Edeni — pileqqaarnerani inuit angerlarsimaffigaat?

TAKORLOORUK naatsiivimmiillutit. Akornusersuisoqanngilaq, eqqaani illoqarfeqarpoq, paatsiveerusimaarlunili perpaluttorsuaqanngilaq. Naatsiivik isorartoqaaq, suullu tamarmik eqqissisimanarput. Isumakuluuteqannginnavilli nuannerneruvoq, nappaammik, sapigaqarnermik anniaatinillu erloqisitaanngilatit. Avatangiisitit tamakkiisumik malugisinnaavatit.

Naasut qalipaatigissaartut, kuuk qillalaartoq orpiillu pilutaat ivikkallu assigiinngissitaartunik qorsooqqissuusut seqinermi tarranitsitersimasut qimerloorpatit. Anorsaannguaq malugisinnaavat nunasunnilu naamasinnaallugu. Naasut pilutaat imminnut tagiuuppaluttut, kuuk ujaqqanut imaruarpalaartoq, timmissat qarlorpaluttut sullernillu ulapaarpaluttut tusaavatit. Tamakku tamaasa takorloorsinnaallugit sumiiffimmi taamaattumiikkusungaalerputit, ilaa?

Silarsuarmi sumi tamaani upperineqarpoq inuit sumiiffimmi taamaattumi aallartiffeqartut. Ukiuni hundredelinni juutiussutsimut, kristumiussutsimut islammimullu ilaasortaasut naatsiivik Edeni, Guutip Adamimut Evamullu najugassiissutaa, pillugu ajoqersorneqarsimapput. Biibilimi oqaluttuarineqarpoq eqqissillutik pilluarlutillu inuusut. Eqqisseqatigiillutik, uumasut eqqisseqatigalugit Guutilu, asannilluni avatangiisini alianaatsuni taakkunani naassaanngitsumik inuunissamik neriuuteqalersitsisoq, eqqisseqatigalugu inuupput. — 1 Mosesi 2:15-24.

Aamma hindut itsaq paratiisi pillugu immikkut takorluugaqarput. Buddhistit upperaat anersaakkut siuttut pingaartorsuit, imaluunniit Buddhat, ulluni pilluarnartuni taamaattuni silarsuup paratiiserpalaarnerani saqqummersartut. Aamma Afrikami upperisarsioqatigiippassuit Adami Evalu pillugit oqaluttuamut assingusorujussuarnik ajoqersuuteqarput.

Pileqqaarnerani paratiisimik eqqarsaat upperisariassigiinngitsorpassuarni ileqqorpassuarnilu erserpoq. Oqaluttuarisaanermik ilisimatooq ima allappoq: “Inuiappassuarni upperineqarpoq itsaq paratiiseqartoq naammalluinnassuseqarfiusumik, kiffaanngissuseqarfiusumik, eqqissisimaffiusumik, nuannaarfiusumik pigissaarfiusumillu, aamma naqisimaneqarfiunanilu isumaqatigiinngittoqarfiunanilu akerleriittoqarfiunngitsumik. . . . Taamatut upperisaqarneq  paratiisimut annaasamut, puiorneqanngitsumulli kajungernerujussuarmik piulerseqqinneqarnissaanillu kissaatiginninnerujussuarmik sianissuseqaqatigiinnermi pilersitsivoq.”

Oqaluttuat ileqqullu tamakku tamarmik ataatsimik pilerfeqarpat? Imaassinnaava inuiaat ‘sianissuseqaqatigiinnerat’ arlaannik piviusimasumik sunnerneqarsimasoq? Naatsiivik Edeni aamma Adami Evalu ilumut itsarsuaq piusimappat?

Isuma tamanna qularutiginnittunit akerlilerneqarpoq. Ukiuni makkunani ilisimatuussutsikkut pingaartitsiffiusuni oqaluttuat taamaattut inuppassuarnit oqaluttualiaannartut isigineqarput. Qularutiginnittut ilaat upperisarsiornermik pingaartitsisuummata tupaallannarpoq. Upperisarsiornikkut siuttorpassuit naatsiiviup Edenip piusimanngisaannarneranik eqqarsaat tapersersorpaat. Oqartarput oqaluttuaq taanna assersuutaannaasoq oqaluttualiaannaasorluunniit.

Biibilimi assersuuteqarnera ilumoorpoq. Jiisusip nammineq taakkua ilisimaneqarnersaat oqaluttuarai. Edenili pillugu Biibilimi oqaluttuaq assersuutitut oqaluttuarineqarnani piviusutut oqaluttuarineqarpoq. Oqaluttuarineqartutulli pisoqarsimanngisaannarpat, taava Biibilip sinnerani allassimasut qanoq upperineqarsinnaassappat? Sooq naatsiivimmut Edenimut tunngatillugu qulartoqarnersoq qularnerminnullu tunngavilersuuteqarluarnersut misissoriartigu. Taava sammissavarput sooq oqaluttuaq taanna tamatsinnut pingaaruteqarnersoq.