IMAGINÁ ku bo ta den un hòfi. Nada no ta kita bo trankilidat ni no tin ningun klase di bochincha. E hòfi ta masha grandi. I no tin nada ku ta kita e pas ku ta reina. Mihó ainda, bo no tin niun preokupashon i bo ta liber di tur klase di malesa, alergia i doló. Bo olfato, oido, bista i takto ta asina bon ku bo por disfrutá plenamente di e ambiente.

Promé bo ta mira e kolónan bibu di flor, despues e awa di riu ku ta bria i un gran kantidat di blachi i yerba bèrdè ku tin sea den solo òf den sombra. Bo ta sinti bientu ta karisiá bo suavemente i bo ta haña e holónan dushi ku tin den hòfi. Bo ta tende zonidu di blachi di palu, awa ta basha for di baranka, para ta kanta i zonidu di insekto. Bo no ta haña gana di biba den e hòfi akí?

Hende rònt mundu ta kere ku na prinsipio humanidat a biba den un lugá asina. Pa siglonan, hudaismo, kristiandat i islam a siña nan miembronan tokante e hòfi di Edén, kaminda Dios a pone Adam ku Eva biba. Segun Beibel, nan a disfrutá di pas i felisidat. Nan a biba na pas ku otro, ku bestia i ku Dios, kende amorosamente a duna nan e speransa di biba pa semper den e ambiente agradabel ei.​—⁠Génesis 2:​15-⁠24.

Hindúnan tambe tin nan propio konsepto tokante un paradeis di antigwedat. Budistanan ta kere ku lidernan spiritual importante, òf Budanan, ta presentá den sierto époka di oro den kua mundu ta manera un paradeis. I vários religion na Afrika ta siña hende relatonan ku ta masha paresido na esun di Adam ku Eva.

En realidat, bo por dedusí for di hopi religion i tradishon di hende ku nan tabata kere den un paradeis ku a eksistí hopi tempu pasá. Un outor a remarká: “Hopi sivilisashon a kere den un paradeis ku a eksistí na komienso di historia. Den e paradeis ei tabatin perfekshon, libertat, pas, felisidat, abundansia i no tabatin preshon, tenshon ni konflikto. . . . E kreensia  akí a lanta un deseo den hende en general pa e paradeis pèrdí ei i pa buska un manera pa rekuper’é.”

Ta posibel ku tur e kuenta- i tradishonnan akí tin un solo orígen? Ta posibel ku “hende en general” tin e konsepto akí debí na algu ku a yega di eksistí den pasado? E hòfi di Edén realmente a eksistí leu den pasado i Adam ku Eva tabata personanan real?

Sképtikonan ta haña e idea akí ridíkulo. Den e era sientífiko akí, hopi di nan ta pensa ku e relatonan ei ta simplemente leyenda i mito. Pa straño ku por parse, tin di e sképtikonan akí ta hende religioso. Hopi lider religioso ta deskurashá hende pa kere den e hòfi di Edén. Nan ta bisa ku e lugá ei nunka no a eksistí. Segun nan, e relato ta simplemente un metáfora, mito, fábula òf parábola.

Ta bèrdat ku tin parábola den Beibel. E parábolanan di Hesus ta esnan di mas famoso. Sinembargo, Beibel no ta presentá e relato tokante Edén komo parábola sino komo historia. Si e susesonan deskribí den Génesis nunka no a tuma lugá, anto ta kon nos lo por pone konfiansa den tur e otro partinan di Beibel? Laga nos ban wak dikon algun hende ta duda ku e hòfi di Edén a eksistí i si nan motibunan ta bon fundá. Kaba nos lo trata dikon e relato ta importante pa kada un di nos.