Ihden Iei Tepin en Aramas Wasahn Kousoan?

MEDEWEHLA ma ke mi nan mwetuwel ehu. Sohte mehn kerempwa kan oh sohte ngilen katairong sang nan kahnimw kan. Mwetuwel wet inenen kalaimwun oh sohte mehkot kin kedirepwe meleilei en wasao. Oh me pil mwahusang met, omw madamadau sohte kin pwunod oh paliweromw sohte kin medek de pil soumwahu. Ke kak kilang, ned, rong oh pehm soahng kan me kapiluhkpene.

Mesomwen kin kilang oh linganki pohn masal en wahntuhke kan. Ke pil kak kilang melengileng en piletik kan oh moaloamoal en tehn tuhke kan oh dihpw kan pahn ketipin oh pahn mwete kan. Ke kak kehn engitik pohn kilimw kan oh pil ned pwohtik me kin ipido. Ke kak rong ngilen tehn tuhke kan, ngilen pihl kuspekda oh kerekeredi pohn takai kan. Oh ke pil kak rong ngilen menpihr kan ar wie kokoul oh ngilen kisin men tikitik kan ar wie doadoahk. Ni omw kin medewehla duwen met, ke sou kin men mi nan soangen wasa me duwehte met?

Aramas nin sampah kin kamehlele me mouren aramas tepida nan wasa ehu me duwehte met. Erein sounpar epwiki kei, tohn pelien lamalam en mehn Suhs, Islam oh irail kan me dene irail Kristian kin sukuhlki duwen mwetuwel en Ihden, wasa me Koht ketikihdi Adam oh Ihp en momour ie. Nin duwen Paipel mahsanih, ira ahneki mour meleilei oh nsenamwahu. Mie meleilei nanpwungara, rehn mahn akan, oh pil rehn Koht me kupwur sapankihong ira koapworopwor en mour kohkohlahte nan wasa kaselelo.—Senesis 2:15-24.

Mie pil en pelien lamalam en Hindu padahk me pid duwen paradais ehu mahso. Buddhist kan kamehlele me ngehn lapalap kan de Buddha kan kin momour ni ahnsou me sampah duwehte paradaiso. Sarawi tohto nan Aperika kin padahngki soai kan me pahrekiong koasoipen Adam oh Ihp.

Ni mehlel, padahk wet duwen paradais mahso kin mihla nan pelien lamalam oh dahme aramas kin kamehlele. Emen sounnting nda: “Soangsoangen koasoandi en aramas tohto kin kamehlele me  mie paradais ehu nan poadopoad sangete nin tapio. Dene paradais wet unsek, mie saledek, meleilei, nsenamwahu, soahng tohto kan, sohte limeidihd, pwunod de uhpene kan. . . . Padahk wet kin kalaudehla ineng en aramas tohto ong Paradais me salongala ahpw sohte manokonokla. Oh re uhdahn men Paradais wet en kapwurpwurdo.”

Ia duwe, soai pwukat oh padahk pwukat kak kohsang wasatehkis? Ineng en mi nan Paradais wet kohsang madamadau ehu me uhdahn mehlel? Uhdahn mie mwetuwel en Ihden mahso oh Adam oh Ihp uhdahn mie?

Irail me sohte kamehlele padahk wet kin uhwong. Nan atail ahnsou me pelien sains kin kekeirda, me tohto kin nda me padahk pwukat sohte mehlel oh e kin wiahte koasoi kei. E kapwuriamwei pwe ekei irail mie arail pelien lamalam. Tohto kaunen pelien lamalam kin kahrehiong me tohto en solahr kamehlele me mie mwetuwel en Ihden. Irail nda me sohte soangen wasa me duwehte met. Irail nda me padahk wet, ihte soai de karasaras ehu.

Mehlel, pil mie karasaras kan nan Paipel. Pein Sises kin mahsanih karasaras me keieu ndand nanpwungen karasaras akan. Ahpw, Paipel kin mahsanih duwen Ihden kaidehn nin duwen karasaras ehu ahpw uhdahn poadopoad mehlel ehu. Eri ma mehlel met sohte wiawi, eri ia duwen atail pahn kak kamehlele wasa teikan nan Paipel? Kitail pahn tehk dahme kahrehda ekei sohte kamehlele me mwetuwel en Ihden uhdahn mehlel oh tehk ma kahrepen ar wia met me pwung. Oh mwuri, kitail pahn kilang ia kahrepen met eh kesempwal ong emenemen kitail.