Eden Dum Cu Minung i Hmasa Bik An Inn A Si Maw?

EDEN dum ah ka um tiah na mitthlam ah cuanter hmanh. Lungvaivuanhnak a um lo, khuapi bantukin hna a chet lo i aa tuai-urmi thil zong a um lo. Mah dum cu a ngan tuk lengah hnahnawhnak zeihmanh a um lo caah a dai i a him. Mah lengah lungretheih ding zeihmanh a um lo caah lungfim tein na um. Zawtnak, i ziak lomi le fahnak ti bantuk hna a um lo caah na ngan a dam. Na pawngkam zong kha zalong tein na hlathlai khawh.

A rong a phunphun a simi pangpar hna na zoh hnuah ni ceu tangah tleu dildel in a luangmi tiva lei kha na zoh. Cun ni a hmuhnak le ni a hliapnak hmun ah a ummi hramh hring tete le thinghnah tete kha na hun zoh ṭhan. Thlizil a hung hrang i thli thiang kha na hun dawp. Thinghnah pawl an cawlmi, lung cungah a tlami ti thawng, va pawl hla an sakmi aw le a dang aw thawng kha na theih. Mah bantuk aa dawh tukmi hmun kha na mitthlam na cuanter tikah cuka ah um na duh tuk lai, a si ko lo maw?

Mi tampi nih mah bantuk hmun ah mi an rak um bal ti kha an zumh. Judah biaknak, Khrihfa le Islam biaknak hna ah Adam le Evi an umnak, Eden dum kong an rak cawnpiak hnanak cu kumzabu tampi a si cang. Mah dum ah Adam le Evi cu nuam tein an rak um tiah Baibal nih a langhter. Adam le Evi an pahnih karah siseh, saram karah siseh daihnak a um lengah Pathian he zong a ṭhami pehtlaihnak an rak ngei.​—Genesis 2:​15-​24.

Hindu biaknak zong nih hlanlio ah a nuam i a daimi dum (paradis) a rak um tiah an zumh. Cun Buddhist zong nih hi vawlei cu paradis phun a rak si lioah pathian pawl an rak chuak i a hnu zongah cutin an chuak ṭhan lai tiah an zumh. Africa ah a ummi biaknak hna zong nih Adam le Evi kong he aa lomi tuanbia pawl kha an cawnpiak hna.

Paradis kong he aa tlaiin ruahnak tampi kha biaknak tampi le phungphai hna ah hmuh khawh a si. Caṭialtu pakhat nih hitin a ti: “Minung tuanbia a thawknak ah tlinnak, zalonnak, daihnak, nuamhnak le  rumnak a rak um i namnehnak, hneknak, i dohnak le i ralchanhnak zong a rak um lo tiah miphun tampi nih an zumh. . . . Cutin an zumh caah a tlau cangmi paradis kha an hlam i hmuh ṭhan awkah an i zuam.”

Mah tuanbia le phungphai hna cu a hrampi a kong pakhat in aa thawkmi a si taktak hnga maw? Mi nih paradis ah um an duhmi cu hlanlio ah a cangmi thil pakhatkhat kha an i cinken caah a si hnga maw? Eden dum, Adam le Evi cu a hlanah a rak um taktakmi an si maw?

Eden dum cu a rak um taktakmi a si ti kha mi tampi nih an zum lo. Science lei fimthiamnak a ṭhangchomi tuchan ah mi tampi nih mah kong kha phuahchommi tuanbia men in an hmuh. Khuaruahhar awk a simi cu mah kong a zum lomi dihlak cu biaknak a ngei lomi hna lawng an si lo. Biaknaklei hruaitu tampi nih Eden dum cu a um bal timi zumhnak kha cohlan lo awkah an forh hna lengah mah bantuk hmun cu a um bal lo, cucaah mah cu phuahchommi tuanbia le langhternak sawhsawh men a si tiah an ti hna.

Baibal ah langhtermi thil hna a um ti cu a hmaan ko. Mah hna lakah a min a thang tukmi langhternak pakhat kong kha Jesuh nih a rak chim. Asinain Baibal ah langhtermi Eden dum cu langhternak men si loin tuanbialei in a um taktakmi hmun pakhat a si. Mah dum cu a um taktakmi a si lo ahcun Baibal ah langhtermi a dang kong hna zong zumh khawh an si ti lai lo. Eden dum kong he aa tlaiin mi cheukhat nih zeicah an zumh lo timi kong kha hlathlai in an chimmi cu a hmaan maw ti kha zohhmanh hna u sih. Mah lengah Eden dum cu pakhat cio caah zeicah a biapit timi kong zong kan i ruah hna lai.