Waar te Eetem kaate ti mënxheet sayn eyerst haymat?

TENK MOOL tuu weyerst in een kaate. Tat is khee kerumpelts fon te xtat, tuu pist fray fon ale propleeme un prauchst tich iwich niks ketanke mache. Tuu pist kesunt, xpiirst khee phayn. Ales is in friit, un tuu khanst tich fraye mit ales woo um tich rom is.

Tuu khanst siin ti xeene farpe fon te pluume, sauwer un klensich waser, fiil sorte kriines, tëm noo wii ti sun triwer xayn. Tuu xpiirst te friix wint iwich tayn haut un te siise keroch woo tee mit pringt. Tuu heerst te wint in te peem, waser woo iwich ti felse laaft, heerst ti feechel singe un ti insëkte prume. Wëns tuu tich tas ales foer xtelst, weyerst tuu net kërn uf soo een plats?

In te kans welt, sin layt woo klaape tas ti mënxheet uf soo een plats aan kefang hot. Torich hunerte yoore, hon mitkliiter fon yutaiismus, fon te kristenthum un fon islamismus kelërnt iwich te Eetem kaate, tas plats woo Kot Aatam un Ewa hin ketuun hot. Soo wii ti Piipel saat, tiise pheyerche hot een kuut un froo leepe kehat. Tii waare in friit eene mim anere, mit te tiere un aach mit Kot, woo iir mit kuutheet ti hofnung kep hot fer leepe fer imer in soo een xeen plats. (Xeenesis 2:15-24)

Ti hintuu hon aach iire aychne klaape iwich een friirixe paratiis. Ti putister klaape tas ti kroose relichyeese xëfe, orer budas, khome tsum foer xayn in tsayte woo kenënt sin koltne tsayte, woo ti welt wii een paratiis is. Un fiil afrikanixe relichyoone lërne kexichte woo sich klayche mit Aatam un Ewa.

Ti meyerste relichyoone un mënxliche tratitsyoone klaape aan een friirixe paratiis. Eene xrayper saat: “Fiil kultuer klaape aan een friirixe paratiis, woo ales waar perfekt, fray, in friit, mit kroos frooheet, fiil esmitel, khee xtrayt, niks kefeerliches. . . . Tes weeche, hon ti layt in sich te ferlange fon een ferloerne awer net ferkesne paratiis, un hon te xtarke wunx fer eene taach te paratiis tsurik kriin.”

Meechte tiise kexichte un tratitsyoone te selwiche aanfang hon? Meechte ti layt tiise klaape in sich hon wayl tas wërklich woer waar? Hon Aatam, Ewa un te Eetem kaate friier wërklich eksistiirt?

Fiil xpote iwich tiise klaape. In unser tsayte, mit fiile syentifixe khëntnis, sin fiil woo saan tas tiise kexicht aus ketacht is woer. Un tas is wunerlich tas soo kaar etliche relichyeese xëfe saan tas es hot khee Eetem kaate kep. Tii saan tas es weyer ploos een ausketachtne kexicht fer etwas aus leye orer fer etwas mit ferklayche, orer een reetsel.

Sicher, in te Piipel, xteen fiil reetsle woo uns helfe etwas ferxteen. Yeesus selepst hot fiil fon tëne fertseelt. Awer ti Piipel tsaycht, tas tas kexicht iwich te Eetem kaate is net aus ketacht, awer een woere kexicht. Wën ales was ti Piipel saat iwich te Eetem kaate net woer is, wii sole mer klaape aan ti rest fon te Piipel? Wole mer siin warom etliche net aan te Eetem kaate klaape un ep se recht hon. Noochte, wole mer siin warom tiise kexicht uns interesiire solt.