Nanchi Bujimi bwa Edena—Wajinga Muzhi Mutanshi wa Bantu Nyi?

IFWANYIKIZHAI kuba’mba muji mu mpunzha yawama bingi! Kafwamo kya kwimukatazha ne. Kabiji kechi mujipo kyungye kijipo mu mataunyi muji myotoka yavula ne. Ino mpunzha yabaya bingi kabiji kechi mujipo bintu bya kwimulengesha moyo ne. Anweba mufwabyo bijikila. Kabiji muji na butuntulu bwa mubiji bwawama bwa kubula kukolwa. Anweba mwaikalatu ku matwi nzoo mu mpunzha yenu.

Mubena kutajisha maluba, mubena kumona mema byo abena kubekauka mu tukola. Kabiji mwatala pa mabuula atenkuma bulongo ne nsono ya munyemvu ibena kumweka bulongo mu mute ne mu kimfutele. Kamwela katalala kabena kupuupa ne kuleta bwema bwawama bwa maluba. Mubena kumvwa mabuula abena kulakata ku bichi ne mpoota ya mema ibena kupomokela pa mabwe, bañonyi nabo babena kwimba ne tulongolo tubena kwingila. Kinetu mwafwainwa kutemwa bingi kwikala mu mpunzha iji bino.

Bantu bavula mu ntanda baswa kuba’mba bantu batanshi baikelenga mu mpunzha yawama bingi. Pa myaka yavula yapitapo, ba mu bupopweshi bwa Bayudea, ba mu Kilishitendomu ne Bamozilemu bafunjisha’mba Lesa wajimine bujimi bwa Edena mo abikile ba Adama ne Evwa kuba’mba bekalengamo. Kwesakana na byaamba Baibolo, abano bantu baikele bingi na lusekelo mu bwikalo bwabo. Baumvwañananga bingi mulwabo kabiji baikele mu mutende na banyama. Baikele mu mutende na Lesa wibapeele bumi bwa myaka ne myaka mu mpunzha yawama.—Ntendekelo 2:15-24.

Bahindu nabo baketekela mu paladisa wa kala. Babbuda baketekela’mba bantangi babo nangwa’mba Babbuda bajingako ntanda byo yajinga nobe paladisa. Kabiji bupopweshi bwavula bwa mu Africa bufunjisha mashimikila epasha na jishimikila ja kwa Adama ne Evwa.

Jishimikila ja kala ja paladisa jayukanyikwa bingi mu bupopweshi bwavula ne mu bisho bya bantu. Muntu umo waambile’mba: “Kala, bantu bavula bayukile’mba bantu batanshi baikelenga mu paladisa mwajinga bintu byonse byawama. Kechi mwajingapo bintu bya kwibalengesha moyo ne. Kabiji baikele na bintu byonse byo bakebelenga pa kuba’mba bekala na lusekelo mu bwikalo bwabo. . . . Kino kyalengejile bantu bavula bingi kukekala mu paladisa wajingako kala kabiji bebikako bingi na bulume bwabo bonse kukeba kubwezha uno paladisa.”

Nanchi ano onse mashimikila ne bisho byafuma kuntu kumo nyi? Nanchi mulanguluko wa kuba’mba paladisa wajingako ye ulengela bantu “kukeba kwikala bingi mu paladisa” nyi? Nanchi kine bujimi bwa Edena bwajingako nyi? Nga ba Adama ne Evwa kine nabo bajingako nyi?

Bantu bazhinauka bingi jino jishimikila. Lelo jino, bantu bavula mo balanguluka’mba ke kubula maana kuswa’mba Adama ne Evwa ne bujimi bwa Edena bwajingako. Kabiji bantangi ba bupopweshi bamo nabo bazhinauka’mba bujimi bwa Edena kechi bwajingako ne. Bamba’mba ino mpunzha kechi yajingako ne. Kabiji bamba ne kuba’mba jino jishimikila ke mañambilatu, kishimitu, kifwanyikizhotu nangwa’mba kishimpitu.

Ibyo mu Baibolo muji bishimpi byavula bingi. Yesu waambile pa bishimpi byavula byayuka bantu. Kabiji byaamba Baibolo pa bujimi bwa Edena kechi jishimikilatu ne, kine abwe bujimi bwajingako. Onkao mambo, inge bujimi bwa Edena kechi bwajingako ne, ko kuba’mba kechi twafwainwa ne kuketekela bintu byonse byaambapo Baibolo ne. Twayai tumone bantu bamo o bakaina’mba bujimi bwa Edena kechi bwajingako ne. Kabiji tusakufunda ne ene mambo kufunda pa jishimikila jaamba pa bujimi bwa Edena o kwanemena kwi atweba.