Iteni​—A iTikotiko Taumada ni Kawatamata?

RAITAYALOYALOTAKA mada ni o tiko voli ena dua na were. O sega ni rogoca kina na tatamosamosa ni bula osooso ni siti. E vakaitamera na were qo qai vakanomodi. Koya e uasivi sara ni galala na nomu vakasama, sega ni o tauvimate, se na mosi qai sega ni dua na ka e lako vakaca ina nomu bula. E taucoko na nomu bula mo marautaka kina na veika e tu yavoliti iko.

Ni o rai yani e dreta sara na matamu na totoka ni sereka ni senikau, na taliva ni wai ni cilava na siga, kei na co e vakaruguta na veimataqali kau drokadroka. O vakila na mudre malua ni cagi kei na boi kamikamica ni senikau. O rogoca na carosa ni draunikau, na vadugu ni wai e veivatu, na tamela ni nodra sere na manumanuvuka kei na manumanu somidi nira cakacaka voli. Ni o vakasamataka na ituvaki qo, sega li ni o vinakata mo bula kina?

E levu e veiyasa i vuravura era vakabauta ni a tekivutaki na bula ni kawatamata ena dua na vanua va qori. Sa vica vata na senitiuri era vakavulica voli mai kina na lotu vakaJiu, lotu ni Veivanua vaKarisito, kei na lotu Musilimi na veika me baleta na were o Iteni a vakatikori rau kina o Atama kei Ivi na Kalou. E tukuna na iVolatabu ni rau a bula vakacegu, erau marau tale ga. Erau veiyaloni vakataki rau, ira na manumanu rau qai veiyaloni tale ga kei na Kalou me rawa ni rau nuitaka kina na bula tawamudu ena ituvaki totoka oya.​—Vakatekivu 2:​15-​24.

E duatani toka na nodra ivakavuvuli na lotu Idu me baleta e dua na parataisi ena gauna eliu. O ira na lotu Buda era vakabauta ni o ira na iliuliu levu ni nodra lotu, era cadra mai ena gauna totoka ni se parataisi na vuravura. Ia era vakavulica e levu na lotu mai Aferika na italanoa e via tautauvata kei na nodrau bula o Atama kei Ivi.

E macala ni kune ena levu na vakabauta kei na ivakavuvuli ni lotu na vakasama ni a tu na parataisi ena dua na gauna eliu. E kaya e dua na dauvolaivola: “Na parataisi a tu ena dua na gauna eliu e kune kina na bula uasivi, bula galala, na vakacegu, marau, sautu, e sega kina na veivakarerei, veivala, kei na veileti. . . . Na  vakabauta qo era vinakata kina na kawatamata me vakalesui tale mai na parataisi sa yali.”

E dua beka ga na vanua e yavutaki mai kina na italanoa kei na ivakavuvuli kece qori? E vakamua beka na ka era vinakata na kawatamata nodra vakabauta e dua na ka a tiko dina? A dua dina na vanua na were o Iteni ena gauna eliu? Rau a bula dina tale ga o Atama kei Ivi?

O ira na dau veivakadiloi era vakatitiqataka na vakasama oya. Ena tabagauna vakasaenisi qo, e levu era nanuma ni itukutuku va qori e itukuni ga. E kurabuitaki ni sega ni o ira ga na dauvakatitiqa era sega ni dau kauaitaka na veika vakayalo. Ia o ira sara mada ga na iliuliu ni lotu era uqeta na kena sega ni vakabauti ni a tiko dina na were o Iteni. Era tukuna ni were o Iteni e sega ni dua dina na vanua. E italanoa buli, vosavakatautauvata, se itukuni ga.

Io, e tu ena iVolatabu na vosavakatautauvata. A tukuna sara ga o Jisu na vosavakatautauvata e kilai levu duadua. Na itukutuku me baleti Iteni ena iVolatabu e sega ni vosavakatautauvata, ia e itukutuku makawa ni dua dina na vanua. Ke sega ni yaco dina na veika e vakamacalataki qori, ena nuitaki vakacava na vo ni itukutuku ena iVolatabu? Meda raica mada na cava era vakatitiqataka kina eso na were o Iteni kei na noda raica e dina qori se lasu. Oti eda na raica na vuna meda kauaitaka kina na ivolatukutuku qo.