’n yoli maan sran’m be  kwlakwla be wla lo mɛn klanman m’ɔ sacili’n. Kpɛkun be kunndɛ kɛ be ko yo naan b’a ɲɛn i ekun’n.”

?Mɛn klanman’n i su ndɛ wafawafa sɔ’m be ngba be finwlɛ’n kwla yo kun? ?E kwla se kɛ ndɛ sɔ’n i nanwlɛ m’ɔ ti’n, i ti yɛ maan ɔ o sran kpanngban be akunndan’n nun mɛn wunmuan’n nun ɔn? ?Laa Edɛni fie’n nga be kɛn i ndɛ’n, ɔ ti fie jrɛiin sakpasakpa? ?Yɛ Adam nin Ɛvu be ti sran jrɛiin?

Kɛ be kɛn i sɔ ndɛ’n, be nga be lafiman su kɛ ɔ yoli sɔ sakpa’n, ɔ kle be srilɛ. E blɛ liɛ nga nun’n like kwlaa taka siansi’n su. Ɔ maan sran sunman be bu i kɛ ndɛ kɛ ngalɛ’n sa’n be ti sunnzun ase annzɛ ngua dilɛ nun ndɛ. Ng’ɔ ti abonuan’n, yɛle kɛ nán be nga be lafiman Ɲanmiɛn su’n be ngunmin yɛ be buman mɛn klanman’n i su ndɛ’n i nanwlɛ ɔ. Ɲanmiɛn sulɛ wafawafa’m be su kpɛnngbɛn sunman be yo naan sran’m b’a lafimɛn i sɔ’n su. Be waan b’a dimɛn i sɔ fie liɛ’n asiɛ’n i lika wie fi le. Kpɛkun be waan mɛn klanman’n i ndɛ nga Biblu’n kannin’n, ɔ ti ɲanndra nun ndɛ annzɛ ngua dilɛ.

Ɔ ti su kɛ ɲanndra wie’m be o Biblu’n nun. Ɲanndra sɔ’m be nun nga sran’m be si be kpa’n, Zezi yɛ ɔ buli be ɔ. Sanngɛ Biblu’n seman kɛ Edɛni fie’n i su ndɛ’n ti ɲanndra nun ndɛ. Ɔ kle kɛ lalafuɛ ndɛ sakpasakpa ɔ. ?I kpa’n, sɛ Edɛni fie’n i su ndɛ nga Biblu’n kan’n timan nanwlɛ’n, ɔ́ yó sɛ naan y’a kwla lafi Biblu’n i nun ndɛ onga’n su? Like nga ti yɛ sran wie’m be lafiman su kɛ fie kun o lɛ laa naan be flɛ i Edɛni fie’n, maan e fa e ɲin e sie su. Yɛ e nian naan sɛ be ndɛ yo fɛ o. I sin é wá wún like nga ti yɛ ɔ fata kɛ ndɛ sɔ’n yo e cinnjin’n.