Kati Kebun Eden Endur Asal Mensia Diau?

GAMBARKA siti kebun ti besai, manah, sereta lantang. Dia nadai pencemaran bunyi lalu angin ba dia amat beresi. Nuan idup enggau bibas sereta gaga ati. Pengerai nuan sempurna. Nadai utai ke ngachau nuan dia.

Lebuh bejalai ba kebun nya, nuan ulih meda mayuh macham chura bungai sereta sungai ti chiru. Ba mua nuan bisi padang ti besai lalu mayuh gunung ti ulih dipeda nuan. Angin bepuput lalu bau bungai ti manah ulih disium nuan. Nuan mejamka mata lalu ningaka bunyi kicau burung sereta bunyi indu utai ti ngelingi nuan. Gambarka meh utai tu. Kati nuan deka diau ba endur ti baka tu?

Mayuh orang di serata dunya pechaya sepasang mensia ti keterubah diau ba endur ti dipadah tadi. Pengelama beratus taun, orang ke megai pengarap Judah, Kristian, enggau Islam diajar pasal Petara ti ngengkahka Adam seduai Awa ba Kebun Eden. Nitihka Bup Kudus, sida idup enggau likun sereta lantang ba dia. Sida bisi kaul ti manah enggau pangan diri sereta enggau jelu. Sida mega bisi kaul ti rapat enggau Petara ti udah meri sida pengidup ti meruan ba kebun ti manah nya.—Pemungkal 2:15-24.

Pengarap Hindu mega ngembuan ajar sida empu pasal paradais. Orang ke megai pengarap Buddha mega pechaya, bala tuai pengarap sida ke mega dikumbai Buddha, berengkah bisi lebuh gaya dunya agi baka paradais. Sekeda pengarap ba Afrika mega ngajar cherita ti sama enggau cherita pasal Adam seduai Awa.

Kebendar iya, mensia ari bemacham penatai pengidup pechaya pasal paradais. Seiku pakar sejarah madahka, “Mayuh orang ari mayuh jeman pechaya paradais nya amat bisi ba jeman kelia lalu endur nya sempurna, bibas, likun, lantang, serta ngagaka ati. Nadai penusah, penanggul tauka utai ti jai dia. . . . Pengarap ke baka tu udah nyadi sebagi ari mensia. Ketegal nya, mensia bisi pengingin deka mulaika baru dunya tu nyadi paradais.”

Nama kebuah bisi mayuh ajar sereta runding ti sebaka pasal paradais? Kati semua utai ti dipechaya tu bisi asal ti sama? Kati Kebun Eden, Adam, enggau Awa amat-amat bisi?

Ba jeman moden tu, mayuh orang enda pechayaka ajar pasal paradais. Sida ngumbai nya cherita ensera aja. Mayuh tuai pengarap ngajar, Kebun Eden enda kala bisi. Sida madah, cherita nya semina cherita ensera aja.

Bup Kudus ngembuan mayuh sempama. Lalu Jesus empu kala bekunsika nya enggau bala murid iya. Tang cherita pasal Kebun Eden ukai cherita ke digaga-gaga, tang iya cherita ti bendar sereta bekaul enggau sejarah mensia. Ketegal cherita tu bekaul enggau pengarap kitai pasal Bup Kudus, kitai patut nemu sekalika cherita nya amat tauka enda. Aram kitai mansik kebuah sekeda orang enda pechaya Kebun Eden nya amat bisi, sereta sekalika tegal sida ulih diterima tauka enda. Kitai mega deka meda kebuah cherita pasal Kebun Eden beguna ba semua kitai.