Edene​—Na e be e le Legae la Mathomo la Batho?

AKANYA o le ka serapeng. Ga go na ditšhitišo, ga go mašata a bophelo bja toropong a kwagalago ka kua ga leboto le le lego kgauswi. Serapa se ke se segolo gomme ga go seo se šitišanago le khutšo ya sona. Se sekaone le go feta, monagano wa gago ga wa tlala ka dipelaelo, mmele wa gago ga o tshwenywe ke bolwetši le ge e le bofe, ga o ganane le dilo tše itšego, goba go kwa bohloko. Dikwi tša gago di thabela go ba tikologong yeo o lego go yona.

O thoma go fepa mahlo a gago ka mebalabala e kgahlišago ya matšoba, ke moka ka meetse a elago a noka, le ka botala bjo bo kgahlišago bja dimela le bjang tšeo di lego letšatšing goba moriting. O bethwa ke moya o mobosana o fokago gomme o kwa monko o mobose wo o tlago le wona. O kwa lešatana la matlakala, la meetse ao a gašago matlapa, melotšana ya dinonyana le go bobola ga dikhunkhwane tšeo di šomago. Ge o akanya ka boemo bjoo, na ga o ikwe o hlologela go ba lefelong le bjalo?

Batho lefaseng ka bophara ba dumela gore moloko wa batho mathomong o be o dula lefelong le bjalo. Ka nywagakgolo, ditho tša Bojuda, Bojakane le Bomoseleme di be di rutwa ka serapa sa Edene, moo Modimo a beilego Adama le Efa gore ba phele gona. Go ya ka Beibele, ba be ba phela ka khutšo e bile ba thabile. Go be go ena le khutšo magareng ga bona le diphoofolo gotee le Modimo, yoo ka botho a ilego a ba nea kholofelo ya go phela ka mo go sa felego maemong ao a kgahlišago.—Genesi 2:15-24.

Mahindu le ona a na le dikgopolo tše itšego mabapi le paradeise ya mehleng ya bogologolo. Mabuddha a dumela gore baetapele ba bagolo ba moya, goba boBuddha, ba tšweletše nywageng yeo ya bogologolo ge lefase e be e le paradeise. Gomme madumedi a mantši a Afrika a ruta dikanegelo tšeo di swanago le ya Adama le Efa.

Ge e le gabotse, kgopolo ya paradeise ya mathomong e hwetšwa madumeding le ditšong tše dintši tša batho. Mongwadi yo mongwe o boletše gore: “Batho ba bantši ba be ba dumela go paradeise ya mathomong a histori yeo e bego e hlaolwa ka phethagalo, tokologo, khutšo, lethabo, motlalo wa dilo, gotee le go se be gona ga pateletšo, kgateletšo le diphapang. . . . Tumelo ye e dirile gore batho  ka kakaretšo ba kganyoge paradeise yeo e lahlegilego le go leka go e tsošološa.”

Na dikanegelo tšeo le dinonwane tšeo di ka ba di etšwa mothopong o tee? Na go a kgonega gore batho “ka kakaretšo” ba ka be ba tutueditšwe ke mogopolo wa selo se itšego sa kgonthe? Na ruri kgale go kile gwa ba le serapa sa Edene gotee le Adama le Efa ba kgonthe?

Baswayadiphošo ba nyatša kgopolo yeo. Mehleng ye ya thutamahlale, batho ba bantši ba tšea gore dipego tše bjalo e fo ba e le mabarebare goba dinonwane. Se se makatšago ke gore baswayadiphošo ba ga se bao e sego badumedi feela. Baetapele ba bantši ba bodumedi ba kgothaletša go se dumele gore serapa sa Edene se kile sa ba gona. Ba re ga se gwa ka gwa ba le lefelo la mohuta woo. Ba bolela gore dipego tše bjalo e fo ba feela tshwantšhišo, nonwane goba papišo.

Ke therešo gore Beibele e na le dipapišo. Jesu ka boyena o ile a bolela dipapišo tše di tsebjago kudu go feta tše dingwe ka moka. Lega go le bjalo, Beibele e bolela ka pego ya mabapi le Edene, e se papišo, eupša e le histori, ke phetho ke tuu. Lega go le bjalo, ge e ba ditiragalo tšeo di hlaloswago ga se tša ka tša direga, gona Beibele ka moka e ka botwa bjang? A re hlahlobeng lebaka leo ka lona ba bangwe ba nyatšago kgopolo ya serapa sa Edene gomme re boneng ge e ba mabaka a bona a kwagala goba a sa kwagale. Ke moka re tla ela hloko lebaka leo ka lona yo mongwe le yo mongwe wa rena a swanetšego go tshwenyega ka pego ye.