Edeni Keti Yo Vandaka Kisika ya Ntete Yina Bantu Kuzingaka?

KUDIMONA na kati ya kilanga mosi. Yo kele ve ti mambu ya kekatula dikebi na nge, ata makelele mosi ve ya kewakana na zulu ya bibaka ya penepene ya kekatuka na mbanza mosi ya mubulu. Kilanga yai kele nene, mpi ata kima mosi ve kekatula ngemba na yo. Dyaka, mabanza na nge mekonda basusi, ata maladi mosi ve keyangisa nitu na nge. Nge kele ti makuki ya kumona, kuwa ntomo ya bima, kuwa makelele, kuwa nsudi, mpi kusimba bima yina kele na nzyunga na nge.

Meso na nge kesepela na mikubu ya bintuntu, nsemo ya nzadi, mpi matiti ya banti ya kemonana na nsemo ya ntangu mpi ya kizuzi. Nge kewa mutindu mupepe kebula nge na nitu mpi nsudi ya kitoko yina yo kebasisa. Nge kewa makelele ya nsi-nsi ya matiti yina kenikana, mutindu masa kebula na matadi, makelele ya bandeke mpi ya baniama yina kesala kisalu mosi buna. Ntangu nge kemona mambu yina na mabanza na nge, keti nge kesepela ve na kuvanda na kisika ya mutindu yina?

Bantu na nsi-ntoto ya mvimba kendimaka nde bantu kuyantikaka luzingu na kisika ya mutindu yina. Banda bamvu-nkama mingi, bo longaka bantu ya dibundu ya Bayuda, ya Kikristu, mpi Bamizuluma mambu ya metala kilanga ya Edeni, kisika yina Nzambi kutulaka Adami ti Eva na kuzinga. Biblia ketuba nde, bo vandaka na luzingu mosi ya ngemba mpi ya kyese. Bo vandaka na ngemba na kati na bo mosi, na bambisi, mpi na Nzambi, yina kupesaka bo na luzolo yonso kivuvu ya kuzinga kimakulu na kisika yina ya kitoko.—Kuyantika 2:15-24.

Ba Hindu mpi kevandaka na bangindu ya kuswaswana na yina metala paladisu na ntangu ya ntama. Babudiste kekwikilaka nde bantwadisi ya nene ya kimpeve, to Babuda kubasikaka na nsungi yina mambu yonso kuvandaka kitoko ntangu nsi-ntoto vandaka bonso paladisu. Mabundu mingi mpi ya Afrika kelongaka masolo ya mefwanana ti disolo ya Adami ti Eva.

Nkutu, ngindu ya paladisu ya ntama kemonana na mabundu mpi na binkulu mingi. Nsoniki mosi kusonikaka nde: “Bantu  mingi kekwikilaka nde na paladisu ya luyantiku bantu kuvandaka ya kukuka, ti kimpwanza, ngemba, kyese, ti bima mingi ya kudya, bampasi mpi kukonda kuwakana kuvandaka ve. . . . Lukwikilu ya mutindu yina mebasisaka na mabanza ya bantu mingi bangibusa ya paladisu yina mevilaka kansi ya bo mevilaka ve mpi mpusa ya ngolo ya kuvutula yo.”

Keti yo lenda vanda nde masolo yina yonso mpi binkulu yina mekatukaka na kisina mosi? Keti yo lenda salama nde “mabanza yina bantu mingi” kele na yo mekatukaka na dyambu mosi yina kele ya kyeleka? Keti kilanga ya Edeni kuvandaka mpenza na ntangu ya ntama mpi yo vandaka mpenza ti Adami mpi Eva?

Bantu yina ketulaka ntembe na mambu ya Nzambi, kevwenzaka dibanza yina. Na nsungi na beto yai ya siansi meyela, bantu mingi ketubaka nde masolo yina kele kaka ya luvunu to masapu. Dyambu ya keyitukisa kele nde, bantu yonso ve ya ketulaka ntembe na mambu yina, kesambilaka ve. Bantwadisi mingi ya mabundu kepusaka bantu na kundima nde kilanga ya Edene kuvandaka ve. Bo ketubaka nde kisika ya mutindu yina kuvandaka ve ata fyoti. Bo ketubaka dyaka nde disolo yina kele kaka kutuba mosi ya kifwani, disolo ya luvunu, masapu to kingana.

Ya kyeleka, Biblia kele ti bingana. Yezu yandi mosi kutubaka bingana yina mezabanaka mingi. Kansi, Biblia ketubilaka disolo ya Edeni bonso kingana ve, kansi bonso disolo mosi ya kyeleka mpi ya pwelele. Kansi, kana mambu yina Biblia ketubila kusalamaka ve ata fyoti, inki mutindu beto lenda tula ntima na mambu yankaka ya Biblia? Bika beto tadila sambu na nki bantu yankaka ketulaka ntembe na yina metala kilanga ya Edeni mpi kana bikuma na bo kele mpenza ya masonga. Na nima beto tatadila kikuma yina disolo yango ketadila beto yonso.