Wia de Goaden Eden de ieeschte Menschen äa Tus?

DENKJ mol han, du best en eenen Goaden. Doa es nuscht, waut die auflenkjen deit, doa es kjeen Jelud von groote Städa un Foatieja. Dee Goaden es groot un aules es frädlich un daut baste es: Dien Kopp es frie von aule Sorjen. Du hast kjeene Krankheiten, kjeene Weedoag, du best rein stoakj un aules, waut du sitst, daut jleichst du bloos grulich sea.

Du kjikjst no de schmocke Bloomen, du kaust daut kloare Wota seenen un de jreene Bläda, daut Grauss, du sitst, woo de Sonn schient un dän Schauten. Du kaust de makelje Loft späaren un doa sent de Bloomen, waut soo scheen rikjen. Du kaust hieren, woo de Bläda ruschlen, woo daut Wota äwa de Steena schält un du hieescht de Väajel piepren un sinjen un du hieescht uk aundre kjliene Tieren sommen. Wan du die doa nenlatst, es die doa dan nich no, mol opp soone Städ to sennen?

De Menschen von äwaraul oppe Welt jleewen, daut de ieeschte Menschen opp soone Städ läwden. Fa hundade Joaren haben Juden, Christen un soone Menschen von dän islamischen Gloowen jelieet, daut Gott Adam un Eva en dän Goaden Eden nensad, daut dee doa läwen kunnen. Un soo aus de Schreft sajcht, wia daut doa aula frädlich un dee jinkj daut scheen. Dee hauden Fräd unjarenaunda, dee hauden Fräd met de Tieren un uk met Gott, dee an soo leeftolich soone feine Städ jejäft haud, wua see kunnen fa emma läwen (1. Mose 2:15-24).

De Hindus jleewen daut uk, daut doa to jane Tiet mol een Paradies wia. De Buddhisten jleewen, daut äare Leidasch, de Buddhas, to eene Tiet oppkjeemen, wua doa een Paradies oppe Ieed wia. Un en Afrika sent een schoof Jemeenten, waut soone Jeschichten lieren, waut sea soo sent aus daut, waut de Schreft von Adam un Eva sajcht.

De Iedee, daut doa lang trigj mol een Paradies jewast es, woat mank veschiedne Jemeenten un Menschen jelieet. Een Schriewa schreef, daut väl Menschen ieeschtemma jejleeft haben, daut de ieeschte Menschen en een Paradies läwden, wua aules volkomen wia. Doa wia nuscht, waut de Angst muak un dee hauden aules, waut dee fäld toom scheen gonen. Un wäajen dee soont jleewen, wenschen väl Menschen sikj een Paradies, waut soo wia aus daut Paradies, waut tonuscht jinkj.

Kaun daut sennen, daut aul dise veschiedne Menschen änelje Jeschichten haben äwa daut Paradies, wiels daut dän Goaden Eden werkjlich mol jejäft haft, wua Adam un Eva bennen wieren?

Vondoag dän Dach denkjen väle, daut daut onkluak es to jleewen, daut dise Jeschicht mol werkjlich jewast es? Nich mol aule Gloowesleidasch jleewen daut, daut et dän Goaden Eden opp iernst jejäft haft un dee sajen, daut es bloos eene oppjemoakte Jeschicht ooda bloos een Jlikjnis, waut ons waut lieren saul.

Daut es soo, daut en de Schreft Jlikjnisen jebrukt woaren. Jesus selfst brukt Jlikjnisen, waut nu daut wietste bekaunt sent. Oba de Schreft sajcht nich, daut Eden bloos een Jlikjnis wia. Dee sajcht, daut daut werkjlich mol soo jewast es. Wan de Goaden Eden oba nich opp iernst wia, woo wudd wie dan kjennen daut äwaje en de Schreft vetruen? Well wie ons daut nu mol unjastonen, wuarom eenje sajen, daut daut dän Goaden Eden kjeenmol jejäft haft. Wie woaren ons daut uk unjastonen, wuarom daut wichtich es, de Kloarheit doaräwa to haben.