Edén ¿yete ni kä nebätä namani kena?

MÄTÄ kä bä nuäre aune kä jäme te mente kukwe tä nakaninkä juta yebätä yete ye bämike ja töite. Mä ñan tä ja töibikaire mä ngrabare tä kwin aune ñaka ja tare nike. Kä ükaninte bä nuäre ye tä mä töi mike ñan krütare.

Kä bä nuäre krubäte tä ye ni kukwei nemen braibe ño ye niekäre: ñänä trä tä mate kri ngwäre, kriblü bätäkä nuäre nuäre tä, murie bälen tä kri ngwen ngrenkä, nukwä käkukwe bätäkä niken kä ngrabare, öba ngwike ngö tä ni olo dikete kri blü ñöi mane känänbätä, ñö ngwenbrere trä ngitiekä tä nen jäbätä kuintubu... ¿Nire ñan törba ja tuai yete?

Kä ne kwrere te nitre nünanbare kenanbe ye nieta nitre kwati kä jökrä bitikwe. Ni rün kena nünanbare kä bä nuäre Edén yete kä kwati te, ye nitre judío, kristiano aune musulmán tä mike era jai. Niaratre nibu nämäne nüne kä jutobiti aune jäme jabe aune arato jondron nire yebe nieta Bibliakwe. Ne madakäre nämene ja kete kwin ni jondron jökrä sribekä yebe, töi kwinbiti niarakwe ja nire käre biani ietre (Génesis 2:15-24).

Kirabe sete kä nämene bä nuäre aune nämäne kwin nünankäre ye drieta nitre hindukwe arato. Nüna nämäne kwin näire dirikä ja üairebiti buda ye nükani nieta nitre budistakwe. Ye erere arato, kukwe keta kabre mikata täte África yete tä kukwe bä ja kwrere niere kukwe nakaninkä Adán aune Eva yebätä yebe.

Metrere, kä bä nuäre ükaninte kena ye mikata era jai nitre bäsi jökräkwe aune nitre kukwe jene jene mike tätekwe. Ni iti ütiäte ja tötikaka kukwe nakaninkä kirabe yebätä Jean Delumeau, tä niere “Kä bä nuäre ükaninte kenanbe känti ni ngite ñakare, kukwe jökrä nuain nämäne, nüna nämäne jäme aune kä jutobiti, jondron ere nämene, ni blo ñaka nämäne aune nitre ñan nämäne ja rüere ye mikata era nitre kwati nüke ne ngwane. [...] Kukwe ne meden ererebätä ni bäsi jökrä tä nemen ulire ñobätä ñan aune kä bä nuäre nianinte, akwa käi ñaka nikwitekä jire aune tua töta jakwe bobukäreta”.

¿Ñobätä nitre kwati tä kukwe ne mike era jai? ¿Kukwe nakaninkä ye tä ni jökrä töite? ¿Adán aune Eva ye nämäne kä bä nuäre Edén yete bäkänä?

Kukwe ne ñan ruin era nitre kwati ie. Kukwe mrä mrä mikata gare bäri kä ne näire yebätä nitre kwati ñan tä kä bä nuäre ye mike era jai. Kä bä nuäre Edén ye ñan ye ñan metre ye nitre ji ngwanka iglesiate ruäre ara tätre niere, kukwe ye ngwarbe blitata aune kädrieta nieta kwetre.

Bäkänä Bibliabätä kukwe keta kabre nieta kukwe bämikakäre. Jesukwe kukwe bä mikani nitre ja tötikaka kwe ie kukwe ja töi kräke driekäre ie ye metrere gare nitre kwati ie. Akwa Ngöbö kukwei tä blite kä bä nuäre Edén yebätä ngwane tä kukwe kä driere kukwe nakaninkä metre erere aune ñan kukwe bämikakäre jerekäbe. Ne ñan era akräke, ¿ño ni raba tö ngwen kukwe mada tä tikani Bibliabätä ie? Aisete, ¿ñobätä nitre ruäre ñan tä tö ngwen kukwe ne ie yebätä ari ja kite? Biti ñobätä kukwe ne ütiäte ni itire itire kräke ye nikwe mikai gare jai.